‘Oku ‘amanaki ke fakatetee ‘a e ngaahi kolisi ‘e faa ‘i he mala’e Teufaiva ki hono tapepa’i ‘o e hau ki he ngaahi kalasi takitaha, ‘i he Falaite ‘o e uike ni. 

 Ko e kolisi ‘oku tokolahi taha ‘ene ‘uu timi fainolo ko e ‘apiako Ma’olunga Liahona mo’enau timi ‘e nima ko e grade 1 ki he grade 5 kae mole ‘a e Senior. ‘Oku kau ‘eni ia he fakamamahi lahi ki he ‘apiako ma’olunga Liahona he neongo kanau ka ma’u ‘a e toenga ‘o e ngaahi kalasi, ‘e ‘ikai ke lau ‘oku nau ikuna ‘a e fe’auhi fakaako he ‘oku lau ‘a e ikuna mei he ‘apiako ‘oku ikuna ‘a e timi Senior, ‘a ia ‘oku fainolo ai ‘a e ongo kolisi tupu’a, Kolisi ko Tupou mo e Kolisi Tonga.

‘Oku hoko hake ‘a e Kolisi Tonga mo’enau timi ‘e tolu, ‘aia ko e Senior, ko e grade 5 mo e grade 4. Pea ‘oku kau ‘eni he tu’u fakafiefia koe’uhi ko e kau ‘a e kolisi he fainolo ‘o e Senior pea kanau ikuna mo e ongo grade 5 mo e 4 pea ko e ikuna kafakafa ia ki he ‘apiko tupu’a ni. Ka ‘oku ‘osi tali mai ‘a Liahona he ongo grade ko’eni, ke feinga’i fakangata ha fakaaoao ‘a e Kolisi Tonga he mala’e ‘o e ‘akapulu he ta’uni.

Ko e Kolisi ko Tupou ko’enau timi ‘e tolu, ko e timi Senior hili ‘enau taufale’i ‘a e timi ‘a Liahona ‘i he kai ko e 23-16 ke fakangata ai ‘a e ‘amanaki ‘a e Funga Taua ki he ikuna ‘o e fe’auhi ‘o e ta’u ni. ‘Oku fainolo mo’enau grade 3 mo e grade 1 loua pea mo Liahona. Ka ‘oku tu’u lelei ‘aupito mo Kolisi ko Tupou ke ikuna ‘a e ta’u ni ‘i he teu fainolo mo e Kolisi Tonga. Ko Toloa na’anau ki’i takai loloa he na’anau fo’i ‘i Liahona he ‘uluaki takai pea nau mahanga mo ‘Apifo’ou he vilo takai. Na’e pau kenau kuata he timi faa fakamuimui ‘onau fetaulaki ai mo Takuilau ‘onau ikuna pea nau semi-final mo Liahona ‘onau malohi kenau fainolo ai ki he ipu ‘o e ta’uni.