Tautea ngaue popula ta’u 8 ki he tohotoho’i tokoua hono mali kei ta’u 17 iku fa’ele
Na’e tautea ‘e he ‘Eiki Fakamaau Lahi Bishop KC he ‘aho 28 Siulai 2025 ‘a e Faka’iloa ke ne ngaue popula ki he ta’u ‘e 8, kae tautea toloi malu’i ‘a e ta’u ‘e ua fakamuimui.
Ko e hilifaki ‘eni ‘a e tautea ‘o e Faka’iloa, hili ‘ene tali halaia he ‘aho 23 Sune 2025 ki he faka’ilo ko e tohotoho. Ka kuo tu’utu’uni ‘a e Fakamaau’anga ke ‘oua na’a tuku atu ha fa’ahinga fakamatala ke ‘ilo ai ‘a e Mamahi koe’uhi ko’ene kei ta’u si’i.
‘I he mahina ko Novema ta’u kuo ‘osi na’e foki atu ai ‘a e Faka’iloa mei he inukava ‘oku mohe mai ‘a e Mamahi, ka ko e tokoua si’isi’i hono mali ‘oku kei ta’u 17. Na’ane foki atu ‘oku mohe ‘a e Mamahi ‘o fakahoko kiai ‘a e hia kae mate mohe ‘a e mali. Na’ane toe fakahoko pe me’a tatau ‘i he ‘aho 24 Nov 2024, ka na’e ma’u ‘e hono uaifi, ka na’e tukuaki’i he Faka’iloa ‘a e Mamahi pea iku ke ne toe vete hia koia na’ane fakahoko ‘a e hia. Na’e toe fakahaa ‘e he Mamahi ‘a e me’a na’e hoko ki he’ene fa’ee.
Na’e ‘ave ‘a e mamahi ‘o fakahoko hono sivi fakafalemahaki ‘o fakapapau’i he lipooti ko e ‘uluaki hoko ia ‘a e feohi fakasino kiate ia.
‘I he lipooti ‘a e ‘Ofisa malu’i Angalelei, ‘oku ‘ikai ke haa mai mei he Faka’iloa ia ha ongo’i fakatomala mei he hia na’ane fakahoko, ka ‘oku tui pe ia na’e fakahoko pe feohi fakasino ‘i he felotoi mo e Mamahi.
Na’e fale’i ‘e he ‘Eiki Fakamaau Lahi, ke liliu ‘ene tali ‘o tonuhia ke fakatatau mo e lipooti ‘a e ‘Ofisa Malu’i Angalelei. Ka na’e ‘ikai lotolahi fe’unga ‘a e Faka’iloa ke tali tonuhia. Kapau na’e tali tonuhia pea lele ‘a e hopo ‘o fakahalaia’i he Fakamaau’anga, ‘e toe loloange hono ta’u ngaue popula.
Kaekehe na’e toe ‘ohake he Fakamaau’anga, na’e fa’ele ‘a e Mamahi he konga kimu’a ‘o e mahina ni, ka ‘oku ‘ikai ha tokoni ‘e taha ‘a e Faka’iloa ki he Mamahi mo e pepee. Ka ‘oku loto ‘a e ongomatu’a ‘a e Mamahi kena tauhi ‘a e pepee kae foki ‘a e mamahi ‘o faka’osi ‘ene ako.
Ko e ngaahi hopo ‘oku ta’ofi ke tuku kitu’a ‘a e hingoa ‘o e Mamahi mo e Faka’iloa mo ha fakamatala ke ‘ilo ai ‘a e Mamahi, ‘oku ‘ilo pe he kau faiongoongo ki he hingoa mo e feitu’u mo e tokotaha Mamahi he lolotonga ‘a e lele ‘a e hopo. Ka ‘oku malu’i ia ko e tu’utu’uni ‘a e Fakamaau’anga.
