Palemia mo e Kapineti, tuku ‘a e kemipeini kae oo mai sio ki he faka’ofa kakai he maha ‘a e penisini
‘Oku fehu’ia he kakai tokolahi ‘o e fonua pe ‘oku ‘i fe’ia ‘a e Palemia ‘o e fonua mo’ene Kapineti, kenau oo mai ‘o sio ki he faka’ofa ‘a e kakai ‘o e fonua ‘i he maha ‘a e penisini.
Ka ‘oku mahino mai ‘oku lolotonga femou’ekina ‘a e Palemia mo’ene Kapineti ‘i he kemipeini ki he fili ‘i he uike kaha’u, kae ngalo ‘iate kinautolu ko e taha ‘eni ‘o me’afua ‘e sivi ‘aki kinautolu he kakai ‘o e fonua pe ‘oku nau kei taau ke hoko atu pe ‘ikai.
Ko ‘aho kotoa ko e kiu ‘a e kakai ‘i he ngaahi pausa ‘oku kei ‘iai ‘enau penisini ke ‘utu ‘enau ngaahi me’alele. Ko e ni’ihi kuo maha ‘a e pausa ia ‘oku te’eki a’u ia ki he me’a pamu. Ko e tokolahi ‘okunau si’i ‘alu po’uli ‘o kiu he ngaahi houa lahi he ve’ehala, ke ava ‘a e pausa ‘oku nau ofi atu ki he pamu ke ‘utu.
Kuo ui ‘a e kakai ki he Palemia kenau ‘asi mai ‘o fakahoko ‘a e konifelenisi mo e kau faiongoongo, ke fakamatala ki he kakai ‘a e tu’unga ‘oku ‘iai ‘a e lolo.
“‘E fefee ‘ae fanau sivi ki he’enau ngaahi sivi fakapule’anga ‘oku lolotonga lele he taimi ‘oku ‘ikai ha ‘utu ‘a e ngaahi me’alele” ko e tohi ia ‘a e tangata’eiki ‘e taha ‘i he Facebook.
“Kataki ngaahi mitia ‘o ‘ohofi atu ‘a e kaveinga ko’eni ki he pule’anga he ‘oku faka’ofa ‘a e kakai ‘o e fonua hono pehe’i”, ko e tamai ia mei Houma mo’ene tohi he’ene peesi. Pea ‘oku lahi fau mo e ngaahi tohi kehekehe ki he Pule’anga.
Na’e ‘osi tuku atu he ongoongo ha email ki he Palemia, ke tu’utu’uni ki he ongo kautaha lolo kena update ‘a e kakai ‘o e fonua ki he tu’unga ‘oku ‘iai ‘a e lolo. He ‘oku lahi ‘a e ngaahi talanoakehekehe ‘oku ne takihala’i ‘a e kakai ‘o e fonua. ‘Oku kau ai ‘a e pehee ‘oku kei toe lahi pe penisini, ‘oku maumau ‘a e vakalolo, ko e Total pe ‘oku kei toe.
Ko e ngaahi fakamatala kotoa ia ‘oku ‘ikai‘ilo pe kofe’ia ‘oku mo’oni mo ‘ikai mo’oni. Ka ko e a’u mai ki he taimi ni mo e te’eki ‘iai ha tali mei he Palemia.
‘Oku toe fakaloloma ko e fakamatala ‘oku hangee ka nounou pea mo e tisolo. Pea ko e lolo lahitaha ia hono huu mai ko e tisolo koe’uhi ko e tisolo ki he ngaahi misini ‘uhila ‘a e Kautaha ‘Uhila ‘a Tonga. Pea ko fehu’i, pe ‘e kau mo’etau ma’u’anga ‘uhila he palopalema pea ka a’u kiai, ko’ene sio ia Pule’anga ki hono fakaanga’i lahi, He ko e mahina’aki ‘eni hono tolu ‘a e palopalema ‘a e lolo mo e te’eki fakahoko ha ngaue kiai.
Ko e palopalema ‘a e lolo ‘oku ongo lahi koe’uhi ko e ngaahi ngaue faka’aho ‘oku fiema’u kiai, ‘o kau ai ‘a e fefongo’aki mo e ngaahi naunau ngaue fakamisini ‘oku ngaue’aki ‘a e lolo.
Kaekehe kuo femou’ekina ‘a e Palemia mo’ene Kapineti he feinga ke toe foki ki Fale Alea kae tuku ‘a e kakai kenau faka’ofa pea ngali ‘e lii ai pe kinautolu kitu’a, kapau ko’enau founga fakalelepule’anga ‘eni.
