Kei fakaongoongo kohai ‘e tala ‘e Nonu he kau tila faito’o konatapu, hili fakasi’isi’i hono tautea
‘Oku malie ‘a e tali ‘a e Minisita Polisi ki he fehu’i pe koeha ‘a e tu’unga fakamuimui ‘o e ngaue ‘a e Potunague Polisi mo e va’a ki he faito’o konatapu, ke ‘ilo kiai ‘a e kakai ‘o e fonua.
Pea ‘oku tonu pe ‘a e vavalo ‘a e ongoongo ni ki he mama mai ‘a e fakamatala na’e tapui ke tuku kitu’a ‘a e hopo fakaikiiki ‘a e hopo ‘a Nonu Kolokihakaufisi, ‘oku fakasi’isi’i hono tautea ‘o hao mei he ngaue popula ki he mate kae ngaue ta’u 17, hiliange koia na’e ma’u kiai ‘a e faito’o kalasi A (meth) 15kg.
Ko e tu’u ‘a e lao ka ma’u kita mo ha faito’o konatapu he kalasi ko’eni ‘oku a’u ki he 5kg pea ko e tautea ko e ngaue popula ki he mate mo e mo’ua pa’anga pe ko e fakatou’osi.
Pea na’e ‘iai pe ‘a e mahamahalo ko e tukunga ia ‘oku ‘iai ‘a e hoponi ke holoki ‘a e faka’ilo mei he lahi totonu ‘o e 15kg kae lava ‘o ngaue pe ha taimi pau pea ‘ataa, ka kuopau ke ‘iai ha makatu’unga ‘o hangee ko ha’ane tala ha ni’ihi kehe pea hoko ko e fakamo’oni ka lele ha hopo.
Kaekehe ko e me’a pe ia ‘oku hoko ‘o hangee ko e tali ‘a Hon. Piukala ki he kau faiongoongo, ko e femahino’aki mo e Faka’iloa ke fakasi’isi’i hono tautea ka ne fakamatala ki he ni’ihi kehe ‘oku kau he faihia faito’o konatapu. Pea na’e pehee ko e mahina ko Sepitema te ne tuku mai ai ‘a e fakamatala ki he kau Polisi, ka kuo ‘osi ‘a Sepitema pea ‘oku ne fakaongoongo koeha ha lipooti mei he kau Polisi ki he fengaue’aki ko’eni pea mo e Faka’iloa.
‘Oku mahu’inga ‘aupito ‘a e fengaue’aki pehe ni mo e kau faihia, he ko e lahi ‘o e ni’ihi kuo puke ko e tala pe ‘i he kau faihia faito’o konatapu. Ka ‘i he taimi tatau ‘oku totonu ke mateuteu pe mo e kau Polisi koe’uhi ko ha palopalema ‘e hoko ‘o ‘ikai hoko ai ‘a e aleapau pehe ni, ‘o hangee ko ha loi pe ko ha takitaha’i he Faka’iloa ‘a e kau Polisi. Pea ‘osi ange ‘a e fo’i ngaue kuo ‘ikai hano ola, ke puke ha ni’ihi pe ko e hao ha ni’ihi ka a’u ki he Fakamaa’anga.
Ko e hopo ‘oku lolotonga lele ‘i he Fakamaau’anga, ‘oku natula tatau ka ko e palopalema ‘oku haa mai ‘oku toe mole ai mo e faito’o konatapu lahi pea ‘oku fehu’ia ‘a e founga ngaue ko’eni. ‘Aia ko hono ngaue’aki ‘a e kau faihia pe ke ne tauhelei’i ha kau faihia ‘oku te’eki ai ke puke ke lava ‘o puke he kau Polisi.
Ko e tokotaha he kau Faka’iloa na’e ma’u he’ene puha mei ‘Amelika ‘a e faito’o konatapu 2kg, kuone loto ke fakamatala pea fakamo’oni ma’ae kau Polisi kae ‘oua ‘e faka’ilo pe ko e fakasi’isi’i tautea.
Na’e ‘iai mo e ngaahi fakamatala falala’anga ‘i he tuai ‘a e fakahoko ‘o e hopo, he na’e fiema’u ‘e Nonu ke fakapapau’i ‘e malu ‘ene mo’ui kae toki lava ke fakamatala. Kuo lahi pe ngaahi fakamatala ki he mate ha ni’ihi ko e ngaue pe ‘a e fa’ahinga faihia ko’eni. Ko e ‘aho ho lea ko e ‘aho ia ho mate.
Ko e lahi ‘o e faito’o konatapu na’e ma’u mo Nonu ko e faito’o lahi faka’ulia pea ‘oku mahino ko e kakai ‘oku nau fengaue’aki ‘oku ofi kinautolu he kakai ‘oku ui ko e kau ‘ulu’ifeke. Ka ko e lotolahi ‘a Nonu ke fakamatala, ‘oku ne ‘osi ‘ilo lelei ‘a e ngaahi me’a ‘e hoko kiai ka ‘oku ‘iai ‘a e ‘amanaki lelei ki he fengaue’aki mo e kau Polisi ‘e ‘iai ha ola lelei.
Ko e taimi ‘eni kuo kehe, he ko e faihia ‘a e kau faito’o konatapu he ta’u ‘e 20 mo 30 kuo’osi na’e fakafufu holo he vao. Ko e ‘aho ni ‘oku ‘ikai toe pehee ia ‘oku ‘ai pe ia he mata ‘o e kau Polisi mo e kau ma’u mafai pea ko e fehu’i pe koeha kuo loto lahi pehee ai ‘a e kau tila faito’o konatapu ke ‘oua toe fakafufuu ‘enau faihia.
