Kuo fakahalaia ‘a Hon. Semisi Sika ‘i he Fakamaau’anga Lahi ‘o Tonga ‘i he houa pongipongi ‘o e ‘aho ni, ke ne halaia ki he hia totongi fufu {bribery} ke fakaloto’i ha ni’ihi ke filia ai lolotonga ‘a e kemipeini fili Fale Alea ‘o e ta’u kuo’osi.
Ko e halaia ‘a Hon. Semisi Sika ki he ngaahi tukuaki’i lalahi ‘e 3 ‘o kau ai ‘a e sponsor pa’anga ‘e $10,000 ki he kulupu tau’olunga ko e Suliana Dance Studio. Ko e ua ko e fakatau ‘one mei he taha ‘o e ngaahi falekoloa Siaina ki he fana’one pea ko e faka’osi ko e foaki me’akai lolotonga ‘a e ngaahi malanga kemipeini ‘i he ngaahi kolo ‘o e Tongatapu 2.
‘I he aofangatuku ‘a e Fakamaau Lahi, na’ane fakamahino ai ‘a e ngaahi too nounou ‘a e Fakafofonga, ‘o kau ai ‘a e founga na’e fakahuu ange ai ‘ene ngaahi pepa ki he konga hono fakahaa ‘o e ngaahi foaki na’e fakahoko, na’e fiema’u ke fakaikiiki ‘a e fakamatala. Ko e taukave koia ki he foaki na’e fakahoko ki he Suliana Studio ko e tokoni mei he Five Star kae fakamahino ‘e he Fakamaau, ‘oku ‘iai pe ‘ene kaunga kiai ko e tokotaha Kanititeiti. Ko e pisinisi fakafamili pea ko e taha ia ‘o e kau memipa Poate pea ‘iai mo e fanau hono tuofefine ‘i he kulupu faiva ko’eni.
Kaekehe ‘i hono faka’eke’eke ‘o Hon. Semisi Sika ‘e he kau Faiongoongo, na’ane pehee, “ Na’e ‘ikai ha taumu’a ‘e taha ‘o e ngaahi tukuaki’i ko’eni ke fakaloto’i ha kakai kenau fili ai. He ‘oku ‘ilo he Tonga kotoa ‘a e tokoni ‘oku ne fakahoko mo’enau pisinisi fakafamili ki he kolo, Fonua, sipoti mo e tokoni kehekehe ki he Fonua. Pea ko e ngaahi tokoni angamaheni pe ia he ta’u ki he ta’u, kae ‘ikai ko ha me’a na’e toki fokotu’u hake koe’uhi ko e teuteu ‘o e fili Fale Alea. Kae pango ko e tu’u ‘a e lao, koia ‘oku pule. He na’e ‘ikai ha’ane ‘amanaki ‘e fakahoko ‘aki he ni’ihi ko’eni ha faka’ilo, he ‘oku nau ‘ilo lelei ‘ene ngaue langa Fonua angamaheni he ta’u kotoa.
Na’e toe fakahaa ‘e Hon. Semisi Sika, kuopau ke ne hoko atu ki he hopo tangi he ‘oku ne ongo’i pe ‘e ‘iai ha ngaahi faingamalie pea ke taliui ki hono vahenga mo e kakai na’anau fili ia. Ke ‘alu ke a’u ki he taupotu taha ‘o e feinga kenau fiemalie ki ha ola ‘e hoko. Ka kiai ka foki ki honau ‘api, ko e foki pe ‘o hoko atu ‘enau pisinisi fakafamili ke langa ‘a e Fonua he tafa’aki kehekehe.
Ko e malohinga ‘o e famili Sika ko e pisinisi kehekehe fakataha mo e taleniti ‘o e Hon. Sika he Takimamata mo e langa Fonua ‘oku fiema’u lahi ia he Fonua. Ka ‘oku pule ‘a e lao kae ‘ikai ko e anga ‘o e vakai atu mei tu’a.
‘I he taimi tatau ngalingali ‘e fou pe ‘a Sika he hala ‘o e Minisita Pa’anga malolo, ‘o fakafisi mei he lakanga Minisita kae ‘oleva ke mahino ‘ene tangi. Ka kuopau ke ‘uluaki fakahuu atu ‘ene tohi kole ke fakatatali (stay) ‘a e tu’utu’uni kae oleva ke mahino ‘a e hopo tangi. Pea kapau ‘e tali pea ‘e kei pukepuke pe ‘e Sika hono Sea Fakafofonga Tongatapu 2 kae ‘oleva ke mahino ‘ene tangi.
Na’e fakama’ala’ala ‘e Hon. Semisi Sika ‘i hono fehu’ia ki he tu’u ‘a e lao fili, ka na’ane tui ‘oku ‘ikai ‘uhinga ‘ene tali ke fakatonuhia’i ‘ene halaia he Fakamaau’anga. Ka ko e me’a ‘oku ne vakai kiai ‘e tu’u ‘a e langa Fonua he lao fili Fale Alea, he ko e taimi pe ‘a e fili he ‘ikai toe ngofua ke tokoni hono famili ki he langa Fonua he mahina ‘e 3 ko e taimi kemipeini ia. Pea kapau ‘e lava ‘a e lao ‘o faka’ataa ‘a e ngaahi tokoni angamaheni pehe ni he lau ta’u, kae siofi pe ‘a e fa’ahinga tokoni ‘oku toki fokotu’u hake pe he teu fili Fale Alea he kuo ‘osi mahino pe hono taumu’a. Pea ‘oku kau ia he fokotu’u malie ki he lao fili Fale Alea.
Na’e toe faka’ilo foki ‘e Semisi ‘a ‘Uhilamoelangi Fasi ki he maumau’i ‘o e lai fili Fale Alea ko e nofo he vahenga fili kehe kae fili Fale Alea he vahenga kehe. Pea ko e hopo ia ka malie kapau ‘e halaia mo Mr. Fasi pea ko e fili si’i ‘a Tongatapu 2 ko e tokotaha fo’ou ‘aupito.
Kaeheke ‘oku tali tala tu’utu’uni mai leva ‘a e Minisita Fonua, Hon.Taniela Fusimalohi mo Tevita Lavemaau pea pehee ki he hopo ‘a Hon. Viliami Latu mo ‘Etuate Lavulavu. Ko e ongo hopo malie ia ‘oku tatali kiai ‘a e kakai koe’uhi ko e ongo Minisita lolotonga. He ko e kaha’u ‘o e pule’anga lolotonga ‘e mahino ia mei he ongo hopo ko’eni, ka faifaiange ‘o tuku kitu’a mo kinaua pea ko e holofa ia ‘a e pule’anga lolotonga.
