Pekia “Sleeping Prince” ‘o Saudi Arabia hili ta’u 20 ‘ene fakamanava misini
Kuo fakahaa faka’ofisiale he taha ‘o e famili ‘o e Ha’a Tu’i ‘o Saudi Arabia ‘a e pekia ‘a Prince AI-Waleed na’e ‘iloa pe ko e “Sleeping Prince” pea pehee ki he ngaahi kautaha ongoongo ‘o e fonua.
Ko Prince AI-Waleed ko e foha ia ‘o e Pilionea ko Prince Khahed mei he fale ‘o e ha’a Tu’i ‘o Saute ‘Aleapea ‘oku ‘iloa ko e SAUD. Na’e kau ‘i he fakatu’utamaki ‘i ha me’alele ‘i Pilitania ‘i he 2005 lolotonga ‘ene ako ‘i he taha ‘o e ngaahi ‘apiako fakakautau ‘i Pilitania. Na’e talu pea mei ai mo’ene mo’ui pe ‘o fakafalala ki he ngaahi misini faito’o.
Na’e totongi mai he famili tu’umalie ni, ‘a e kau mataotao mei ‘Amelika mo Sipeini kenau fakahoko ha ngaue fakavavevave ki he Pilinisi ka na’e ‘ikai pe ha faka’ilonga. Na’e ‘iai pe ngaahi taimi na’e hangee ‘oku ‘iai ha faka’ilonga ‘e mo’ui ka na’e ‘ikai pe ha fakalakalaka.
Na’e a’u ki ha taimi kuo fale’i he kau Toketa mo e fonua ke to’o aa ‘a e ngaahi misini kae folau fiemalie ‘a e Pilinisi, ka na’e ‘ikai loto kiai ‘ena tamai he ko hono foha lahi pe ia pea mo’ene tui ‘e sai pe hono foha. Na’e ‘osi ‘a e ngaahi feinga kotoa ‘a e kau Toketaa na’e aofangatuku leva ‘a e falala ki ha mana mei langi, ka na’e iku pe ke pekia ‘a e Pilinisi, hili ‘a e fu’u ta’u ‘e 20.
Kuo ‘oatu ‘a e popoaki fie kaungamamahi ‘a e kau taki ‘o e ngaahi fonua kehekehe pea pehee ki he famili mo e ngaahi kaungame’a ‘o e famili, he mole kuo hoko.
‘Oku ‘ikai puli ‘a e fonua ko Saute ‘Alepea ko e taha ‘o e ngaahi fonua tu’umalie taha ‘i mamani koe’uhi ko e lahi ‘enau lolo. Pea ko e taha ia ‘o e ngaahi fonua ‘Alepea ‘oku kei ‘iai honau Tu’i ‘o hangee ko Tonga ni.
