Tautea malu’i mo ngaue kominiuti e Nanny ki he toho kakaa’i pa’anga ‘a Mr. and Hon Frederica Filipe.
Na’e tautea toloi malu’i angalelei ‘a e Faka’iloa ko Amy Leger ‘e Hon. Justice Tupou KC, he ‘aho 25 Sune ki he ngaahi tikite fakakatoa ‘a 4 ki he ma’u ha pa’anga ‘i he founga kaka.
Na’e tu’utu’uni ke ne ngaue popula mahina ‘e 18 ki he ngaahi tikite kotoa ‘e 4 na’e faka’ilo kiai, ka koe’uhi ko’ene ‘uluaki faihia pea ngaue fakataha mo e kau Polisi pea ‘osi totongi mo e konga ‘o e pa’anga hili ‘ene kole fakamolemole. Na’e tautea toloi kakato ai ‘a e mahina ‘e 18 he ta’u ‘e 2 ‘i he ngaahi makatu’unga.
He ‘ikai ke ne toe fakahoko ha hia lolotonga ‘a e ta’u ‘e ua. Kuopau ke ne taliui ki he ‘Ofisa Malu’i Angalelei pea ke ne kau ki ha ako fekau’aki mo e mo’ui pea ke ne toe ngaue’i mo e 40 hrs ki he komiuniti. Ka ‘ikai ke ne faipau ki he ngaahi makatu’unga ‘o e malu’i pea ‘e puke ke ne ngaue’i ‘a e mahina ‘e 18 ‘i Tolitoli.
Fakatatau mo e hia, na’e toho ta’efakalao he Faka’iloa ha pa’anga fakakatoa ‘e $10,000.00 mei he ‘akauni ‘o e kautaha ko e World Resources Company Ltd, ‘a Mr Filipe mo Hon Frederica Filipe. ‘I he ‘aho 25 ‘Aoskosi 2023 na’ane toho ai $3000.00, ko e ‘aho 20 Sepitema na’ane toho ‘a e $4000.00 pea toho faka’osi ‘a e $3000.00 he ‘aho 5 ‘Okatopa 2023. Na’e malava ‘eni he na’e ‘osi fakamo’oni ‘a Hon. Frederica he ngaahi sieke pea ma’u ia ‘e he Faka’iloa ‘o fakafonu ‘a e sieke ‘o toho. Na’e launga’i ‘o puke he kau Polisi pea tali halaia ki he ngaahi tukuaki’i he ‘aho 5 ‘Epeleli 2025 pea hilifaki tautea he ‘aho 25 Sune 2025.
Ko e Faka’iloa na’e ngaue mo’ene fa’ee ki he hou’eiki ko e nanny ki he foha ‘o e ongomatu’a. Kae fakatatau mo e lipooti mei he ‘Ofisa Malu’i Angalelei, ko e ta’u 35 ‘eni ‘o e Faka’iloa ko e lahitaha ‘o e fanau ‘e toko 8. Kuo folau ‘a e tamai ki ‘Aositelelia ‘o toe mali ai kae tauhi pe he fa’ee ‘a e fanau kotoa kau ai mo e Faka’iloa. Ko’ene ngaue ko hono tokanga’i ‘ene fa’eee hoku mahamahaki pea pehee ki he toenga iiki hifo ai. Pea ko e ‘uhinga pe ‘ene fakahoko ‘a e hia ke tokanga’i ‘aki hono famili.
‘Oku kau ‘eni he palopalema lahi ‘i Tonga ni, ‘a e folau ha taha ‘o e ongomatu’a ki muli ‘o ‘ikai toe foki mai, kae palopalema ‘a e mali mo e fanau ‘i Tonga ni. ‘Oku toe fakalalahi ‘ene hoko ‘i he polokalama Ngaue Fakafaha’i Ta’u, he ‘oku faingofua ‘a e folau pea ma’u mo e pa’anga pea ngalo ‘a e ngaahi palani kimu’a he folau ko e taumu’a ma’ae famili.
