Ui kau fakafepaki kia Trump ke fakahoko tatau lao Fefononga’aki (Immigration) ki hono famili tonu
Ko e talanoa malie taha ‘o e taimi ni ‘i he ngaahi kautaha ongoongo lalahi ‘o ‘Amelika, ko e hangee ka musia pe ‘a e Palesiteni ‘o ‘Amelika he’ene polokalama fakafoki ‘o e kau nofo ta’efakalao he fonua.
Kuo ui ‘a e fa’ahi Temokalati mo e kakai ‘oku ‘ikai tui tatau mo Trump, ke fakahoko ‘a e lao ke tatau ki he tokotaha kotoa, kau ai hono famili tonu. Ko e ‘uhinga ‘eni ki he mali ‘o e Palesiteni Melania Trump, he kuo hakule hake ‘ene lekooti pepa tangata’i fonua ‘oku kau ia he ni’ihi ‘oku fihia ai.
Ko e tu’utu’uni na’e fakahoko he pule’anga ‘o Trump, ko ha taha na’e fa’ele’i ‘i ‘Amelika lolotonga ‘oku nofo ta’efakalao ‘ene ongomatu’a pe, ko ha taha na’e fa’ele’i lolotonga ‘oku ma’u visa fakataimi ‘a e fa’ee ‘oku lau ia ‘oku ta’efakalao. Pea vakai’i mo e tokolahi ‘a e founga na’e ma’u ai ‘enau visa pe na’e fakalao pe ‘ikai, kau ai hano ma’u ka nake huu ta’efakalao ki he fonua. Ka ko e tu’u ‘a e Konisitutone 14 Amendment, ko e taha pe na’e fa’ele’i ‘i ‘Amelika ‘oku hoko ia ko e tangata’ifonua, ‘a ‘eni kuo liliu mo fai ai longoa’a.
Na’e fai leva hono fehu’ia ‘a e hoa ‘o e Palesiteni, Melania Trump, he na’e ha’u ‘i he 1996 ki ‘Amelika mei Slovenia he visa folau ‘eve’eva. Na’e kole ai ‘ene visa ngaue ‘o maheni mo Palesiteni Trump ‘ona mali ‘i he 2005 pea fanau’i hona foha ko Barron Trump. ‘I he 2001 na’e ma’u ai ‘a e visa ‘a Melania ‘oku ‘iloa ko e Eistein Visa pe EB-1, ka ‘oku fehu’ia ‘ene ma’u ‘a e visa makehe ko’eni, he ko e kalasi visa ‘eni ki he kakai lavame’a makehe fakavahaapule’anga, ‘o hangee ko ha tama sipoti ‘iloa ma’u metali koula he ‘Olimipiki, ko ha taha ako mataotao ‘iloa ha fa’ahinga mala’e. Ka ko Melania neongo ko e fefine motolo, ka na’e ‘ikai ke kau ia he kau motolo ‘iloa hangee ko Tyra Bank, Cindy Crawford mo Naomi Campell. Pea ‘i he’ene pehee ‘oku taimi ke tipota’i ‘a Melanie ki hono fonua ‘o tatau ‘a e lao ki he tokotaha kotoa.
Na’e ‘iai mo e teke ke fakafoki mo’ene fanau mo hono ngaahi mali kotoa. Na’e ‘uluaki mali mo Ivana Trump he 1977 ko e ha’u mei Czechoslovakia ‘o ‘iai ‘ena toko 3. Na’ana vete ‘i he 1993 pea mali mo hono mali ua ko Marla Maples Trump ko e fefine motolo ‘o ‘iai ‘enau ta’ahine ko Tiffany he 1994 pea to e mali mo Melanie Trump ‘i he 2005 ‘o ‘iai hona foha ko Barron.
‘Oku tui leva ‘a e kau fakafepaki ‘oku totonu ke fakafoki mo e fanau he na’e ha’u ‘enau ngaahi fa’ee he visa fakataimi ki ‘Amelika, ka ‘oku pehee mei he Fakamaau’anga, neongo ko’enau ngaahi fa’ee ko e ha’u ki ‘Amelika, ka ko’enau tamai ko Trump ko e tangata’i fonua ‘Amelika, ‘oku ‘otometiki pe ‘a e tangata’i fonua ‘Amelika ‘a e fanau. Ka ‘oku ‘ikai tuku ai hono ‘ohofi ke fakafoki hono mali lolotonga pea ko e fo’i pulu ia ‘oku ki’i fefeka kia Trump. Pea kapau he ‘ikai fakafoki hono mali pea fakafisi leva mei he lakanga Palesiteni.
‘Oku lotomamahi ‘a e tokolahi ko e ngaahi palopalema ‘oku fekuki mo e si’i kakai nofo ta’efakalao hono fakafoki ‘a e matu’a kae nofo ‘a e fanau, pe ko e tamai kae nofo ‘a e fa’ee mo e fanau pea ko e palopalema lahi ki he ngaahi famili.
Kuo launga mo e ngaahi ngaue lahi hange ko e ngaahi faama, kuo pala ‘a e ngaahi faama ko e ‘ikai ha kakai ke havesi ‘a e faama, kuo tu’u ‘a e ngaahi langa lahi ‘o tatau ‘a e fale mo e langa hala mo e ngaahi langa kehekehe, ko e ‘ikai toe ‘asi mai ‘a e kau ngaue ko’enau ‘ilifia na’a ma’u kinautolu. Ko e me’a tatau ‘oku hoko ki he ngaahi falekoloa ‘ikai ha kau ngaue pea pehee ki he ngaahi fale tauhi vaivai kuo a’u ki he 50% kuo nofo kae faka’ofa kau vaivai ‘ikai hanau tauhi.
Kaekehe, ‘oku ‘ikai pe tuka ‘a e Palesiteni ‘ene polokalama fakafoki ‘o e kau nofo ta’efakalao pea ‘ikai ha holomui he kakai mo e fa’ahi Temokalati ‘enau fakafepaki’i fefeka ‘a Trump mo hono pule’anga. Katau vakai he ‘alu atu ko’eni pe koeha ‘a e me’a ‘e hoko.
