Tangi Palemia ke to’o tu’utu’uni Fakamaau’anga Lahi ki hono faka’ataa ‘a Lavulavu ki he Press Conference.
Kuo ma’u e ongoongo ni ‘a e tatau ‘o e pepa Fakamaau’anga ki hono tuku atu ‘e he ‘ofisi ‘o e Palemia ‘ene tangi ki he Fakamaau’anga Lahi, ke to’o ‘a e tu’utu’uni na’anau fakahoko he ‘aho 3 Sepitema ke faka’ataa ‘a Lavulavu mo’ene kautaha ongoongo ke toe kau atu ki he Press Conference ‘a e Palemia.
Na’e tu’utu’uni ‘a e Palemia ke ta’ofi ha toe kau atu ‘a ‘Etuate Lavulavu mo’ene ngaahi Kautaha Ongoongo, ko’ene ta’efiemalie ki he ngaahi ongoongo ‘oku ne tui ‘oku loi mo takihala’i ‘a e kakai ‘o e fonua.
Ka na’e tuku atu ‘e Lavulavu ‘ene tangi ki he Fakamaau’anga Lahi ke to’o he Palemia ‘ene tu’utu’uni ta’efakalao ko’eni pea ke faka’ataa ‘ene kautaha ongoongo ke tau’ataina ‘a e ongoongo he fonua ni.
Na’e tali lelei ‘e he Fakamaau’anga Lahi ‘a e kole ‘a Lavulavu pea tuku mai ‘ene tu’utu’uni ke fakahoko he Palemia ha fakataha ke fakaaa ai ‘a e tu’utu’uni ‘a e Fakamaau’anga. Ka ko’eni kuo toe tuku ‘atu ‘ene kole ke tuku fakatafa’aki ‘ene ‘uluaki tu’utu’uni kae kei hokohoko atu pe hono ta’ofi ‘a e kautaha ongoongo ‘a Lavulavu mei he ngaahi Press Conference ‘a e Palemia.
‘I he ngaahi makatu’unga na’e fakamo’oni kiai ‘a e Sekelitalu Pule ki he Kapineti Mr Paula Ma’u mo e Talekita Ngaue ko Sione Fifita.
‘Oku nau tui ko e tu’utu’uni na’e fakahoko kia Lavulavu ki hono ta’ofi na’e makatu’unga ‘i he ‘ikai ke kau he lisi ‘o e ngaahi Kautaha Ongoongo na’e fakafe’i. He na’e lolotonga lele ‘a e fakatotolo ‘a e Komisoni ki he Ma’unga Fakamatala ‘a Tonga, ki he ngaahi tukuaki’i ‘o Lavulavu mo’ene kautaha ki hono tukuaki ‘o e ngaahi fakamatala loi mo takihala’i ‘o e kakai ‘o e fonua.
Pea ‘oku ‘ikai ha kaveinga lahi ia ke talanga’i ai, he neongo hono ta’ofi mei he ngaahi Press Conference, ka ‘oku ne kei ma’u pe fakamatala mei he ngaahi kautaha ongoongo kehe ‘oku kau ki he PC. Ko’ene tau’ataina ke tohi mo lea ‘o fakatatau ki he kupu 7 ‘o e Konisitutone ‘oku ne kei ma’u pe ia he taimi tatau. Ka ‘oku ‘iai ‘a e tu’utu’uni ngaue ‘a e pule’anga ki he ngaahi feitu’u makehe ‘o hangee ko e PC, ‘oku toki faka’ataa pe kiai kapau na’e fai ha fakaafe’i kiai. Ka ko e PC he ‘ahhho 14 mo e 17 Sepitema na’e ‘ikai fakaafe’i kinautolu, koe’uhi ko e ngaue ‘oku fakahoko kiate kinautolu.
Na’e fakahuu atu ‘a e tangi ‘a e ‘ofisi ‘o e Palemia he ‘aho 10 Sepitema, ‘o fakaongoongo ki hano ui ke vakai’i ‘a e ngaahi makatu’unga pe ‘e toe liliu pe ‘ikai ‘a e tu’utu’uni na’e fakahoko he ‘aho 4 Sepitema.
