Tu’utu’uni Fakamaau’anga Tangi ke ngaue popula mahina 6 Faka’iloa hili hono tautea toloi kakato he Fakamaau’anga Lahi.
Kuo tali ‘a e tangi ‘a e Kalauni ki he tu’utu’uni ‘a e ‘Eiki Fakamaau Lahi LCJ Bishop KC ‘i he Fakamaau’anga Lahi, ke tautea toloi kakato ‘a e tautea ngaue popula mahina ‘e 30 ‘a e fefine mei Vava’u ko Lepeka Moala.
Na’e tali halaia ‘a e Faka’iloa he ‘aho 27 Sanuali 2026, ki he tikite ‘e ua ko e ma’u ‘a e pa’anga he fakamatala loi pea ne ma’u ai ‘a e pa’anga ‘e $8 mano.
Na’e ‘osi ‘oatu he ongoongo ni ‘a e fakaikiiki ‘o e hopo ni, ko e ngaue’aki he Faka’iloa ‘a e Facebook ke tu’uaki ‘ene kautaha ‘ota me’alele pea na’e si’i too ai ‘a e kau fakatau me’alele ‘o totongi ‘a e pa’anga lahi ki he Faka’iloa, kae hili ange ko e loi ‘oku ‘ikai ha’ane kautaha pehee. Na’ane faka’aonga’i ‘eia ‘a e fu’u pa’anga na’ane tanaki, kae toki ma’u kimui ‘o faka’ilo he kau Mamahi kenau iku ai ki he Fakamaau’anga.
Fakatatau mo e tu’utu’uni ‘a e ‘Eiki Fakamaau Lahi, ke toloi kakato ‘a e tautea ngaue popula mahina ‘e 30 ‘a e Faka’iloa, ‘i he ‘uhinga kuone totongi fakafoki kakato ‘a e pa’anga ‘a e kau Mamahi pea tali mo’ene kole fakamolemole. Pea ko e ‘uhinga lahi ia ke toloi kotoa hono tautea.
Na’e ‘ikai fiemalie ‘a e Kalauni ki he tu’utu’uni ‘a e Fakamaau’anga Lahi pea nau tangi ki he Fakamaau Tangi mo fokotu’u atu ‘a e ngaahi makatu’unga ‘enau ta’efiemalie. ‘I hono vakai’i he kau Fakamaau Tangi ‘a e makatu’unga, na’anau tali pea tu’utu’uni ke fakafoki ‘a e tu’utu’uni tautea toloi kakato, kae foki mai ‘a e Faka’iloa ke ngaue’i ‘a e mahina ‘e 6 pea toloi ‘a e toenga.
Na’e ‘iai ‘a e taukeva mei he Fakafofonga Lao ‘a e Faka’iloa ki he ngaahi palopalema ‘e hoko ko e kei iiki ‘a e fanau ‘a e Faka’iloa pea ‘ikai ha taha ke tokoanga’i pea ‘osi totongi fakafoki ‘a e pa’anga ‘a e kau Mamahi. Ka na’e ‘ohake he Kalauni ia ‘a e tu’unga fakamamahi na’e ‘iai ‘a e kau Mamahi he mahino kuo lohiaki’i kinautolu pea toki totongi fakafoki ange ‘enau pa’anga.
Ko e taimi tatau foki ‘oku hoko hono tali ‘o e tangi ke fakatokanga ki he kau faihia pehe ni, ke fakamama’o a’upito mei ai he tatau ai pe ho totongi fakafoki ‘a e pa’anga, ka ‘oku ‘iai mo e maumau kehekehe ‘oku ‘ikai lava ia ‘o totongi.
Ko e ni’ihi ‘oku kei ngaue popula he hia tatau, ka ‘oku ki’i sai ange Faka’iloa ko’eni he na’e totongi fakafoki ‘a e pa’anga. Ko e ni’ii koee na’e ‘ikai lava ‘o totongi fakafoki pea ‘oku loloa ange honau taimi ngaue popula.
