Ikuna Spain Ipu ‘a Mamani ‘o e Soka mo e US$50 miliona fe’auhi lahitaha ‘i Mamani
Kuo ikuna ‘e Spain ‘a e fe’auhi sipoti lahitaha he Mamani ‘a e va’inga Soka pea mo’enau Ipu fakata’u 4 ko e Ipu ‘a Mamani ‘i New Jersey New York Stadium ‘i he 19 Siulai mo e fu’u kau mamata ‘e toko 81,000. Pea fakangata ai mo e misi ‘a sitaa ‘iloa ko Lionel Messi mo’ene timi mei ‘Asenitina, kenau hokohoko ikuna ‘a e Ipu ‘a Mamani hili ‘enau ikuna ‘a e Ipu ‘a Mamani fakamuimui pea mo ha me’a’ofa ma’a ‘enau sitaa ko Messi ko ha fakamavae ‘ene va’inga faka’osi he mala’e soka fakavaha’a pule’anga.
‘Oku kau ‘eni ha va’inga malie he na’e toki ma’u pe kai ‘a Spain he taimi makehe he na’e ‘osi taimi ‘oku na kei mahanga tau’aki 0 pea ko e fo’i kai pe ia ‘e taha he fainolo, kenau ikuna ‘aki ‘a e Spain 1-0 ‘Asenitina.
Ko e ikuna ‘a Spain ‘oku ma’u ai mo e pa’anga TOP$1 piliona tupu pe ko e pa’anga US$50 miliona ko e pale ‘uluaki ia ki he fe’auhi Ipu ‘a Mamani ‘o e Soka ki he ta’u ni. Ko e pale ua ‘oku ma’u ia ‘e ‘Asenitina ko e TOP$80 tupu milionna pe ko e US$34 miliona pea ko e pale tolu ko e pa’anga ‘e TOP$60 tupu miliona pea ko e US$28 miliona.
Ko e ngaahi timi kotoa na’e kualafai ki he Ipu ‘a Mamani ‘oku foaki honau ngaahi pale ‘o a’u ki he ngaahi timi na’e fo’i he takai fakapulu pea ‘oku lau miliona ‘a e pale ki he timi takitaha. He ko e pa’anga kotoa ‘e US$871 miliona na’e vahe’i ‘e he FIFA ki he ngaahi pale ‘o e Ipu ‘a Mamani na’e fakahoko ‘i ‘Amelika, Kanata mo Mexico ‘i he uike ‘e 3 kuo ‘osi.
‘I he halanga ‘o Spain ki he ikuna na’e ‘ikai faingofua, he ko’enau va’inga kamata na’anau mahanga ko e ki’i fonua si’isi’i mei ‘Afilika ko Cape Verde ‘oku fe’unga pe hono tokolahi mo e toko 5 kilu, fakahoa ki he toko 49.5 miliona ‘o Spain. Na’anau ake mai he va’inga hono ua ‘o kilikiti’i ‘a Saude Arabia pea malo ‘enau hao ‘i Uruguay. Na’anau kualafai ai ki he timi ‘e 32 tu’ukimu’a taha ‘onau ikuna ai ‘a Asutria pea nau hoko mai ki he timi ‘e 16 fakamuimui kenau ikuna ‘a Ronald mo e timi ‘a Portugal kenau huu ai ki he kuata fainolo. Na’anau fetaulaki ai mo e timi a Belgium. ‘I he semi final na’anau fetaulaki ai mo e timi hau ‘a Falanise ka na’anau ikuna ‘a Falanise ‘aki ‘a e kai ko e 2-0, ‘onau puka ai honau sea ki he fainolo mo e timi ‘oku ne pukepuke ‘a e Ipu ko e timi ‘a ‘Asenitina pea nau ikuna ‘aki ‘a e fo’i kai pe ‘e taha kenau ‘ave ‘a e Ipu ki honau fonua.
Ko e hisitolia ‘o Spain ‘i he Ipu ‘a mamani na’ane fuofua kau ki he fe’ahí ‘i he 1934 pea nau a’u ki he kuata fainolo. Ko e tu’o 17 ‘enau kau ki he Ipu ‘a Mamani pea kuo nau ikuna tu’o ua, ko e Ipu ‘a Mamani 2010 pea pehee ki he fe’auhi ‘o e ta’u ni.
Kaekehe ko e mahino kuo ikuna ‘a Spain, kuo fakahaa mei he fonua ‘e talitali ‘e he Tu’i mo e Kuini ‘o Spain ‘a e timi ki he Palasi fakatu’i pea pehee ki he talitali fakapule’anga ‘a e Palemia mo e pule’anga. Pea na’e tefua hifo ha fu’u kakai ‘e 1.8 miliona ke talitali ‘a e timi he ikuna kafakafa kuonau fakahoko.
‘Oku te’eki foki ke faka’ofisiale, ka kuo sasala holo ‘a e talanoa ‘e foaki he pule’anga hanau tokoni pa’anga, ko e fale mo e me’alele mo e ngaahi me’a’ofa kehekehe ma’ae kau va’inga ko’enau fiefia he laveme’a kuonau fakahoko ma’ae fonua.
‘I he Pasifiki foki ‘oku ‘ikai ke fu’u manakoa fefee ‘a e soka ‘o hangee ko e ‘akapulu ‘iunioni mo e liiki. Pea ‘oku tui ‘a e tokolahi ‘oku makatu’unga mei he natula sino ‘o e kakai ‘o e Pasifiki ‘a e sino lalahi mo fefeka pea ‘oku nau manako pe kinautolu ki he sipoti ‘oku tau sino. Ka ko e soka ko e sipoti totongi pa’anga lahi taha ia ‘i Mamani pea toe manakoa taha. Ka ‘i Tonga ni ‘oku ‘osi maau mo lele lelei ‘a e soka, ka ‘oku kei fika ‘uluaki ange pe ki he kau Tonga ‘a e ‘akapulu.
Pea mei he Pasifiki mo e ‘Osenia ko ‘Aositelelia mo Nu’usila na’e kau atu kiai, ka na’ana ngata pe he vilo fakapulu pea ‘oku mahino ai ‘a e kei fo’ou ‘a e soka ki he ngaahi fonua ‘o e Pasifiki.
