Fakamahino Toloa ki ‘Atele ko e ‘apiako tupu’a kinautolu ‘o e ‘akapulu ‘i he va’inga malie Toloa 39-36 ‘Atele
Na’e fakamahino ‘e he Kolisi ko Tupou ki he fanau mei he Funga Manamo’ui ko e ‘apiako tupu’a kinautolu ‘o e ‘akapulu talu mei tuai, ‘enau ikuna ‘a e vainga fakaholo mamata ‘o e fainolo ‘o e timi Senior he mala’e Teufaiva ‘i he ‘aho Falaite. ‘I he ifi mai ‘a e taimi kakato mei tu’a ‘oku Toloa 39-36 ‘Atele.
‘Oku taku he tokolahi ko e taha ‘eni he fainolo malie taha kuo fakahoko he mala’e va’inga fakaako pea ‘oku fakamo’oni pe kiai ‘a e lahi ‘o e kai pea mo’ene vaofi. Ko e ‘uluaki miniti ‘e 5 kamata kuo tata’o ‘a Toloa ia ke fakava ‘aki ‘a e papa tohi kai. Ka na’e ‘ikai fuoloa mei ai kuo tokoto atu ‘a e laione ia he laine tata’o pea na’e fetukuaki ai pe ‘a e kai’o maloloo ‘oku na tau’aki 24.
‘I he tu’u mai ‘a e tu’u hono ua kuo toe taha’i hake ‘e Toloa honau kai, ka na’e ‘ikai pe holo ‘a e Kapiteni ‘a ‘Atele mo’ene fanga laione kenau piki hake pe he tafa’aki. ‘I he miniti ‘e 10 faka’osi ‘oku Toloa 39-31 ‘Atele. Ka na’e toe kolosi ‘a e kapiteni ‘a ‘Atele Taniela Lehapoto he laine tata’o kae hala ‘a e ‘aka kenau ‘alu hake ai ‘o Toloa 39- ‘Atele 36. Na’e ‘iai ‘a e laine ‘auti ‘a ‘Atele pea ko e faingamalie ia kenau va’inga’i ‘enau pulu faka’osi kana’e knock on ‘a e pulu kenau sikalamu ai pea mo e ifi mai ‘a e taimi kakato ke ‘akahi ai pe he haafi ‘a Toloa ‘a e pulu ki he ‘auti kenau ikuna ‘a e fainolo.
Ko e malie he ko e feinga hake ‘a Toloa mei he kuata ‘o toki semi final mo Liahona kenau ikuna ai, kenau a’u ki he fainolo ‘onau tukuhifo ai mo e fanga laione ‘o e Funga Manamo’ui.
‘Oku ‘ikai ngata ai ka ko e fu’u kakai na’e tefua he mala’e Teufaiva na’e fonu ‘a e grand stand pea tokolahi a’upito mo e toenga mala’e, ko e tau’aki poupou ki he’ene timi.
Na’e fakamafana ki he hako tupu ‘o e fonua, ko e maa’imoa ‘a e Tama Pilinisi ko e ‘ea ki he taloni ‘o Tonga fakataha mo e fanau. Koia na’ane taki’i mai ‘a e grade 1 ‘a Toloa kenau ikuna ‘a Liahona he fainolo. Na’e toe fakamafana koe ‘iai mo e ngaahi pale pa’anga, ko e Senior na’e $10,000 ‘a e pale ‘uluaki pea ko e ‘epoki fo’ou ia ke ‘iai ‘a e fe’auhi ‘a e fanau ‘akapulu fakaako.
‘I he ngaahi kalasi kehe.
Grade 5 Liahona 23-20 ‘Atele
Grade 4 ‘Atele 34-23 Liahona.
Grade 3 Liahona 26-17 Toloa
Grade 2 ‘Apifo’ou 17-7 Liahona
Grade 1 Toloa 26-17 Liahona.
Ko’ene tu’u leva ‘oku ikuna ‘e Toloa ‘a e Senior mo e grade1, Ko Liahona ko e Grade 5&3&3B,4B, Ko ‘Atele ko e grade pe taha grade 3A, ‘Apifo’ou Grade 2. Kaekehe ko e anga ‘o e vakai ki he ‘alu ke toe poto ange ‘a e fanau he va’inga koe’uhi ko hono teuteu’i lelei kinautolu he kau faiako lelei mei he kalasi ki lalo. Ka ko e palopalema ‘oku ‘ikai ha sisiteni lelei ‘a Tonga ke pukepuke ‘etau fanau, he ko’enau a’u hake ki ‘olunga kuo taufa’ao he ngaahi fonua muli. Ko hono lelei pe ko e ma’u ai ‘a e mo’ui ‘a e fanau mo honau ngaahi famili.
