Mahanga Liahona mo Kuini Salote he koula lahi taha (33) ikuna ‘aki Liahona fe’auhi siliva lahi taha sipoti hono 99
By Tonga Fonua
Kuo lava lelei atu ‘a e Sipoti fakakolisi hono 99 ‘o e ngaahi kolisi ‘o Tongatapu pea kuo toe ikuna pe ia he ‘apiako ma’olunga Liahona ‘aki ‘a e koula ‘e 32, siliva ‘e 33 mo e polonise ‘e 27.
Ka na’e faka’ohovale’i he timi Sipoti ‘a Kuini Salote ‘a Liahona ‘ene fakaaoao he ta’u ‘aki ‘eni ‘e tolu hokohoko he sipoti fakakolisi. Ka ko e ta’u ni na’e fakatatau’i ‘e he fanau mei Kuini Salote ‘a e metali koula ‘e 32 ke na mahanga ai mo Liahona he koula lahitaha, ka na’e toki ikuna ‘e Liahona ‘ena hoko hifo ki he siliva lahi taha, na’e siliva ‘e 33 ‘a Liahona kae 20 pe ‘a Kolisi Fefine.
‘I he tui ‘a e tokolahi ko e lavame’a lahi ‘oku fakahoko ‘e Kuini Salote he ko e fanau fefine ‘ata’ataa pe, ka ko Liahona ‘oku fanau fefine mo tangata. Ko e ta’u makehe ‘eni ki Kuini Salote koe’uhi ko e fakamanatua ‘a e ta’u 100 ‘o e ako’anga. Pea na’anau teuteu lahi ke faka’ilonga’i’aki ‘aki ‘a e sipoti ‘o e ta’u ni pea kuo hoko pe ia. Na’e mahino ‘a e fakaaoao ‘a Kuini Salote he tamaiki fefine kae tautefito ki he Intermediate, Senior mo e Open girl. Ka na’e ki’i fakamamahi ki Liahona he ko e ongo star ‘o e Senior mo e Open ko e ongo star ia ‘a Liahona mei he ta’u kuo’osi pea hiki ‘enau star fefine ‘e taha ki Tonga High (Manusiu Vea) ka na’e kei lava pe ‘e Liahona ‘o fakafepaki’i.
Ko e foi koula pau na’e mei ma’u ‘aki ‘e Liahona ‘a e koula lahi taha ko e lele fuka motumotu ‘a e fanau fefine Junior. Na’anau ‘osi taki’i mai ‘a e lova pea homo ‘a e fuka ‘i he fetongi faka’osi ke mole ai ‘a e fo’i koula koia..
Kaekehe na’e feinga lahi ‘a Liahona he ta’u ni he ‘oku fakahoko mai ‘enau Kolisi Tutuku ki Tonga ni pea mahino mo e hiki ‘a e tokolahi ‘enau kau star ki he ngaahi ‘apiako kehe. Ka ‘oku nau kei malava pe ‘o pukepuke ‘a e ikuna hokohoko ‘o e fe’auhi ‘i he ta’u ‘eni ‘e faa.
‘Oku kau mo e ta’u ni ‘i he lahi taha ‘i he break ‘o e ngaahi lekooti ‘o takimu’a ai ‘a Kuini Salote mo Liahona pea faka;ohovale ‘a e ‘asi hake ‘a Tonga Side Schoolo he break lekooti lahitaha. Ko Side School ‘oku ngata pe he form 2 ka ‘oku nau tu’u kimu’a ma’u pe he ta’u kotoa ‘o fakatatau ki he ngaahi kolisi lalahi. Na’anau fika 6 kinautolu he ta’u ni ‘o laka he ngaahi kolisi tokolahi kau ai honau big sister school ko Tonga High.
Na’e kau ‘i he malie ‘o e ta’u ni ko hono lakasi he to’a Liahona he Open ‘a e star Toloa ko Titali Kolomalu ‘i he lele mita ‘e 400. Ko e fetongi tuki pe ki hono hanga ‘e Kolomalu ‘o lakasi ‘a Latu Latavao he ta’u kuo’osi he mita 200 mo e 100. Ka ‘oku ‘ikai ke toe alea ha taha ia ‘i he lele nounou ‘a e Open ko e mala’e ia ‘o Kolomalu pea mahino ‘aupito ‘ene ve’e vave ‘ene fakaaoao he ongo event mahu’inga ko’eni.
Ko e toe malie’anga ‘o e ta’u ni ko e ‘ikai toe fakaaoao ‘a Liahona kae ‘asi hake kau star mei Toloa mo ‘Atele he tamaiki tangata ke veipa malie mo e fanau mei he Funga Taua mo fakamahino ‘oku ‘ikai ko honau ‘api tukuhau ‘a e mala’e Sipoti.
Kaekehe ‘i he tafa’aki ‘o e kau poupou ‘o e ngaahi kolisi mo e fakakaekae ‘oku malie ‘aupito ‘a Teufaiva he kau fakakaekae ‘oku poto he hua mo e fakakata pea ‘oku ma’u ai ‘a e fiefia ‘a e matanga mo e fanau ako. ‘I he taimi tatau ‘oku ‘iai ‘a e ni’ihi ‘oku fu’u fakatupu’ita ‘enau fai ‘a e me’a ko e fakakaekae ‘i he facebook ‘o takitaha taukave’i hono ‘apiako pea mole ai ‘a e faka’apa’apa ki he ngaahi kolisi kehe. Pea ko e ni’ihi ‘eni ‘oku nau uesia ‘a e fiefia ‘a e laumalie ‘o e Sipoti. He kuo a’u ‘eni ia ki he lau siasi kae tuku ‘a e sipoti fakaako, ka ‘oku mahino pe lahitaha ‘o e ngaahi kolisi lalahi ‘i Tonga ni ‘oku fakalele ‘e he ngaahi siasi.
Ko e ta’u fo’ou ko e senituli ia ‘o e Sipoti Fakakolisi pea ko e ta’u lahi ia ki he ngaahi kolisi pea kuo kamata ‘a e teuteu kiai. Pea ‘oku fakahisitolia pe kohai te ne ikuna ‘a e sipoti ‘o e Senituli ‘o e Sipoti Fakakolisi. Pea ‘oku ‘iai ‘a e tui lahi ‘e ‘ikai ngata pe ‘i Tongatapu ni ka ‘e teuteu mai kiai mo Vava’u, Ha’apai pea pehee ki ‘Eua.
‘Oku mahu’inga ke fakatokanga’i ‘a e launga ‘a e kakai ‘i he mamafa ‘o e totongi ‘o e grand stand, he kuo a’u ‘o $30 pea moe kau muli ‘oku folau mai ki he Sipoti ‘enau ta’efiemalie. Pea ko hono fakamo’oni ‘o e mamafa e totongi ko e avaava ‘a e grandstand he ‘aho ‘e tolu kamata ‘o e sipoti pea toki fonu pe he ‘aho fainolo. Kae hiliange koia ko e fakamole kotoa ki he Sipoti, ‘oku fua kotoa ‘e he Tonga Health ‘i he tokoni ‘a e pule’anga ‘Aositelelia ofi he tahakilu. Ka ‘oku hoko ia ke tanaki pa’anga ai ‘a e komiti sipoti.
Ka ko e ongoongo fakamuimui ‘oku ma’u he ongoongo ni, ‘oku ‘iai ‘a e fakatonutonu ki he metali pea ‘e ngalingali fai ha kole fakamolemole mo ha toe foaki metali ki he ngaahi ‘apiako na’e totonu kenau ma’u, ka ko e fehalaaki ‘a e komiti. Pea ‘oku ‘ikai ‘ilo pe ko e fehalaaki pe ko e fai ai pe tauhi vaa, ka ‘oku ne maumau’i ‘a e laumalie totonu ‘o e sipoti.
