Longoa’a Fisi ki he malu (security) fu’u kaa motolo me’a’ofa ‘a Siaina ki he Palesiteni ‘o Fisi.
Kuo longoa’a ‘a Fisi ‘i he faka’ohovale kuo fakatu’uta ki he me’a’anga fakapalesiteni ‘a e fu’u kaa me’a’ofa ‘a Siaina ki he Palesiteni ‘o Fisi. Ko e kalasi kaa ‘eni ‘oku ngaohi pe ‘i Siaina pea ‘okungaue’aki he kau taki ‘o Siaina ki he’enau feme’aki he fatongia fakapule’anga.
Ko e kalasi’iloa ‘eni ko e Hongqi “Red Flag” ‘oku meimei ngaue’aki pe he kau tu’umalie ‘o Siaina. Ka kuo tuku atu ia ko e me’a’ofa fakatipilometika ma’ae Palesiteni. Ka na’e tali lelei ‘e Palesiteni, Ratu Naigama Lalabalavu mo’ene fakamalo ki he me’a’ofa mo e fengaue’aki lelei mo Siaina.
‘I he taimi tatau ‘oku hoha’a lahi ‘a e kau fa’u lao mo e tafa’aki fakamalu’i ‘a Fisi, he ‘oku ‘ikai kenau falala ki he fo’i foaki me’a’ofa ko’eni pea mo e malu ‘enau ngaahi famala fakapule’anga ‘oku ‘ihe Palesiteni. ‘Oku tui ‘a e kau mataotao fakamalu’i ‘i Fisi ‘oku ‘ikai totonu ke ngaue’aki ‘e he Palesiteni ‘a e fu’u me’a’ofa ko’eni, he ‘oku nau mahamahalo ki he ngaahi me’a faka’ilekitolonika he kaa ‘oku ‘osi seti ia ke ne fetuku ha ngaahi fakamatala mahu’inga ‘a e fonua ki Siaina.
‘Oku ‘ikai sola ‘a e tokoni ‘a Siaina ki he ngaahi fonua he Pasifiki, ka ‘oku ‘ikai angamaheni ‘a e fa’ahinga me’a’ofa pehe ni, he ‘oku ne faka’ai’ai ‘a e ngaue kakaa he kau taki. Ka ‘oku tui ‘a e Siaina ko e fakahounga pe he vaa ngaue lelei ‘a Fisi mo Siaina pea ko e fuofua fonua he Pasifiki ke fengaue’aki mo Siaina.
‘I he too Folofola ‘a e Tama Tu’i he fakaava ‘a e Fale Alea, ke ‘oua tenau tali ha me’a’ofa he ‘oku ne kakaa’i loto e tangata. Ka ‘oku hoko ‘a e fo’i foaki me’a’ofa ‘a Siaina ki he Palesiteni ‘o
Fisi kefakamanatu lelei ki he kau taki ‘a e too Folofola. ‘Oku lahi ‘a e taimi ‘oku folau ai ‘a e kau taki ‘o e pule’aga ki Siaina pea ‘oku ‘ikai ketau ‘ilo ‘a e taimi ‘oku fakahoko ai ‘a e foaki me’a’ofa ‘a Siana pea muimui mai mo’enau fiema’u ki he fu’u paipa folau.
Na’e ‘iai ‘a e ta’u ‘e taha na’e me’aofa laptop ‘a Siaina ki he Fale Alea ‘o Tonga, na’e tuku atu ‘a e tohi fehu’i ki he Fale Alea pe ‘oku ‘iai ha hoha’a ki he malu ‘a e ngaahi fakamatala ‘a e fonua mei he ngaahi me’a’ofa, ka na’e ‘ikai ha tali. Ko e me’a tatau he ngaahi fonua kehe ‘oku langa ‘e Siaina pea ‘oku nau tui ‘oku fakanaunau ia kenau lava pe ‘o ma’u ‘a e ngaahi fakamatala ‘a e fonua koia. Ko e fu’u langa ‘a e Siaina honau fale faka’amipasitoa ‘i Tonga ni, ‘oku hoha’a kiai ‘a e tokolahi ko e me’a tatau, ka ‘oku ‘ikai pe hoha’a ‘a e pule’anga ke ‘omai ha fakamatala. Na ko’etau nofo ‘atautoluko’eni ‘oku ‘ikai puli ha me’a ia ki Siaina.
