Na’e mole pule’anga ‘o Dr. ‘Aisake Eke ko e fie Palemia ‘a ‘Eua 11 mo e poupou ‘a Piveni: Mateni
Neongo kuo ‘osi atu ‘a e fili Palemia ‘a Tonga, ka ‘oku toki ‘osi mai ‘a e ngaahi fakamatala ki he ngaahi me’a na’e hoko he fakapo’uli ‘o makatu’unga ai ‘a e ma’u ‘e Lord Fakafanua ‘a e fili Palemia. Pea ‘oku mahu’inga ke fai hono lave’i he ‘e pau ke muimui mai hono ngaahi ola ‘amui.
‘I he fakama’ala’ala ‘a Mateni Tapueluelu hono faka’eke’eke ia ‘e Setita, ko hono tukuaki’i ia ki he palopalema ‘o e mole ‘o e pule’anga ‘oku hala pea ‘oku ne fie tuku mai ‘ene fakama’ala’ala.
“Ko e ‘osi ‘a e fili Fale Alea na’e ui ‘e he Palemia ‘a e fakataha ki hono ‘ofisi pea na’e kau kiai ‘a e toko 8 kau kiai mo e kau huu fo’ou. Ka na’e ‘ikai kau mai kiai ‘a Taniela Fusimalohi mo Piveni Piukala, he na’e ‘iai ‘a e fakamatala ‘oku na feinga ke Palemia ‘a Taniela Fusimalohi. Ka na’ana feinga holo ki he kau memipa fili pea na’e ‘ikai ke fu’u manakoa.
Ko e ‘aho na’e ‘uluaki fakahoko ai ‘a e fakataha ‘a Dr. Eke, na’e tali mo e fokotu’u ke ‘oua fakakau mai ‘a Fusimalohi mo Piukala he te na hoko ko e palopalema ki he feinga ‘a Eke. Ka na’e mahino kiate kinaua ‘oku ‘ikai poupoua ‘ena feinga ke Palemia ‘a Fusimalohi, na’ana foki mai ‘o kole kena toe foki mai, ka na’e kei tu’u pe ‘a e tu’utu’uni kena nofo pe ‘itu’a. Na’e ‘ita heni ‘a e ongo tama ‘ona fakaloto’i ‘a e ni’ihi kenau heke kia Fakafanua. Pea ko e founga ‘eni na’e mole ai ‘a e pule’anga meia Dr. Eke”, ko Mateni ia.
Kaekehe na’e toe fakamahino ‘e Mateni, “ Ko e loto mamahi ‘a Piukala ‘i he tu’utu’uni koia ke fakamaloloo’i fakataimi ia mei hono lakanga Minisita pea ‘oku ne ha’u pe mo e fo’i laumalie ‘ita koia ki he fili Palemia.”
‘I he taimi tatau na’e toe lave ‘a Mateni ki he palani Palemia ‘a Fusimalohi na’e palani pe ia mei Sepitema. Na’e fakahoko ‘a e fakataha mo e pule’anga Siaina pea na’ane fakaafe’i ia mo e ni’ihi kau Minisita kiai. Na’e ‘ikai fakataumu’a ia ki he polokalama ka na’e fakataumu’a ia ki he tufa tangike, ka na’ane ta’ofi ‘a e tufa lolotonga ‘a e lele ‘a e kemipeini fili Fale Alea. Pea ko e taimi ia ‘ene fakatokanga’i ‘a e feinga ‘a Fusimalohi.
Pea ko e me’a tatau pe ‘i he teu fili Palemia hili ‘a e VONC, na’e feinga holo kinaua ke Palemia ‘a Fusimalohi kae tuku ‘a ‘Aisake na’ane fatu ‘a e pepa VONC.
‘Oku mahu’inga ke mea’i he kakai ‘o e fonua ‘a e ngaahi mafulinga lolotonga ‘a e teu fili Palemia, he ‘e ‘iai ‘a e ngaahi me’a ‘e hoko he lele atu ko’eni pea ‘e faingofua hono ‘analaiso mei he ngaahi fakamatala mahu’inga ko’eni.
‘Oku tukuaki’i ‘e Mateni ‘a Fusimalohi mo Piukala ko e ongo tangata afungi mo ngutu fakamatala pea ‘oku na hoko ko e palopalema lahi ki he ngaue. Pea ko’ena heke ki he tafa’aki ‘a Fakafanua, te na kei fakahoko pe me’a tatau pea ‘oku ‘ikai fiema’u ha kakai pehee ke ngaue fakataha moia.
