Fakapulipuli fakamatala ki he hopo ‘a Kolokihakaufisi mo e kilo 15 na’e ma’u he Pangike Pule
Kuo tu’utu’uni ‘a e Fakamaau’anga Lahi ‘o Tonga ke fakapulipuli ‘a e fakamatala ki he hopo ‘a e Faka’iloa ko Nonu Kolokihakaufisi, na’e ma’u kiai ‘i he ‘ofisi ‘o e Pangike Pule mo honau ‘api, ‘a e kilo ‘e 15kg ‘o e faito’o konatapu ‘oku ‘iloa ko e ice (meth).
Koe’uhi na’e tukuange mai ‘e he Kakalu ‘o Tonga ‘a e ongoongo koia kuo tautea ta’u 17 ‘a Kolokihakaufisi ‘i he faka’osinga ‘o e uike, na’e ‘iai leva ‘a e ‘amanaki ‘e tukuange mai ‘e he Fakamaau’anga ‘a e tu’utu’uni ‘o e hopo ki he kau Faiongoongo ‘i he Monite ‘o e uike ni. Ka na’e hili ‘a e Monite na’e te’eki ma’u ha email mei he ‘ofisi ‘o e Fakamaau’anga Lahi. Na’e lava atu leva ‘a e ongoongo ni ki he ‘ofisi ‘i he pongipongi Tusite ke vakai ha tatau ‘o e tu’utu’uni hopo.
Ka na’e faka’ohovale ki he ongoongo ni ‘a e foki mai ‘a e tokotaha ngaue, ‘o fakahaa mai ko e tu’utu’uni hopo ‘oku ‘ikai ngofua ki he ngaahi kautaha ongoongo (confidential). Na’e toe fakapapau’i atu ‘e he ongoongo ni pea fakamahino he tokotaha ngaue ‘oku tapui ke tuku kitu’a ‘a e fakamatala koia.
Ko e lolotonga ‘a e talanga ‘a e kakai ‘o e fonua he fuoloa ‘a e hopo ni he ko e talu mei he ta’u 2023 pea kuo lava ‘a e ta’u ‘e taha, kuo ‘iai mo e fakamatala falala’anga ko e 15kg ko e 4.9kg pe na’e a’u ki he Fakamaau’anga kae puli ‘a e toenga ia. Pea ‘oku fehu’ia lahi ‘a e tu’utu’uni ke ngaue popula ki he mate ‘a e ni’ihi kae ta’u pe 17 ‘a Nonu mo e fu’u 15kg.
Kae fakatatau mo e tu’u ‘a e lao ki he Faito’o konatapu, ko hono ma’u ha taha ‘oku ne huu mai (import) ha faito’o konatapu fe’unga mo e .28g ‘oku ngaue popula ki he mate. ‘Oku ‘uhinga ‘eni ki he ni’ihi ‘oku ma’u henau ngaahi puha uta pe ko ha fa’ahinga uta mei muli pea ‘oku fakataumu’a ke fakasi’isi’i hono huu mai ‘o e faito’o konatapu.
Ko e lao leva ‘o taha, ka ma’u ki ha taha ha 5kg pe lahi ange ko hono tautea ko e ngaue popula ki he mate. Pea ko e ‘uhinga ia na’e hao ai ‘a Nonu na’e ‘ikai ke ne huu mai ka na’e ma’u kiai. Ka ‘oku faka’ohovale ko e holo lahi ‘o 4.9kg ke ‘iai lalo pe he 5kg na’a ngaue popula ki he mate.
Ko e ngaahi fehu’i mahu’inga ke tali he pule’anga, pe kofe’ia leva ‘a e toenga ‘o e faito’o kongatapu. Koeha ‘a e ngaahi ngaue ‘oku ‘ilo he kau Polisi ‘oku makatu’unga ai ‘enau kole ke ‘oua ‘e tuku ‘a e fakamatala kitu’a. Koeha ‘ene mahu’inga pe fakatu’utamaki ki he fonua ‘oku malu’i ai ‘a e fakamatala ‘o e hopo. ‘Oku ‘iai mo e sio ki ha ngaahi fakamatala ki ha kakai mahu’inga ‘oku felave’i mo e hia ni, ka ‘oku fiema’u ke malu ‘a e fakamatala ko’euhi ko e hoko atu ‘a e ngaue ‘a e kau Polisi.
Kaekehe ko e Minisita Polisi ko e tangata ‘oku ‘ata kitu’a ‘ene ngaue he taimi lahi, ka ‘oku ‘ikai fa’a tatali ke fakahoko ha konifelenisi ke ‘eke kiai ‘a e kaveinga ni.
