Lahi taha fetuku mai faito’o konatapu mei ‘Amelika, Puke kau Polisi ‘aisi 3.5kg hili e tukufetuli mo e Faka’iloa
‘Oku mahino mei he ngaahi hopo lahi ‘i he Fakamaau’anga Lahi, ko e lahi taha ‘o e faito’o konatapu kalasi A kau ai ‘aisi (meth) ko e ‘omai he ngaahi uta mei ‘Amelika. Pea tukukehe ange hono‘omai ‘i he ngaahi vakatahi ‘o laku ‘i tahi pea toki fetuku mai he kau tila ‘i Tonga ni ki lotofonua. Ko e ngaahi uta ‘oku lau kilo ‘a e faito’o ‘oku ‘omai fakafufu ai.
‘I he Pulelulu ‘o e uike ni na’e fakahoko ai ‘a e hopo ‘i he ‘Eiki Fakamaau Lahi LCJ Malcon Bishop, ‘o e Faka’iloa ko Rodney Ofa Tomasi mei Kolonga, ki he huu mai ‘o e faito’o konatapu fe’unga honolahi mo e 3.5kg ‘i ha talamu mei ‘Amelika.
Fakatatau mo e puipuitu’a ‘o e me’a na’e hoko, na’e ma’u he kau Polisi ha fakamatala mei ha ma’u’anga fakamatala (informant) ki ha faito’o konatapu ‘oku ‘omai ‘i ha uta mei ‘Amelika ‘i he mahinako Sepitema 2024. Ko e ‘omai mei he fefine ko Vika ‘Ofa pea na’e fiema’u ‘a e tokotaha ma’u’anga fakamatala ke ne ngaue ki he uta he’ene tau mai.
‘I he mahina ko Novema 2024 na’e fakahaa he tokotaha ma’u’anga fakamatala ki he kau Polisi, na’e ha’u ‘a e tokotaha ‘o ‘oange kiai ‘a e $3000 ke tukuange ‘aki ‘a e uta. Pea ‘i he mahina tatau pe na’e ma’u e fakamatala he kau Polisi ko e uta kuo tu’uta ‘i Tonga ni.
Na’e fakahaa leva ‘e Satini Tamaline Fifita na’ane taki ‘a e ngaue ni ‘a e fo’i ngaue ki he Komisiona Polisi ko e ‘aho 12 ‘o Tisema. ‘I he ‘aho 13 na’e folau maloloo ‘a e Komisiona, na’e fakahaa ‘a e ngaue ki he Tokoni Komisiona Tevita Vailea pea tu’utu’uni ke tukuange ke ‘alu ‘a e uta ki tu’a kae muimui’i ke puke ‘a e kau faihia.
Ko e ‘aho kimu’a pea tukuange ‘a e uta, na’e hakule he kau Polisi ‘a e uta ‘i he ‘ofisi ‘o e Kasitomu ‘o ‘ilo ‘a e faito’o konatapu ‘i he loto tangai suka. Ko e taimi kotoa na’e fai ngaue ki he uta ketukuange kuo ‘osi lipooti kotoa ia he ma’u’anga fakamatala ki he kau Polisi, ‘o kau ai ‘a e ‘aho ‘e ‘ataa ai ‘a e uta pea mo e feitu’u ke ha’u ‘a e Faka’iloa ‘o piki ‘a e faito’o konatapu mei he tokotahama’u’anga fakamatala. Na’e femahino’aki ke piki mei he parking ‘o e Falemahaki ‘oku ta’unga pasi.
‘I he ‘ataa ‘a e uta na’e ‘ave he ma’u’anga fakamatala ‘a e uta ki he ‘api ‘i Ma’ufanga kae to’o ‘a e tangai suka ‘o fakataumu’a ki he parking ‘i falemahaki. Koe taimi ko’eni ‘oku ‘osi ‘aa takai ‘a e kau Polisi he ngaahi feitu’u kehekehe ke puke ‘a e Faka’iloa. Ka ‘i he ofi mai ‘a e ma’u’anga fakamatala mo e tangai suka na’e fetu’utaki atu ‘a e Faka’iloa ke liliu ‘a e feitu’u ki he parking tafa’aki ki he ‘api siasi Mamonga ‘o Tofoa. Na’e fakatokanga’i he kau Polisi ‘oku ‘iai ‘a e kaa ‘uli’uli na’e tau mai ki he parking ‘i he ki’i tali’anga pasi, kae ha’u ‘a e ma’u’anga fakamatala mo e Faka’iloa ‘o huu he fo’i hala ki he falemate ‘o takai hake ai he tafa’aki ‘a Mapa ki he parking ki he tafa’aki ‘api siasi. Na’e ‘ikai toe lava ‘a e kau Polisi ‘o sio pea ngaue’aki ‘a e drone ke ne hulu ‘a e me’a ‘oku hoko.
Na’e ‘asi mei he drone na’e fetaulaki ‘a e ongo ua ki he parking pea hifo ‘a e Faka’iloa ‘o to’o ‘a e tangai suka ki he’ene me’alele ‘o ‘alu moia. Ko’ene lele mai he fo’i hala ‘oku ‘asi hake ‘a e kaa ‘uli’ulina’e ‘uluaki tau he parkinga tau’anga pasi. Ko e taimi ko’eni ‘oku sio pe kau Polisi ki he me’a kotoa mo e ‘alu ‘a e kaa ‘o fou ki Hahake. Na’e muimui atu kaa koia mo e kau Polisi. Ko e taimi ko’enikuo mahamahalo ‘a e Faka’iloa ‘oku muimui’i ia he kau Polisi pea lele he hala lahi ‘o afe he Costlow fakataumu’a ki Tokomolo. Na’e kolosi atu ‘a e kau Polisi ‘o feinga ta’ofi kae lele Faka’iloa ‘o toe tafoki mai mei Tokomololo, ‘oku lolotonga puke he kau Polisi ia ‘a e me’alele ‘e taha.
Na’e toe foki mai ‘a e Faka’iloa ‘o lele he fo’i hala ki Mataki’eua ‘o li’aki ‘a e me’alele kae hifo ‘o lele mo e faito’o konatapu he loto vao. Na’e tuli he kau Polisi ‘o ‘ilo ‘a e faito’o konatapu he loto vaokae puli ‘aupito ‘a e Faka’iloa. Na’e a’u ‘a ekau Polisi ki hono ‘api ki Kolonga ka na’e ‘ikai ‘iai. Na’e toki ‘osi ‘a e ‘aho ‘e ua pea toki ‘alu pe Faka’iloa ‘iate ia ki he kau Polisi.
‘Oku lolotonga lele ‘a e hopo mo e kau fakamo’oni ‘e toko 6 ‘a e Kalauni. Ka halaia ‘a e Faka’iloa ‘oku mahino ko e ngaue popula pe ki he mate ‘o fakatatau ki he lao.
