Ulungia ‘a Siapani ‘i Palasila he Ipu ‘a mamani he soka, kanau ikuna loto lau miliona kau poupou.
Ko e lea ia na’e faka’osi ‘aki ‘a e va’inga malie ‘a e timi soka ‘a Siapani (Samurai Blue) pea mo e fonua hau tu’olahi koia ko Palasila. Na’e ‘osi ‘a e taimi kakato ‘oku Palasila 2- 1 Siapani pea ko e va’inga faka’osi ai pe ia ‘a Siapani ki he Ipu ‘a Mamani ‘o e soka ‘oku lolotonga lele ‘i ‘Amelika he lolotonga ni.
Pea neongo ‘a e ulungia ‘a Siapani ka na’e ma’u ‘a e tokanga ‘a e fu’u kau mamata mo e kau mamata va’inga he TV, ‘a e loto mo e laumalie ‘o e faiako mo e timi ‘a Siapani. Pea mo e tui ‘oku ‘ikai ko e ikuna mo’oni ‘a e papa tohi kai, ka ko e loto ‘o e kakai.
‘I he ifi ‘a e fakamaau ko e ‘osi ‘a e taimi pea mahino kuo ulungia ‘a Siapani, na’e loto mamahi ‘a e taha kotoa he kau poupou mo e fonua kae tautefito ki he faiako mo’ene timi. Ka na’e fakahoko he faiako mo’ene timi ha me’a malie ke ne to’oa ‘a e loto ‘o e fu’u kau mamata he va’inga mo e lau miliona he TV. Na’ane ui ‘ene timi ‘o talanoa kiate kinautolu ‘i loto mala’e pea na’anau hanga kotoa ki he feitu’u na’e nofo mei ai ‘enau kau poupou ‘o punou kiate kinautolu.
Ko e fekau leva ‘enau punou ko e kole fakamolemole ki he kau poupou pea mo e kakai ‘o Siapani ke fakamolemole kuo too nounou ‘a e fakahoko fatongia. Pea neongo na’e ‘ikai ke lea ‘aki, ka na’e mahino ia ki he Siapani kotoa ‘a e punou faka’apa’apa mo e kole fakamolemole ‘a e faiako mo’ene timi. Na’e hoko ‘eni ke fakahikihiki’i he ngaahi mitia mo e lau miliona ‘o e kau manako soka ‘a e faiako mo’ene timi, ko e lesoni lelei ‘a e tali ‘a e fo’i pea kole fakamolemole he ‘ikai a’usia ‘a e taumu’a kae ‘ikai ha tuli tonuhia.
Pea kuo loto lelei ‘a e Komiti Soka ‘a Siapani ke fakaloloa ‘a e konutuleki ‘a e faiako ki he 2027 pea ke ne kei tataki ‘a e timi ki he fe’auhi Ipu ‘a Mamani hoko.
Na’e hoko ‘eni ke ‘aukolo ‘atu ‘a e talamonu mo e tohi hounga’ia mei he laumilionna ‘o e kau manako soka he feitu’u kehekehe ‘o Mamani, ki he faiako mo’ene timi ‘i he sipinga lelei kuonau taa. Pea na’e a’u ki he pule lahi ‘o e Soka ‘i Mamani ‘ene tohi fakahikihiki’i ‘a e faiako ‘a Siapani. Na’e ‘ikai ngata pe he kakai mei he fonua kehekehe, ka na’e a’u ki he fu’u lau miliona ‘o Siapani ‘enau polepole ‘i he ngaue lelei kuo fakahoko he faiako mo’ene timi pea ‘oku tui ‘a e tokolahi ‘oku totonu ke tali fakafonua kinautolu ko e kau helo ‘o e fonua.
Na’e ‘uluaki to’oa pe he kau poupou ‘o Siapani ‘a e loto ‘o e kakai, ‘i he hili ‘a e va’inga kotoa pe ‘oku nau ‘iai ke sio he va’inga ‘enau timi, ‘oku nau hiko kotoa ‘a e veve he mamata’anga sipoti pea nau toki mavahe. Pea neongo ‘oku ofo ‘a Mamani, ka ko e nomolo pe ia ‘a e mo’ui ‘a e kakai ‘o Siapani ‘a e me’a ko e mo’ui ma’a mo e tauhi ‘o e me’a kotoa honau ‘atakai ke ma’a.
Pea ‘oku ‘iloa ai ‘a Siapani ko e fonua ma’a taha ‘i Mamani he ‘oku hoko ia ko honau anga fakafonua mo e tuku fakaholo. Pea ko’eni kuo toe ‘ai he faiako mo e timi soka ‘a Siapani ‘a e fo’i ngaue lelei ke hiki hake ai pe ‘a Siapani ki he langilau ‘i Mamani.
Kuo kamata ‘enau foki pea ‘oku ‘ikai kenau foki fakataha ka ‘oku foki he ngaahi vaka kehekehe koe’uhi ko’enau tokolahi mo e ngaahi ‘asenita fakafo’ituitui ‘oku fiema’u ai ‘a e ni’ihi ke foki vave. Ka ‘oku ‘iai ‘a e tui ‘e tali kenau kakato ki Siapani pea toki fakahoko ha katoanga fakafonua ke fakamalo’ia mo fakalangilangi’i ‘a e faiako mo e timi he ngaue lava me’a kuonau fakahoko ke ‘iloa ai ‘a honau fonua.
Kaekehe ka ‘oku kehe ‘a e talanoa ia ki Kolea Tonga mo’ene timi soka. He ‘oku ‘ai ai ‘enau fo’i pea mo e ngaahi tukuaki’i kehekehe kuo fakahoko ki he kau ‘ofisiale mo e kau taki ‘o e soka ‘i Kolea Tonga. Pea ‘oku te’eki ke tu’u lelei honau va’e ki Kolea kuo tu’utu’uni ‘a e pule’anga ke ‘atita’i ‘a e komiti soka mo’ene me’a fakap’anga.
‘Oku fakaloloma ange ko e taimi na’e tu’uta ai ‘a e timi ki Kolea ‘oku lau mo kape atu ‘a e kakai he mala’e vakapuna kiate kinautolu pea ‘oku ‘ikai ko ha talitali lelei mo ha me’a lelei ki he soka ‘i Kolea Tonga.
Ko e soka ko e va’inga pa’anga lahi taha mo manakoa taha ‘i Mamani pea ko hono mamahi’i he ngaahi fonua ‘oku manako soka ‘oku kehe ‘aupito. Ko e ‘ikai ola lelei ha va’inga ha timi ‘oku a’u pe ki hono fakamanamana’i ‘o e mo’ui ‘a e faiako mo e timi pea ‘oku ‘uhinga pehee pe ko e mamahi’i ‘a e va’inga manakoa taha ‘i mamani.
‘I he pasifiki ‘oku ‘ikai manakoa ‘a e va’inga ni, ka ‘oku fika ‘uluaki ‘a e ‘akapulu pea ‘oku tui ‘a e tokolahi ko e ‘uhinga pe ko e kakai ‘o e Pasifiki koe kakai lalahi mo fefeka pea ‘oku nau manako ki he sipoti ‘oku tau sino hangee ko e ‘akapulu.
Ko e timi soka kotoa ‘e 48 na’e kau ki he fe’auhi pea ko’ene a’u ki he timi ‘e 32 ‘oku kamata mei ai ‘a e tau knock out ‘a ‘eni kuo mavahe ai ‘a Siapani. ‘Oku holo hifo ai ki he timi ‘e 16 tau knock out ‘o a’u ai pe ki he kuata, semi mo e fainolo. Ko Nu’usila pe taha mei he Pafisiki na’e kualafai ki he Ipu ‘a Mamani pea ‘oku ne talamai ‘a e tu’unga ‘o e soka he Pasifiki. Ka ‘oku fakatauange ‘e lava ‘a e komiti soka ‘a Tonga ‘o faka’ai’ai ‘a e to’utupu kenau manako he va’inga manakoa taha ‘i Mamani.
