Tautea ngaue popula Matapule Siaina ki hono kakaa’i fakapa’anga ‘a e kau Siaina fakalele Pisinisi toko 5 mei Vava’u
Na’e tautea ngaue popula ‘e Fakamaau Lahi Petunia Tupou, ‘a e matapule Siaina ko Yu Xi Di ki he tikite kehekehe ‘e nima ‘i he ‘aho 26 Sune 2025, ‘i he Fakamaau’anga Lahi ‘i loto Nuku’alofa. Na’e tautea ke ne ngaue popula ki he ta’u ‘e tolu mahina ‘e ua, kae toloi malu’i ‘a e ta’u ‘e ua fakamuimui. Ko e tautea ‘eni ‘a e Faka’iloa ki he’ene kakaa’i fakapa’anga ‘a e kau Siaina fakalele pisinisi falekoloa ‘i Vava’u ‘o fe’unga mo e $68,977.
Fakatatau mo e puipuitu’a ‘o e hopo ko e Faka’iloa ko e t a’u ‘eni ‘e 15 ‘ene nofo Tonga ni he visa ngaue pea kuo fokotu’u ‘ene falekoloa mo e falekai mo hono mali. Na’ane fetu’utaki ki he ongo Siaina ‘i Vava’u he konga kimui 2023 ‘oku na fakalele falekoloa, ‘onau alea ke ‘omai ‘a e seniti ka ne hanga ‘o huu atu ‘enau koloa mei Tonga ni. Na’e toe folau foki ‘a e Faka’iloa ki Vava’u ‘o fakaloto’i mo e toko tolu kehe ‘onau fakahoko ‘a e me’atatau ko e ‘oange ‘a e pa’anga ka ne fakafolau mai ‘enau koloa mei Tongatapu ni.
Na’e fe’unga kotoa ‘a e pa’anga na’e ‘oange ki he Faka’iloa mo e $68,977.00 pea na’e anga pehe ni hono vahevahe.
Kong Hao Lin $20,000.00, Zhong Fa Liu $14,000.00, Shu Jie You $11,950.00, Zu Xian Shi $13,395.00 mo Ming Hong Mo ko e $9632.00
Kaekehe na’e a’u ki he taimi ke a’u ange ai ‘a e uta ki Vava’u ‘oku ‘ikai pea launga fakataha leva ‘a e kau Mamahi ki he kau Polisi ‘i Vava’u he ‘aho 27 Fepueli 2025 ‘o fakahoko ai ngaue ki he Faka’iloa. Pea fakatatau mo e fakatamala, na’ane ngaue’aki ‘eia ‘a e pa’anga ‘a e kau Mamahi ki hono fakakakato ‘ene pisinisi na’e fokotu’u.
‘Oku malie ‘ene haa ke hilifaki hono tautea, kuo ‘alu atu ia mo’ene fakatonulea ko Penioni Lokotui ‘o pehee na’e ‘ikai kene ‘ilo na’e tali halaia ‘i he’ene fuofua haa he Fakamaau’anga mo’ene fakafofonga lao. Ka na’e huke hake lekooti ‘o mahino na’e ‘iai pe fakatonu lea he ‘aho koia pea na’e fakamahino pe kiai ‘ene tali halaia. Ka na’e toe fokotu’u atu he’ene fakatonu lea ‘oku ‘iai ‘a e mea fo’ou, ko e femahino’aki ‘a e Faka’iloa mo e kau Mamahi ke ne totongi fakafoki ‘enau pa’anga pea na’e ‘osi totongi ‘a e konga. Ka na’e ‘ikai pe fe’unga ke hao mei he tautea ngaue popula ‘a e Faka’iloa.
Ko e taha ia ‘o e palopalema lahi ‘a e kau Siaina pea neongo ‘enau malohi fakapa’anga, ka ‘oku nau toe fesiosiofaki pe ‘enau ngaue pe kohai ‘e fakalakalaka taha ‘ene pisinisi mo ofi taha ki he fu’u ‘ulu’ifeke ‘i Tonga ni pea a’u pe kenau kee mo e ngaahi me’a kehe ‘oku toe kovi ange.
