Na’e faka’ohovale ki he kakai tokolahi ‘a e ‘uhinga hono hiki ‘a e lolo, kae hili ange koia na’e totonu ke toki hiki he mahina ko Mee ‘o hangee ko hono toutou tala he fakataha mo e Palemia. Ka na’e faka’ohovale hono talaki he  lau ‘aho pe kimu’a pea hiki ‘a e lolo he ‘aho ‘uluaki ‘Epeleli.      

Na’e fakama’ala’ala ‘e he CEO ki he Fefakatau’aki Mrs Tu’ihalamaka, ko e ‘uhinga ‘a e hiki vave ‘o e lolo ko e kole ‘a e ongo kautaha lolo ke hiki, ke anga kiai ‘a e kakai ke a’u ki he taimi totonu ke hiki ai ‘oku ‘osi anga kiai ‘a e kakai pea ‘ikai fu’u ongosia. Pea ‘i he ‘uhinga koia na’e tali he pule’anga ke fakahoko leva ‘a e hiki. Ka ‘oku ‘iai ‘a e ngaahi me’a ‘oku fu’u fiema’u ke fakamahino ‘e he pule’anga ‘a e tu’unga fakalao ‘o e fo’i ngaue ko’eni.    

 Ko e fehu’i ‘uluaki pe ‘oku fakalao nai ke tanaki ‘e he ongo kautaha ha pa’anga ‘oku te’eki totonu kenau ma’u? ‘Oku ‘uhinga ‘eni na’e totonu kenau toki tanaki ‘a e pa’anga ko’eni he mahina ko Mee, ka kuonau tanaki ia he taimi ni.  

‘Ihe taimi tatau ‘oku ‘iai ‘ae founga ngaue ‘oku ngaue’aki ka ko’ene toki hoko ‘eni ‘i Tonga ni, ke ngaue’aki ‘a e founga ngaue ni. Ka ‘oku ‘iai pe mo e ngaahi me’a ‘oku totonu ke fakamahino’i ki he kakai ‘o e fonua.

Ko hono ua ‘o e fehu’i ki he pule’anga pe ko e ‘uhinga totonu ’eni pe ‘ikai. Pe ko’enau feinga ke tanaki ha pa’anga ke lava he kautaha lolo ‘o fua ‘aki ‘enau fakamole lahi ki hono fakatau mai ‘enau lolo ‘i he totongi mamafa ‘oku ‘iai he taimi ni.