Fehu’ia lava William James Purdy mavahe mei Tonga ni, lolotonga tali hopo ki he pausi’i fanau iiki toko 14
‘Oku lolotonga longoa’a lahi ‘a e fonua hono fehu’ia kohai ‘a e ma’u mafai ‘i Tonga ni, na’ane tokoni’i ‘a e Faka’iloa William James Purdy ke mavahe mei Tonga ni, lolotonga ia ‘oku lolotonga tali ‘ene hopo ki he hia mamafa ko e pa’usi’i fakalielia ‘a e longa’i fanau ‘e toko 14 ‘o fakatatau mo e fakamatala.
‘Oku hoha’a lahi ‘a e kakai ‘o e fonua koe’uhi ko e kau ‘eni he hia mamafa pea to e tokolahi ‘a e fanau na’ane hanga ‘o pa’usi’i.
Ko e hisitolia ‘o Purdy ko e talavou mei Utah na’ane hoko ko e Faifekau fakamisinale he Siasi ‘o Sisu Kalaisi ‘o e Kau Ma’oni’oni he Ngaahi ‘Aho Kimui ni ‘i he 2017. Na’ane foki ki ‘Amelika pea ne toe foki mai ‘i he 2019 ‘o faiako ‘i he Ocean of Light ‘a e siasi Bahai ‘i Hofoa.
Ka ‘oku tukuaki’i na’ane fakahoko ‘a e hia lolotonga ‘ene kei ngaue fakamisinale pea pehe ki he’ene toe foki mai ‘o hoko ko e faiako. Ko e toko 14 kuo fakapapau’i na’e hanga ‘e Purdy ‘o fakahoko kiai ‘a e ngaahi hia ko e longa’i fanau tangata. Ka ‘oku tukukehe ange ha ngaahi hia ‘oku ‘ikai ‘ilo ko e longo ‘a e fanau mo e famili.
Kaekehe na’e puke ia he kau Polisi ‘i he 2022 ko e lea ha ki’i tamasi’i ta’u 8, ‘o fakahuu ka na’e totongi malu’i ia kitu’a ‘o tali hopo. Pea ko e lolotonga ‘a e tali ki he hopo kuo mavahe ia mei Tonga ni ‘i Ma’asi 2023. ‘Oku lolotonga puke he Fakamaau’anga ‘ene paasipooti ‘Amelika, ka ‘oku ‘ikai ‘ilo pe na’e angafefee ‘ene pepa folau mei Tonga ni lolotonga ‘oku ‘i he lisi ‘o e tapui ke mavahe.
Fakatatau mo e ngaahi fakamatala, na’ane tu’uta ki Fisi ‘o hangatonu ki he ‘ofisi faka-konisela ‘Amelika, ‘o fakahaa na’e mole ‘ene paasipooti ‘i Tonga ni. Na’e ‘oange leva ‘ene ngofua folau ki ‘Amelika, kae ‘ikai ke ne ‘ilo ‘oku fetu’utaki ‘a e kau Polisi ‘o Tonga mo e va’a Homeland Security Investigation pea pehee ki he Libertas International ‘onau ngaue atu ‘o puke ‘a Purdy mei he ‘api ‘ene ongomatu’a mei Utah. Pea kuo faka’ilo ia he ngaahi hia na’e tukuaki’i ‘aki ‘i Tonga ni.
‘I he vakai ‘a e ongoongo ni, ko hono faka’ilo ‘oku mahino ‘e fakahoko pe hopo ‘i ‘Amelika. Pea ‘oku foki ‘a e manatu ki he tangata ‘Amelika na’e tauhi he kau Polisi ‘o Vava’u ki he pekia hono hoa he ‘iote. Na’e ‘ohovale kuo hola vaka ‘a e tangata ni ki Ha’amoa ‘Amelika ‘o foki ai ki ‘Amelika. Na’e feinga atu ‘a Tonga ni ke fakafoki mai ke hopo’i ka na’e ‘ikai tali ‘e ‘Amelika koe’uhi ko’enau manavasi’i ki he kei ngaue’aki ‘e Tonga ‘a e tautea mate.
Ko e tu’u he taimi ko’etau fakaongoongo pe ki he ola ‘o e hopo he ‘oku fakahoko kotoa ia ‘i ‘Amelika ka ko e kau mamahi ‘oku nau si’i nofo atu kinautolu ‘i Tonga ni.
Na’e fakahaa he taki fakalotofonua ‘o e Siasi ‘i Tonga ni, “ko e taimi faingata’a kiate ia ‘i he ongona mai ‘o e ongoongo ni koe’uhi ko’ene felave’i mo e siasi.” Ko e taimi lahi ‘oku fakatanga’i ‘a e siasi mei tu’a ‘e ha kakai koe’uhi ko e ngaahi tokateline ‘o e Siasi ka ‘oku ‘ikai ko ha palopalema ia. Ka ko e kaveinga ko’eni ‘oku hoko tonu he memipa ‘o e siasi he taimi mahu’inga ko’ene hoko ko e faifekau pea ‘oku fu’u mamafa lahi.
‘Oku ‘ikai ‘ilo pe ‘e kau hano ‘eke he ngaahi famili ha totongi huhu’i mei he siasi koe’uhi ko e vaha’a taimi na’ane ngaue fakafaifekau ai mo e fanau na’ane pa’usi’i.
