Faka’ikai’i Lavulavu tukuaki’i ki he takihala’i pa’anga ($60,000) fe’auhi ‘akapulu Vava’u, hili fakahaa Piukala ‘ene lotomamahi he founga na’e tali’aki kole
Kuo ‘asi mai ‘a e helo he mala’e politikale ‘Etuate Lavulavu, ‘o faka’ikai’i ‘a e tukuaki’i kuo fakahoko ‘e Hon. Piveni Piukala fekau’aki mo hono faka’ataa ‘e he Minisita ki he Sipoti ‘a e pa’anga $60,000 ki he fe’auhi ‘akapulu ‘a Vava’u.
Na’e ‘ohake ‘a e kaveinga ni ‘i he Fale Alea ‘i he ho’ata Pulelulu ‘i he taimi Fehu’i mo e Tali ‘a e fale. Na’e tukuaki’i ko Lavulavu na’ane fakahuu ange ‘a e kole ko e polokalama fe’auhi ‘akapulu ‘a e komiti fakafonua ‘a Vava’u. Ka ‘oku tukuaki’i ‘e he kau Fakafofonga mo e Minisita Polisi, ko e takihala na’e fakahoko ‘e Lavulavu ki he va’a Sipoti, ka ‘oku taumu’a ia ke fakalele ‘aki ‘ene fe’auhi ‘akapulu kemipeini ki he teu fili Fale Alea ‘i Novema.
Na’e toe fakahaa ‘e Piukala ‘ene lotomamahi lahi he potungaue Sipoti he ‘ikai kenau vakai’i lelei ‘a e tohi kole pea toki faka’ataa ke tuku ki tu’a, kae ‘alu atu pe ‘a e tokotaha ‘o takihala’i kinautolu pea tuku atu ‘a e pa’anga ko’eni. Pea ‘ikai ngata ai ko e tokotaha ‘oku ‘iai hono lekooti faihia na’e osi ngaue popula. Ko Lavulavu ‘oku lalalo holo ‘i he pule’anga lolotonga, koe’uhi ko e ngaahi tokoni ‘a e pule’anga ki he vahenga fili pea ‘oku hangehangee ‘oku nau taketi’i ‘a Lavulavu ke ne fetongi ‘a Dr. Viliami Latu mei Vava’u 16. He ‘oku tui ‘a Piukala ko e huu mai ‘a Lavulavu mo’ene ‘asenita fakafo’ituitui.
Ka na’e faka’ikai’i mamafa ‘e Lavulavu ‘a e tukuaki’i mo e pehee na’e mo’ua ko’ene lohiaki’i ‘a e Potungaue Ako ke ma’u ‘a e pa’anga he founga kakaa. He ko e pa’anga tokoni na’e ‘alu pe ki he ‘Unuaki ‘o Tonga kae ‘ikai koia ‘o hangee ko e tukuaki’i. Pea ko e kau ngaue mei he ‘atita na’anau fakahoko ‘a e ngaue kuo nau mei ‘osi he maloloo mei he ngaue.
Na’e toe malie ko e fakahaa ‘e Lavulavu, ko e ki’i pa’anga ‘oku tukuaki’i ia kiai ko e ki’i pa’anga lefu he ‘oku ‘iai pe ‘ene pa’anga. Ko e ‘Unuaki ‘o Tonga na’e fakamole pe ia ke fakalele ‘a e ‘apiako he ‘oku ‘iai pe ‘ene pa’anga.
Kaekehe ko e me’a ‘oku fai kiai ‘a e tokanga ko e kamata ke ‘asi mai ‘a e kemipeini he founga ko’eni ‘oku tukuaki’i, ko e kole mai ko e me’a ‘a Vava’u, ta koee ko e ‘ai ki he’ene me’a pe ‘a’ana.
Pea ‘oku totonu ke fu’u tokanga ‘aupito ‘a e pule’anga mo e kakai ‘o e fonua, ke ‘oua ‘e faka’aonga’i ‘a e tokoni ‘a e pule’anga ki he kemipeini ‘a e kau taki ‘o e pule’anga mo’enau kau kengi.
