‘Oku kei fakapotopoto ke fili mai ‘a Hon. Piukala hiliange ngaahi tukuaki’i lahi ‘oku fakahoko kiai
Ko e fehu’i ia ki he kakai ‘o Tongatapu 7 mo hono kau kakai fili Fale Alea ki he uike kaha’u, pe ko ha fili fakapotopoto kenau toe fili mai ‘a Hon. Piukala ko honau fakafofonga lolotonga ange ‘a e ngaahi tukuaki’i mafatukituki fekau’aki moia.
Koeha koaa ‘a e fili fakapotopoto ki he anga ‘a e vakai kiai. Ko e tali ‘o e fehu’i koia ‘oku toki kehekehe ai ‘a e tangata fili hono faka’aonga’i honau ‘atamai lelei. Ka ko e pango ko e tokolahi ‘oku naufakakakato ‘a e palofesai ‘a e tohitapu, “ ‘E a’u ki he ‘aho faka’osi ‘a lau he tokolahi ‘a e kovi ko e lelei pea lau ‘a e lelei ko e kovi”.
‘I he too Folofola ‘a e Hau ‘o Tonga, na’ane fakamamafa’i ‘a e fiema’u ke fili fakapotopoto ‘a e kakai ‘o e fonua honau kau Fakafofonga ki he Fale Alea.
‘Oku fai leva ‘a e vakai ki he Fakafofonga ‘o Tongatapu 7 mo e Minisita Polisi lolotonga, ki he ngaahi tukuaki’i mamafa ‘o’ona. ‘I he to’u Fale Alea ko’eni ko e tu’o 8 hono tuli ia kitu’a ko e angata’efaka’apa’apa ki he Fale Alea pea ko e fakaloloma taha ko’ene fuhu he Fale Alea ‘aia ‘oku te’eki ‘iai ha me’a pehee kef ai ha fe’ohofaki he Fale Alea ‘o Tonga. Ka na’e lolomamahi ‘a e kakai ‘o e fonua ‘i he fa’ahinga tautea na’e fakahoko kia Piukala he ko e hou’eiki Minisita.
Ki ha tangata ‘atamai lelei ke ne sivi’i ha tangata ko e tu’o valu hono tuli kitu’a mei he Fale Alea pea toe fuhu he fale, ‘oku fakapotopoto pe ‘ikai ‘o tatau ai pe koeha ‘a e ‘uhinga, ka ‘oku mahino maiko e tangata ‘ita mo ta’efie’auna.
Pea ko’ene tu’u he lolotonga ‘oku lolotonga valau ‘a e fonua pea mo e fokotuu ke tuku kitu’a kae fakahoko hono fakatotolo’i ‘i he kaunoa ‘a e Minisita ‘i he tu’utu’uni ‘a e Fakamaau’anga Polisi, keiku faka’ata ‘a e tokotaha ke folau ki muli. Ka kuo toe ha ‘uhinga kehekehe ‘ene fakahoko ‘o pehee na’e ‘osi ‘iai ‘a e femahino’aki mo e loea ‘a e Mamahi Faka’iloa, ka na’e iku faka’ikai’i he loea(Miss Kafoa) ‘a e Mamahi ‘a e fakamatala ‘a Hon. Piukala na’e fai ‘a e femahino’aki, he na’e te’eki kena talanoa tu’otaha. Na’e toe fehu’ia foki ‘e he Fakafofonga Lao ‘a e Mamahi ‘a e ‘ohonoa holo‘a e Minisita ‘i he ngaue ‘a e Fakamaau’anga.
Kuone toe fakamatala ko e tu’utu’uni Fakamaau’anga na’e hala, he na’e ‘ikai ha hopo ke fakahoko. Ka koeha koaa ‘a e ‘uhinga na’e ta’ofi ai ‘e he Fakamaau’anga ‘a Pita Hopoate ke folau? ‘Oku toe fakaloloma ko’ene toe hala loto’api atu ‘a’ana he Fakamaau’anga, ‘o fakahaa he mitia fakasosiale ko e tikite na’e faka’ilo kiai ‘a Pita Hopoate ‘oku hala pea ‘ikai ha me’a pehee. Ko e fehu’i pe ‘okune ‘ilo ‘ene kaunoa he ngaue ‘a e Fakamaau’anga, ko e faitu’utu’uni ki he ‘iai ha hopo ke fakahoko pe ‘ikai ko e fatongia ia ‘o e Fakamaau’anga ‘ikai koia.
Kuo toe ‘ohake pea mo e ngaahi fetohi’aki ‘a e ongo tangata ngaue Kasitomu na’ana faka’ataa ‘a Mr. Hopoate ke folau, ‘o ‘eke kia Piveni pe ko fe’ia koaa ‘a e tohi faka’ataa mei he Fakamaau’angana’ane talaange ‘e ‘oange he ‘aho hoko. He kuo ‘eke he Minisita ‘a e tohi ke fakapapau’i ‘a e founga ngaue. Ka na’e ‘ikai lava ‘a Piukala ‘o ‘ave ha tohi ki he ongo ‘ofisa Kasitomu pea kuo fakahikitautea kinaua ‘ikai kena toe ngaue ‘i mala’e vakapuna.
Na’e tuku mai ‘e he ongoongo ‘a e kau Polisi ‘a e fakama’ala’ala ki he kaunga ‘a e Potungaue ki he longoa’a henau Minisita pea kuo tu’utu’uni ‘a e Komisiona Polisi ke ‘ave ‘a e fakatotolo ki he anti-corruption commission. Ka ko e palopalema heni ko e kau fakatotolo ‘o e Anti-Corruption ko e kau ‘ofisa Polisi pe, ‘e ma’u fefee nai ‘a e fakamaau totonu?
Kaekehe ko e ngaahi mo’oni’i me’a kuo ‘oatu ‘i ‘olunga pe ki ha taha ‘atamai lelei ‘oku totonu ke ne ‘osi maa’usia pe ‘oku fakapotopoto pe ‘ikai kenau toe fili mai ‘a Hon. Piukala. Pe kuo tau a’u ki he kuonga ‘e lau he kakai ‘a e kovi ko e lelei mo e lelei ko e kovi, ‘i ha’anau fa’ahinga ‘uhinga kenau toe fili mai pe ‘a e tangata tatau.
