‘Ave he Waikato Chief mei he New Zealand Rugby ‘a e PNG Chiefs mei he NRL ki he Fakamaau’anga ki he totonu ki he fo’i lea CHIEF.
Ko e kaveinga malie mei he mala’e ‘o e sipoti pea mo e vaa ‘o e Sipoti ‘Akapulu ‘Iunioni mo e ‘Akapulu Liiki. Ko hono ‘ave ‘e he timi New Zealand Rugby mei Nu’usila ko e Waikato Chief ‘a e timi fo’ou taha ki he fe’auhi NRL ‘a ‘Aositelelia, ka ko e timi ‘a Papua Niukini ‘oku ‘osi fakahingoa ko e PNG Chief.
Ko e fakatonutonu fakalao ‘eni ko hono ‘eke’i ‘e he NZ Rugby mo e Waikato Chief ‘a e totonu fakalao ki he fo’i lea ko e CHIEF, he ko e koloa ia ‘a kinautolu kuonau lesisita fakalao he ta’u ‘eni ‘e 30 kenau ngaue’aki pea mo e ngaahi me’a ki he tafa’aki fakakomesiale ki he hingoa ko e CHIEF.
‘Oku ‘iloa ‘eni he me’a fakapisinisi komesiale ko e TRADE MARK. Ko e faka’ilonga mo e lea ke ngaue’aki ha kautaha pe kulupu ko’enau koloa. Pea he ‘ikai ha toe totonu ha taha kiai, ta’etenau ma’u ha ngofua ki he kautaha pe kulupu koia. Ko e kautaha lahi koia ko e NIKE ‘oku ‘iai hono faka’ilonga ke tu’uaki ‘aki ‘ene ngaahi koloa pea ‘oku tapu ke toe ngaue’aki ha taha.
Ko e me’a tatau ki he hingoa CHIEF pea ‘oku ‘iai ‘a e tokolahi ‘oku ta’emahino kiate kinautolu ‘a e founga ngaue fakapisinisi ko’eni, ‘o hangee ko e totonu ki he Mate Ma’a Tonga mo hono faka’ilonga (logo) ‘oku fai ‘a e longoa’a mo e ngaahi kautaha taa falani ‘i Nu’usila.
Kaekehe kuo tafihu ai ‘a e pule lahi ‘o e Liiki Fakafonua ‘a ‘Aositelelia (ARLC) Peter Vlandy kenau fakafepaki’i ‘a e founga ngaue ni, ‘aki ‘enau loto ke hoko atu pe ‘a e timi ia ‘a PNG mo e hingoa CHIEF.
“ Temau fakafepaki’i lahi ‘a e fakakaukau ni he ‘oku malualoi. Ko e NSW BLUE na’ane ngaue’aki ‘a e totonu ki he fo’i lea BLUE he ta’u ‘e 50, kimu’a he Auckland BLUE ka na’e ‘ikai fai ha fakatonutonu ai” ko Mr. Vlandy.
Ka ‘i he fakama’ala’ala meia Steve Lancaster CEO ‘o e New Zealand Rugby, ko e talu mei he ta’u kuo’osi mo’enau feinga ki he ARLC mo e ‘ikai pe ha fetaulaki. Pea he ‘ikai hanau toe fili ka ko e malu’i ‘a e koloa ‘a e kautaha. ‘Oku ‘osi lesisita ‘a e CHIEF ‘i Nu’usila mo ‘Aositelelia pea kuo fakatokanga’i fakamamani lahi he ongo fonua ni.
Ko e ngaahi vala mo e naunau sipoti ‘oku fakatau atu ‘e he Waikato Chief ‘oku lau miliona he ta’u hono mahu’inga pea ko e pa’anga lahi ‘oku tanaki he kalapu ke fakalele ‘aki ‘ene ngaue.
Na’e kilofi he ni’ihi taa falani ‘a e faingamalie ko’eni kenau ngaue’aki ‘a e hingoa Mate Ma’a Tonga mo hono faka’ilonga (logo) kenau tanaki pa’anga lahi ai ‘o tatau ‘a e kau Tonga mo e kau muli kae tautefito ki Nu’usila mo ‘Aositelelia. Ka koe’uhi ko e ‘ikai ke fu’u mahino ki he ni’ihi ko’eni ‘a e founga fakapisinisi fakakomesiale ki he Trade Mark, kuo toe ha ‘uhinga kehekehe ‘enau feinga ke taukave’i’aki ‘enau totonu. Pea ko’ene tu’u, kuo ‘osi ‘oatu ‘a e fakatokanga ki he ni’ihi ko’eni mei he Tonga National Rugby League. Pea ka ‘ikai tenau tokanga kiai pea ko e fakamaau’anga pe te ne toki lava ‘o fakamahino kiate kinautolu ‘a e tu’unga fakalao koia.
Ka ko e me’a lelei ke takitaha kumi ‘ene totonu pea mo e feitu’u totonu ke ne aofangatuku ‘a e mo’oni, kae ‘ikai ko e kaila le’olahi mo poupoua tokolahi he Facebook.
