Faka’ilo Dr. Lei Paasi ‘Ofisa kolo ‘o Haveluloto tukuaki’i ki he ‘ave fakamatala hala he fili si’i Tongatapu 2.

Kuo mahino ‘eni hono fakahaa ‘e Dr. Lei Paasi ko e kanititeiti fika 7 ‘i he fili si’i ‘a Tongatapu 2, kuo fakahuu atu ‘ene faka’ilo ‘o e ‘ofisa kolo ‘o Havelu Finau Tutu’u, ‘i he fili si’i na’e toki ‘osi. Ko’ene fakahaa ‘eni he’ene polokalama mo Setita ‘i he polokalama anga maheni ‘a e Letio ni.

Na’e fetu’utaki tohi ‘a e ongoongo ni kia Semisi Sika ‘i he uike ‘e ua kuohili, ko e fehu’i pe kuo ma’u he Fakafofonga fo’ou ha launga. Ka na’e fakahaa ‘e Misi Sika ki he ongoong ni, ‘oku ne fanongo pe ‘oku fakahoko ‘a e faka’ilo ka ‘oku te’eki ke ma’u ‘e Alvin Sika ha launga pe tohi mei he Komisoni Fili.

Ka ‘i he fakama’ala’ala ‘a Dr. Lei Paasi ‘i  he’ene polokalama mo Setita, ko e faka’ilo ‘oku ne fakahoko ki he ‘Ofisa kolo ‘o Havelu ‘oku ‘ikai ko e totongi fufuu, ka ko’ene ‘ave ‘a e fakamatala hala, ke fakaloto’i ai ha ni’ihi kenau fili ‘ia Alvin Sika.

Na’ane fakama’ala’ala, na’e ‘iai ‘a e kakai na’e hiki mai ki Tongatapu 2 he teu ‘o e fili si’i. Na’anau ‘alu ki he ‘ofisa kolo ke fakakakato ‘enau pepa ki he liliu vahenga fili, ka na’e fakahaa ange ‘e he ‘ofisakolo ke MANATU’I KENAU FILI ‘IA ALVIN SIKA pea ‘oku makatu’unga ai ‘a e faka’ilo ‘oku fakahoko.

Na’e toe fakahaa ‘e Dr. Lei Paasi, na’e ‘iai ‘a e kakai hono kaunga’api na’e fiema’u kenau liliu vahenga fili kenau kau he fili si’i. Ka ‘i he’enau a’u ki he ‘ofisa kolo ke fakahoko ‘a e liliu pea mahino tenau fili ‘ia Lei Paasi he ko honau kaunga ‘api, na’e talaange ia he ‘ofisa koloa kenau ‘alu ‘o fakaongoongo mai. Na’e a’u ki he taimi kuo tapuni ai ‘a e faingamalie ke liliu vahenga fili, na’e te’eki pe toe fetu’utaki ‘a e ‘ofisa kolo ia ki he ni’ihi ko’eni.

Kaekehe tukuaki’i mamafa lahi ‘eni ki hono fakalotoa ha ni’ihi ke fili ‘i ha taha. Ko e taimi tatau ko e ‘ofisa kolo ko e tokotaha ngaue fakapule’anga pea ‘oku tapu he lao ke ne kau ki ha ngaahi me’a fakapolitikale hangee ko’eni ‘oku tukuaki’i kiai. He ‘oku mahino ‘ene kau kia Alvin kapau ‘oku mo’oni ‘a e tukuaki’i. Ko e taha ko e ‘ikai ke ne fakakakato hono fatongia ki he ni’ihi  na’e fiema’u ke liliu vahenga fili, ‘oku ne taki hala’i kinautolu ke mole ai honau faingamalie ke kau ki he fili si’i. Pea kanoni’aki mo e filifili manako.

‘Oku malie ‘a e case ko’eni he ‘oku ‘ikai ke ne faka’ilo ‘a e tokotaha na’ane ma’u ‘a e fili, ka ko e ‘ofisakolo na’e kaunga ki he fili. Ka faifaiange kuo ikuna ‘a e faka’ilo ‘a Dr. Lei Paasi, ko e fehu’i pe ‘e lava ‘a e fakamo’oni ‘o e case ko’eni, ke faka’ilo ‘aki ‘a Alvin Sika. He ‘oku malie na’e ‘ikai ke fai ha totongi fufu ke fili, ka ko e fakalotoa pe ‘a e kakai kenau fili he Fakafofonga pea mo hono takihala’i ‘aki ‘a e fakamatala hala ‘a e kakai fili.

‘Oku te’eki ke ongona mai ‘a Niua 17 pe ‘oku ‘iai ha faka’ilo. Na’e ‘oatu ha tohi fehu’i ki he Komisoni Fili ki he kaveinga ni, ka na’e te’eki ke ‘omai hanau tali.

Leave a Comment