Tukuatu potungaue Polisi me’a’ofa $5000 ki ha taha te ne ma’u ha fakamatala ki he kau popula hola. Tonu ke ngaue’aki founga tatau ki he Faito’o Konatapu.
‘Oku mahalo ko e fuofua taimi ‘eni ke hoko ai ha me’a pehee, ko hono tuku atu ‘e he Potungaue Ngaue Polisi ha me’a’ofa pa’anga ki he kakai ‘o e fonua ke ma’u mai ha fakamatala ki he’enau ngaue.
Na’e tuku mai ai he Komisiona Polisi he ‘aho Pulelulu ‘o e uike ni ‘i ha fakataha mo e kau Faiongoongo, ki ha me’a’ofa pa’anga ‘e $5000 ki he tokotaha kapau tenau ma’u mai ha fakamatala ki he kau Popula ‘e toko ua na’anau hola mei he ‘apitanga Polisi Nuku’alofa. Ko e toko tolu, na’e tauhi fakalao he ‘apitanga ko e tali he fakakakato ‘a e ngaue fakalao ki he ngaahi hia na’e tukuaki’i kinautolu kiai. Pea ko e kei tali ke fakakakato ‘a e ngaue kuo hola ‘a e kau tauhi fakalao mei he malumalu ‘o e kau Polisi.
‘I he taimi tatau ‘oku fakahoko mo e ngaue ‘a e kau Polisi ki he’ene kau ngaue, pe na’e angafefee ‘a e malava ke hola ‘a e kau tauhi fakalao. Pea ‘e vakai’i mamafa pe na’e fakahoko ha totongi pa’anga ke tokoni ai ‘a e kau ngaue ki he hola ‘a e kau tauhi fakalao.
Ko e toko tolu ko Liuanga Fungalei Kokohu Vi kae tangatai fonua Nu’usila ta’u 34, ko Angelico Fa’aoa ta’u 15 pea mo e tangata ‘Initia Fisi ko Adam Zabid Hussein 33. Na’anau hola mei he ‘apitanga Polisi Nuku’alofa he efiafi Sapate ‘o e uike kuo’osi pea kuo ma’u ‘a ‘a Angelico Fa’aoa ka ‘oku kei puli ‘a e ongo tama lalahi pea ‘oku fakalea kinaua ko e ongo muli.
Ke foaki ‘a e me’a’ofa ki ha taha kuopau ke hoko ‘a e fakamatala kuone ‘omai ke ma’u ai ‘a e tokoua ‘oku kei hola. Ka ‘oku ‘ikai ke foaki pe ia ki ha taha ‘oku ne tuku atu ha fa’ahinga fakamatala. Pea kuo tuku atu he kau Polisi ‘a e fakatokanga ki he kakai ‘o e fonua ki he ni’ihi ‘oku nau tokoni pe fufuu’i ‘a e ongo faihia ni, ‘oku tautea mamafa ia he lao ‘o e fonua. Pea ka ‘iai ha ni’ihi pehee kuopau ke puke kinautolu he kau Polisi ‘o faka’ilo pea tautea’i mamafa.
‘Oku ‘ia mo e hoha’a lahi ki he hia ‘oku tukuaki’i kiai ‘a e ongo tangata muli ko e ngaue kaakaa ki he paasipooti ‘o fakatatau ki he fakama’ala’ala mei he Komisiona Polisi pea ko e ta’u 15 ko e hia kaiha’a ma’ama’a pe. Pea pehee ki hano tokoni’i ha ni’ihi ‘a e ongo Faka’iloa kena mavahe mei Tonga ni.
Kaekehe koe founga ko’eni ke foaki pa’anga, ‘oku tui ‘a e tokolahi ko e founga lelei ia ke ngaue’aki ki he kau faihia faito’o konatapu. Ka puke ha taha tila faito’o konatapu ko ha fakamatala mei he kakai ‘o e fonua pea foaki ha me’a’ofa. ‘I he taimi tatau ko e lahi ‘o e me’a’ofa ke foaki ‘e fakatatau ia ki he lahi ‘o e faito’o konatapu ‘oku puke pe ko e mafa tukituki ‘o e hia ‘o tokotaha tila faito’o konatapu ‘oku puke. Pea ‘i he founga koia ‘e faka’ai’ai ‘a e kakai ‘o e fonua kenau tokoni lahi ki hono tala ‘o e kakai ‘oku faihia he faito’o konatapu.
