Tu’u veiveiua Lulutai ke hopo mo e kautaha malu’i makatu’unga he lipooti ki he maumau SAAB he 2023
Tukuaki’i na’e mei tau pe alea pule’anga maloloo ka koe huu pule’anga fo’ou mo’enau ngaahi fokotu’utu’u fo’ou.
Lolotonga hono fakavikiviki’i ‘e he kau poupou ‘o e pule’anga lolotonga ‘a e kautaha Lulutai, ‘oku lele lelei ‘i he faka’uto’uta ‘a e Minisita ki he Ngaahi Pisinisi ‘a e Pule’anga Hon. Piveni Piveni Piukala, kuo hangee mapuna hake ‘a e tukuaki’i mo e fakamatala ki he tu’unga ‘o e ngaue mo e kautaha malu’i ‘oku ne malu’i ‘a e vakapuna SAAB na’e maumau ‘i he 2023.
Ko e tukuaki’i na’e ‘ohake ‘i he fakataha ‘a e tokoni Palemia mo e kau Faiongoongo, na’e mei tau pe ‘a e alelea na’e fakahoko mo e kautaha malu’i ki he me’a na’e loto kiai ‘a e pule’anga, ka ko e huu ‘a e pule’anga fo’ou ‘o tuku kitu’a CEO mo e poate kanau hoko atu kinatolu.
Ko e alea ‘eni ki he lahi ‘o e pa’anga na’e totonu ke ma’u he kautaha Lulutai mei he maumau ‘a e vakapuna SAAB ‘i he 2023 he tau’anga ‘i he mala’e vakapuna Fau’amotu. Na’e ‘uluaki tuku mai ‘e he kautaha malu’i ‘a e lahi ‘o e pa’anga malu’i ki he maumau, ka na’e tui ‘a e CEO mo e poate motu’a ‘oku si’isi’i ‘a e pa’anga koia pe na’e toe hoko atu ‘a e alea ki ha totongi ‘oku toe lahi ange. Ka na’e hoko ‘a e liliu ‘a e pule’anga ke motu ai ‘a e alea hono ta’ofi he pule’anga lolotonga.
Kaekehe na’e fakahaa ‘e Hon. Piukala na’e ‘osi loto ‘a e kautaha malu’i ke ‘omai ‘a e $1.2 miliona ke fakalelei’i ‘aki ‘a e SAAB, ka na’e pehee he kau ‘enisinia, ko e SAAB ‘oku malava ke ma’u ‘aki pe ‘a e $2 miliona tupu. Ko hono ‘omai ‘a e $1.2 miliona ke toe fakalelei’i’aki ‘a e SAAB ‘e lahiange fakamole pea ‘oku leleiange ke fakatau ha vaka fo’ou.
Na’e ‘iai foki mo e ngaahi makatu’unga ia na’e tuku mai he kautaha malu’i na’e ‘ikai fakafiemalie pea na’e pehee ia ‘e he Minisita, ko e poini mahu’inga ‘oku tu’u’aki he Lulutai, na’e kei totongi pe he kautaha ‘a e totongi malu’i talu mei he 2023 ‘o a’u mai ki he ‘aho ni. Pea kapau tenau kalo pea ko e ‘alu ia ki fale hopo.
Ka ‘oku malie, ‘i he ‘aho Tu’apulelulu ai pe na’e toki ‘ilo he ongoongo ni na’e lele ‘a e konifelenisi ‘a e MOI pea mo e kau Faiongoongo ‘i he lipooti ki he maumua ‘a e SAAB. Ko e ola ‘o e lipooti na’e pehee ai ‘e Hon. Piukala, “ ‘oku ne ongo’i kete kovi ke hopo ko e kautaha malu’i makatu’unga he ola ‘o e lipooti”. Ka na’e fehu’ia ai ‘e Katalina Tohi mei he FM 87.5, ko e fakamatala ‘oku ne ma’u na’e mei tau ‘a e alea ka ko hono tuku kitu’a ‘o e poate. Ka na’e faka’ikai’i mamafa ‘e he Minisita.
Kaekehe ko e tu’u leva ko’eni, ‘oku ‘ikai mahino pe koeha ‘a e tu’unga ‘e ‘iai ‘a e fetukuaki he vaha’a ‘o e kautaha malu’i mo e Lulutai. Pea ‘oku ‘ikai ke mahino pe koeha ‘o e mo’oni ki he tu’unga ‘o e alea na’e fakahoko he CEO mo e poate motu’a, kae pehee ki he alea ‘oku lolotonga fakahoko ‘e he pule’anga lolotonga.
‘I he taimi tatau kuo fakahaa ‘e Piukala, kuo ‘iai ‘a e ngaahi kautaha ‘oku nau fiema’u kenau fakalele ‘a e Lulutai. Ka ‘oku nau fakatau sea pe, ka ‘oku te’eki mahino mo e tafa’aki ki hano foaki ki he kautaha pau ke ne fakalele kakato ‘a e fepuna’aki fakalotofonua.
