Mo’ua Fakafofonga Niua 17 he Fakamaau’anga Polisi ko e taa fefine ma’ama’a.
Na’e tali halaia ‘a e Fakafofonga Niua 17 Vatai Hui ‘i he Fakamaau’anga Polisi ko e taa fefine. Na’ane tali halaia pe ki he tikite na’e tukuaki’i ia kiai pea fokotu’u ‘e he Talatalaaki ke totongi ‘e he Faka’iloa ‘a e $500 ki he Mamahi, ka na’e tu’utu’uni ‘a e Fakamaau Polisi Pule, Loupua Pahulu Kuli ke totongi ‘e he Faka’iloa ‘a e $250 pea ke totongi pe he taimi koia.
Na’e tali lelei ‘e he Mamahi ‘a e kole fakamolemole ‘a e Faka’iloa pea mo e tautea kuo hilifaki ‘e he Fakamaau’anga Polisi, ke tapuni ai pe ‘a e hopo.
Fakatatau ki he puipui tu’a ‘o e me’a na’e hoko, na’e fakahoko ha ki’i fakataha’anga na’e ‘iai ‘a e Faka’iloa mo e Mamahi pea hoko ai ha ki’i ta’efemahino’aki ‘o teke’i ‘e he Faka’iloa ‘a e Mamahi. Na’e loto mamahi‘a e Mamahi ‘o fakahoko ai ‘a e faka’ilo ko’ene ala ange kiai neongo na’e ‘ikai ko ha teke’i lahi ke hoko ai ha fakatamaki.
Na’e akonaki ‘a e Fakamaau ki he Faka’iloa mo e Mamahi ke ‘ai ‘ena nofo ke lelei he ko’ena lele loua mai pe mei he motu mama’o pea ‘oku ‘ikai ko ha kakai anga pehee ‘a e Vai ko Niutoua mo e Funga Maka Mimisi.
Kaekehe na’e kole fakamolemole pe ‘a e Faka’iloa ko e ki’i loa pe na’e too fakatu’upakee, ka ‘oku ne ongo’i fakatomala lahi.
‘Oku ‘iai mo e hopo ‘a e Faka’iloa ‘oku ‘i he Fakamaau’anga Lahi ki he hia ‘oku toe mamafa Tukituki ange ka ‘oku te’eki mahino ‘ e taimi ke fakahoko ai.
Ko e fu’u taimi mahu’inga ‘eni ki he kau Fakafofonga Fale Alea lolotonga mo e kau Kanititeiti, koe’uhi ko e ofi ‘a e fili lahi ki he ‘aho 20 ‘o Novema pea ‘oku mahu’inga kenau faka’ehi’ehi mei hono ‘uli’i honau ngaahihingoa ki he kakai fili. ‘Oku toe kovi ange kapau ‘oku taketi’i kinautolu he kau poupou ‘oha kanititeiti mei he vahenga fili tatau ke makatu’unga ha’ane fili ‘o ‘ikai lava ke fili Fale alea. Pea kenau tokanga ‘aupito ki he fanga ki’i fehalaaki pehee pea pehee ki ha foaki tenau fakahoko ke tukuaki’i ai kinautolu ki ha totongi fufuu.
Ko e kau Fakafofonga mo e kau Kanititeiti ‘oku ma’u kava malohi ‘oku toe fu’u lavea ngofua ange kinautolu ki ha hoko ha palopalema he ngaue ‘a e ‘olokaholo, ke uesia ia ‘enau kemipeini. He ko’ene uesia pe ‘o ‘ikai huu ki loto ko’ene ‘osi ia, ka toki hoko mai ha palopalema kuo ‘i loto Fale Alea ‘e lava ‘o fute takai holo ke hao, ka ko’ene too pe he fili Fale Alea ko’ene ‘osi ‘aupito ia.
