Kei taki Netanyahu sea 53 hoko hake Eisenkot sea 48, Arab Parties sea 19 ko e 85.6% ia kau vouta ‘o ‘Isileli.
Ko e fili Fale Alea ‘a ‘Isileli ‘a e taha ‘o e kaveinga lahitaha ‘oku tokanga kiai ‘a Mamani, koe’uhi ko e fekau’aki ‘a ‘Isileli mo e ngaahi me’a lahi he lolotonga ni, ‘o kau ai ‘a e tau ‘oku lolotonga fakahoko he vaha’a ‘o Iran, ‘Amelika mo ‘Isileli.
‘Oku toe hoko ‘a e tu’u tokotaha ‘a ‘Isileli he ha’oha’onga ‘o e ngaahi fonua ‘Alepea mo e ngaahi ta’emanonga kuo laui ta’u ‘ene hoko he feitu’uni, ko ha kaveinga fakamamani lahi ‘oku mahu’inga makehe ai ‘a ‘Isileli neongo ko e ki’i fonua si’isi’i.
‘Oku sio taha ‘a e ngaahi fonua ‘o Mamani pe koeha ‘a e ola ‘o e fili Fale Alea he ‘e ‘iai ‘ene kaunga lahi, ki ha ngaahi tu’utu’uni mo e liliu ‘e hoko ki he Hahake Lotoloto.
Ka ‘i he’ene tu’u, ‘oku kei taki pe paati ‘a e Palemia lolotonga Benjamin Netanyahu mo e sea ‘e 53, hoko hake ‘a e paati fakaanga ‘oku taki ai ‘a Eiisenkot mo e sea ‘e 48 pea toki hoko hifo ki he paati kau Alepea ko e sea 19.
‘I he tu’u ‘a e sea ki he Fale Alea, kuopau ke a’u ‘a e sea ‘e ma’u ‘e ha Paati ki he sea ‘e 61 ka ne lava ‘o fakalele ha pule’anga. Ka ‘i he fika he lolotonga ni ‘oku te’eki ke ma’u ‘a e fika koia he pule’anga lolotonga pea pehee ki he paati fakafepaki. Pea ngalingali ko e paati ‘a e kau ‘Alepea tenau aofangatuku ‘a e fili pe kohai ‘a e paati ‘e pule’anga. Ka nau ka ‘unu ki he tafa’aki ‘a e pule’anga lolotonga pe ko e tafa’aki fakafepaki pea mahino ko e paati ia ‘e pule’anga.
‘I he taimi tatau, ‘oku toe ‘a e 14% ‘o e kau vouta ke fakahoko ‘enau fili pea ko e lahitaha ai ko e ngaahi fili mei he ngaahi fonua muli. ‘Oku tui ‘a e tokolahi he ‘ikai toe ‘iai ha kehekehe ki he ola, ‘e kei taki pe ‘a Netanyahu he sea lahi taha. Ka he ‘ikai pe ma’u ai ‘a e sea ke a’u ki he 61 kenau lava ‘o hoko ko e pule’anga.
Ko e vakai ‘a e kau ‘analaiso fakapolitikale, ‘oku tu’u fakatu’utamaki ‘aupito ‘a e fili ki he kaha’u ‘o e fonua. ‘I he ‘uhinga ka ‘ikai felotoi ‘a e ongo paati lalahi kena fa’u ha pule’anga, ‘e fokotu’u atu ‘e he paati ia ‘a e kau ‘Alepea ‘enau ngaahi la’ipele ki he ongo paati lalahi kenau tali, kanau kaunga fakalele ‘a e pule’anga.
Ka ko e sio ‘a e tokolahi ko e fiema’u koia ‘a e paati ‘a e kau ‘Alepea he ‘ikai kaunga lelei ia ki he kakai ‘o ‘Isileli. Pea kapau he ‘ikai felotoi ‘a e paati lolotonga mo e paati fakafepaki ‘e fakalele ‘e he kau Alepea ‘a e pule’anga ‘Isileli ‘aki ‘enau ngaahi fiema’u.
Kaekehe ‘oku talamai he ola ‘o e fili ‘a e mavaeua ‘a e kakai ‘o e fonua ‘i he tau ‘oku lolotonga hoko, ka ko e tokolahi taha ‘oku nau kei falala pe ki he Palemia lolotonga. Pea neongo ‘a e tukuaki’i kuo fakahoko he taki ‘o e paati fakaanga ‘a e PM lolotonga, ko e tau ‘oku hoko ko e feinga pe ‘a e PM ke kei nofo he mafai pule, ka ‘oku hoko ‘a e ola ‘o e fili ke ne fakakaukau ki he loto ‘o e kakai ‘o ‘Isileli.
‘Oku poupou fefeka ‘a Trump kia Netanyahu ka ko e tokolahi ‘o e ngaahi fonua Alepea mo e ngaahi fonua lahi, ‘oku totonu ke tuku kitu’a ‘a Netanyahu.
Ka ‘oku malie ‘a e lau ‘a e tokolahi, ‘e tatau ai pe kohai ‘e Palemia, ko e malu ‘a ‘Isileli ‘e kei fika ‘uluaki pe ki he taki koia. Pea ka ‘iai ha taki ‘e fakahangahanga kehe mei ai pea te ne sio leva ki he loto ‘o e kakai ‘o ‘Isileli. Pea ko e ‘uhinga ia ‘oku nau tokanga ai ke ‘oua na’a fai ha fengaue’aki mo e paati kau ‘Alepea.
‘Oku fakafuofua ko e ‘aho 4 Novema ‘e kakato kiai ‘a e ola totonu ki he fili, ka ko e ola lolotonga ‘oku ngalingali he ‘ikai ha kehekehe mei ai.
