Fokotu’u ke to’o ‘Amelika mei he Ipu ‘a Mamani Soka, lahi uesia kau poupou ‘i he tu’utu’uni visa ‘a Trump
Kuo ‘iai ‘a e fokotu’u mei he ngaahi fonua lahi he mala’e ‘o e soka, ke to’o ‘a ‘Amelika mei he lisi ‘o e ngaahi foua ‘e 3 ‘oku nau fakalele ‘a e Ipu ‘a mamani he soka ‘i he ta’u ni. ‘Aia ‘oku palani ke lele he ‘aho 11 Sune -19 Siulai 2026.
‘Oku Fika ‘uluaki ‘a ‘Amelika he fonua ‘e fakahoko ai ‘a e ngaahi va’inga lahitaha ‘o e fe’auhi Ipu ‘a Mamani pea pehee ki Kanata mo Mekisikou.
Ka kuo lau mano ‘a e kau poupou mei he ngaahi fonua ‘oku ‘i he lisi ‘a ‘Amelika ke fakangatagata pea ta’ofi ‘aupito ‘a e ni’ihi, mei ha’anau folau ange ki ‘Amelika, he ‘ikai kenau lava ‘o folau ke mamata’i ‘a e ngaahi va’inga ‘enau ngaahi timi takitaha, ‘i he tu’utu’uni fakataputapui kuo hilifaki ‘e Trump.
Pea kuo fokotuu ai mei he ngaahi fonua tu’ukimu’a he soka kau ai ngaahi fonua ‘Iulope, ‘Afilika mo Latina ‘Amelika, ke to’o ‘a ‘Amelika pea ta’ofi mo’enau timi soka fakafonua ha’ane kau ki he fe’auhi, koe’uhi ko e uesia kuo hoko. ‘Oku kau ‘eni ha mole lahi ki he FIFA ko e toko laumano he ‘ikai tenau lava mai mei he ngaahi feitu’u kehekehe ‘o mamani ke mamata’i ‘a e fe’auhi Ipu ‘a Mamani ‘o e sipoti lahitaha ‘i mamani.
‘Oku toe ongo lahi ‘a e ongongo ko’eni ki he tafa’aki fakatakimamata ‘a ‘Amelika, ki he ngaahi hotele, falekai mo e ngaahi fakafiefia’anga , he ko e mole lahi kiate kiautolu. ‘Oku ‘ikai ko e kau pisinisi fakatakimamata pe ‘o ‘Amelika, ka ‘oku tautau pe mo Kanata mo Mekisikou, ‘a e mole lahi ‘e hoko ka ‘ikai lava mai ‘a e fu’u laumano kau poupou.
‘Oku fakafuofua ki he $13 piliona ‘e ma’u mei hono fakalele ‘o e Ipu ‘a Mamani. Ko e ngaahi timi kotoa ‘e 48 mo e fo’i va’inga ‘e 80. Ko e lahi ‘o e pa’anga ki he ngaahi pale ko e$727 miliona pea koe $50 miliona ki he timi te ne ikuna ‘a e Ipu ‘a Mamani. Ko e pa’anga si’isi’i taha ke foaki ki ha taimi ko e $10.5 miliona.
Ko e 70-75% ‘o e $13 miliona ‘oku fakafuofua ‘e ma’u ‘e ‘Amelika ko e 10-12% ‘e ma’u ia ‘e Kanata pea ko e 12-15% ‘e ma’u ‘e Mekisikou. ‘Oku fakafuofua ki he toko 700 piliona tenau ‘ahia ‘a e media he tafa’aki kehekehe fekau’aki mo e fe’auhi, ‘o tatau pe ‘a e mitia fakasosiale mo e ngaahi mitia angamaheni.
Ko e pa’anga lahitaha ‘oku ma’u ia mei hono fakamafola ‘o e fe’auhi ‘i he TV, Letio mo e ngaahi mitia kehekehe. ‘Oku fika ua hake ‘a e ngaahi siponisa pea toki fika tolu ‘a e pa’anga ‘oku tanaki ‘i he tikite.
‘Oku tui foki ‘a Trump ko’ene tu’utu’uni ngaue fefolau’aki ko e taumu’a ki he malu ‘o ‘Amelika, ka ‘oku tui ‘a e tokolahi ko hono fakapolitikale’i ia ‘o e sipoti soka.
Ko e fu’u laumano tenau ‘ahia ‘a e fe’auhi, ‘enau nofo’anga mo e kai mo e fakamole ‘enau ngaahi fakafiefia, ko e fu’u pa’anga lahi. Pea ‘oku nasi ‘a e fonua kotoa kenau ma’u ‘a e faingamalie ko’eni kenau talitali ‘a e Ipu ‘a Mamani ‘o e Soka, he ko e fo’i monu lahi.
Kaekehe mei he mala’e ai pe ‘o e soka pea mei he Ipu ‘a e ngaahi fonua ‘o ‘Afilika ‘oku ‘iloa ko e Afcon, kuo tuku atu ha launga ‘a Morocco ki he FIFA hena fainolo mo Senegal. ‘I he miniti faka’osi na’e ‘aka kai ‘a Senegal ‘o huu ka na’e maumau lao ‘a e taha kau va’inga ‘a Senegal pea ifi he Fakamaau ke tautea. Na’e ita heni ‘a e faiako ‘a Senegal ‘o ui ‘ene timi kenau hu kitu’a. Na’e toe feinga atu ‘enau sitaa ‘iloa ko Mane kenau foki mai. Ka ko e pango na’e hala ‘a e ‘aka tautea ‘a Morocco, ke toe hoko atu ai ki he taimi makehe ‘o toki ‘aka kai ‘a Senegal kenau ikuna.
Ka ‘oku launga ‘a Morocco ko’enau huu kitu’a mei he va’inga ‘o meimei lava ‘a e miniti 20. Pea ‘oku ngalingali ka to’o ‘enau ikuna pea fakata’e’aonga’i.
