Ngalivale ‘a e founga ngaue mo e fetukuaki ki he mole $140,000 ko e fakatau me’alele ‘a e MOI
‘Oku fu’u ngali vale pea ma’ulalo ‘aupito ‘a e tu’unga kuo a’u kiai ke mole ‘a e fu’u pa’anga ‘e $140,000 ‘a e tukuhau ‘a e kakai, ‘i he fa’ahinga founga ngaue kuo fakahoko ke iku mole ‘a e pa’anga pea fetukuaki ‘o hangee ha ngaue ha kauleka lautohi.
Ka ‘oku malo mo hono ‘ohake ‘e he mitia fakasosiale ke ‘ilo lahia ‘a e me’a totonu na’e hoko ke mole ai ‘a e fu’u pa’anga tukuhau ‘a e kakai.
Fakatatau mo hono tanaki mo fakahoa ‘o e ngaahi fakamatala kuo ‘ohake, na’e ‘iai ‘a e alea fakatau me’alele ‘a e Potungaue ki he Ngaahi Ngaue Lalahi ‘a e Pule’anga pea mo e kautaha ‘a Lesieli Namoa ko e New Life Logistic Company Limited. Ko e taimi ‘eni na’e kei Minisita ai ‘a Hon. Seventeen Toumo’ua, ka ko e Minisita Tukuhau mo Kasitomu he taimi ni.
Ko e ongo me’alele ‘e ua na’e fai kiai ‘a e alea, ko e ‘uluaki ko e loli Hino Ranger fe’unga mo e TOP$90,000 pea pehee ki he loli Nissan Atlas fe’unga mo e $50,000 pea fe’unga kotoa ki he TOP$140,000.
Kaekehe fakatatau mo e tohi ‘a e Potungaue kia Lesielii ‘i he ‘aho 19 Mee 2025, ko e taimi ‘eni na’e Minisita ai ‘a Dr. Taniela Fusimalohi, na’e totongi atu ‘a e pa’anga kia Lesieli mo’ene kautaha ‘i Tisema 2024. Ka na’e te’eki pe ke ma’u ‘a e ongo me’alele pea tuku atu ‘e he Potungaue ha tohi kia Lesiale ke ‘omai ha’ane tali ki he tu’unga ‘oku ‘iai ‘a e fakatau me’alele.
Ka ‘i he taimi na’e ‘ohake ai ‘a e fakamatala ni ‘i he mitia fakasosiale, na’e fakahoko ai ‘e Lesieli Namoa ‘ene tali. Na’ane pehee na’e ‘osi ‘a e femahino’aki ki he fakatau me’alele pea na’e toe ‘iai pea mo e femahino’aki hono ua ke fua he pule’anga ‘a e totongi ki he tute mo e totongi ‘oku pule’i he pule’anga ki he ongo me’alele. Ka na’e hoko ‘a e feliliuaki ‘i he pule’anga ke uesia ‘a e alea ko’eni pea iku ke ‘alu hake ‘a e totongi ki he uafu ki hono tauhi ‘o e ongo me’alele ki he pa’anga ‘e $70,000. Pea na’e iku ke tuku atu kitu’a ‘a e ongo me’alele na’e totongi ‘e he MOI.
‘i he tohi na’e tukuatu he 2025 mei he MOI kia Lesiale Namoa na’e fakahaa ai ‘e he Minisita ‘a e hili ‘enau vakai’i ‘a e femahino’aki na’ane fakahoko mo e pule’anga kimu’a, ‘oku ‘iai ‘a e ngaahi too nounou lalahi ‘e 4, ‘o fakatatau ki he tali kuo ne fakahoko ki hono ‘eke ‘e he MOI ‘a e ongo me’alele.
Na’e ‘ikai haa mahino he alea ha totongi makehe mei he ‘uluaki $140,000 na’e ‘osi totongi.
Ko e alea na’e fakahoko mo e Minisita kimu’a na’e ta’efakalao ko e ‘ikai fou he founga ngaue ‘o e polokiuameni.
Na’e ‘asi he’ene tali ‘o tukuaki’i ‘a e Potungaue ki he feinga ke liliu ‘a e ownership ‘a e ongo me’alele, ka ‘oku takihala mo loi.
Pea kuo ma’u he Potungaue ha tohi meia Samuela Mafile’o ko e pule ‘o e Masilamea Motors kuo ne pukepuke ‘eia ‘a e ongo me’alele.
Kaekehe na’e faka’osi ‘aki ‘a e tohi mei he Potungaue MOI, koe tali kuo ne fakahoko ki he Potungaue, ‘oku fakamo’oni’i mai ai kuone tali na’ane ‘osi ma’u ‘a e pa’anga ki he ongo me’alele. Pea ‘i he tu’unga koia kuopau ke ne ‘omai ‘a e ongo me’alele ki he Potungaue.
Na’e fakahoko he ongoongo ni ha fetu’utaki ki he Minisita lolotonga Hon. Semisi Sika, pe koeha ‘a e fakamuimui taha ki he kaveinga ni. Ka na’ene pehee ki he ongoongo ni, “ ‘Oku te’eki ke ‘iai ha’ane ‘ilo lahi ki he kaveinga ni, ka te ne fekau ki he kau ngaue ke ‘omai ha fakamatala kakato ke ne lave’i ‘a e me’atotonu ki he fakatau me’alele na’e fakahoko. Pea ‘oku ‘iai pe mo e va’a ‘atita ‘a e Potungaue kenau fakahoko ha ngaue ki he me’a ni.”
Kaekehe ‘oku fiu ‘a e ongoongoni hono fakakaukau’i pe ‘oku angafefee ‘a e fakahoko ngaue ‘a e fu’u kakai poto he pule’anga, ke lava ‘o hoko ai ‘a e palopalema ke mole ‘a e pa’anga ni. Pea ‘oku ‘ikai ko ha ‘uhinga lelei ‘a e fetongitongi ‘a e kau Minisita, he ‘oku ‘ikai ke fetongitongi ai ‘a e CEO mo e kau ngaue Senior. ‘I he Potungaue tatau ‘oku ‘iai ‘a e fu’u kau ma’u MA mo e faka’ilonga ako lelei, ka koeha ‘oku lava ai ke hoko ‘a e fa’ahinga founga ngaue ko’eni pea ‘oku totonu ke ‘iai ha taha ‘e taliui ki he fu’u mole lahi ko’eni.
