Faka’ohovale ki he Siasi (LDS) ongoongo kia Mr William James Purdy mo e taimi na’e hoko ai hia
Kuo tuku mai ‘e he Siasi ‘o Sisu Kalaisi ‘o e kau Ma’oni’oni ‘o e Ngaahi ‘Aho Kimui ni, mei he’enau ‘ofisi fakafeitu’u mei Nu’usila, ‘enau tali ki he ngaahi ongoongo fekau’aki mo Mr. Purdy na’e puke he kau Polisi ‘o Utah ko e launga mei Tonga ki he hia pa’usi’i e longa’i fanau tangata ‘e toko 14.
Fakatatau mo e fakamatala ‘a Richard Hunter ko e tokotaha ‘oku ne tokanga’i ‘a e ngaahi fetu’utaki fakamitia ma’ae Siasi mei ‘Okalani, “Oku kei fifili ‘a e siasi pe na’e fakahoko he tokotaha ni ‘a e hia ‘oku tukuaki’i kiai lolotonga ‘ene kei hoko ko e Faifekau pe ‘ikai” He ‘oku pea na’e te’eki pe kenau ma’u ha fakamatala mei he kau taki ‘o e siasi mei Tonga ha fakamatala lolotonga ‘ene ngaue Fakafaifekau pea ‘oku ‘ohovale mo e kau taki ‘o e siasi ‘i Tonga ‘enau fanongo he ongoongo ni.
“ Ka ‘i he taimi tatau ‘e malava pe ke hoko ‘a e tukuaki’i he vaha’a taimi ‘ene fua fatongia ma’ae siasi pea kapau na’e hoko ‘a e me’a ko’eni pea ‘ilo kiai ‘a e Palesiteni ‘o e kau Faifekau ‘i Tonga na’e totonu kenau fakafoki ai pe ‘a Purdy ki ‘Amelika, ‘i hono maumau’i ‘o e lao ‘o e fonua mo e fekau ‘a e ‘Otua”, ko e fakama’ala’ala ia mei he ‘ofisi faka’elia ‘o e siasi mei Nu’usila.
Na’e toe fakamahino ‘e Hunter, “ ‘Oku ‘ikai tali mo fakaoleole’i he siasi ‘a e hia mamafa ko’eni ki hono pa’usi’i ‘o e longa’i fanau ‘i ha fa’ahinga ‘uhinga pea na’e talu pe mei fuoloa.”
Ko e Siasi ‘o Sisu Kalaisi ‘o e Kau Ma’oni’oni ‘i he Ngaahi’Aho Kimui ni, ‘oku ma’olunga ‘enau founga tokanga’i ‘o e famili mo e fanau iiki, ‘oku kau ai hono fakamamafa’i ke tapui hono tautea’i kinautolu he matu’a pea ko e ngaahi ako’anga siasi ‘oku tapu ‘aupito ‘a e tautea taa. Pea ko’ene hiki hake ‘a e faihia ki he tu’unga mamafa hono pa’usi’i fakalielia ‘oku a’u ki he to’o pe tu’usi mei he siasi, ko e fakahaa ia ‘o e mahu’inga ki he siasi ‘a e kaveinga ki he longa’i fanau.
Na’e toe kole fakamolemole ‘a Hunter mo fie kaunga mamahi ki he ni’ihi ‘o e toko 14 kuo lipooti mei he kau Polisi, na’e fakahoko kiai ‘e Purdy ‘a e ngaahi hia. Pea ‘oku fengaue’aki vaofi ‘a e siasi pea mo e kau ma’u mafai ‘i Tonga mo ‘Amelika ki he kaveinga ni pea toki ‘iai ha ngaahi tu’utu’uni.
Na’e ‘osi tuku ate he ongoongo ni ‘a e ongoongo kia Purdy ‘i he’ene ‘i Tonga ni ko e Faifekau ‘i he 2017 pea mo’ene toe foki mai ‘i he 2019 ‘o hoko ko e faiako ‘i he Ocean of Light. Pea ‘oku tukuaki’i na’e hoko ai ‘a e hia pea toki fakahoko ‘a e ‘uluaki launga ‘i he 2022, ‘o puke he kau Polisi ‘a Purdy. ‘I hono malu’i kitu’a tali hopo na’ane hola ki Fisi, hili hono puke he kau Polisi ‘i Tonga ni ‘ene passpooti, ‘o folau ai ki ‘Amelika. Ka na’e fetu’utaki ‘a e kau Polisi ‘a Tonga mo e kau ma’u mafai ‘a Amelika ‘o puke ai ‘a Purdy ‘o fakahuu he ‘aho 16 Siulai.
