Fakahaa Piveni tatau hono faka’ilo ia he Komisoni Tau’i Faihala mo e la’ipepa sikaleti. Faka’ilo ki he kaunoa ta’etotonu ngaue ‘a e Fakamaau’anga
‘Oku malie ‘a e faka’ilo kuo fakahoko ki he Minisita maloloo pea mo e memipa Fakafofonga Fale Alea ‘o Tongatapu 7 Piveni Piukala, ki he kaunoa ta’etotonu ‘i he ngaue ‘a e Fakamaau’anga. He kuo tala ‘e Piveni ko e mamafa ‘o e hia ‘oku tukuaki’i ia kiai ‘oku tatau mo e la’ipepa sikaleti pe ko hono ‘ai mahino ‘oku ta’e’uhinga ‘ikai hano mamafa.
Ka na’e fakahaa ‘e he Fakamaau’anga Polisi ‘i he Monite, ke toloi ki he ‘aho 22 ‘o Sune kae fakahuu mai ha’ane tali fakalao ki he tukuaki’i kuo fakahoko kiate ia. Na’e muimui mai mo hono tu’utu’uni malu’i ‘o e Fakafofonga. Pea he ‘ikai ngofua ke ne mavahe mei Tongatapu ni, he ‘ikai ke ne fakahoko ha hia pe fakatalanoa ki ha taha ‘oku ngalingali ‘e kau he hopo ‘oku tukuaki’i ia kiai.
Ko e faka’ilo foki ‘eni ki he’ene kaunga ki he ngaahi fetu’utaki ke tukuange ai ‘a e Sea ‘o e Poate ‘o e Kolisi tutuku Liahona Pita Hopoate, ka ‘oku nofo ‘Amelika. Na’ane ‘i Tonga ‘i he ngaahi me’a fekau’aki mo e kaveinga ‘o e kolisi tutuku pea ko’ene teu foki na’e ta’ofi ia ‘i mala’e vakapuna ‘i he tu’utu’uni ‘a e Fakamaau’anga Polisi. Ka na’e tu’u mai ‘a Piveni ko e Minisita Polisi ‘o fakahoko ‘a e ngaahi fetu’uaki ke tukuange ai ‘a Pita ke folau. Pea ko e ngaahi fetu’utaki ‘eni ‘oku tui ‘a e Fakamaau’anga ‘oku kaunoa he’ene ngaue, ka ko e taha ‘o e sino pule ‘o tolu ‘o e fonua.
‘Oku toe fakaoli ange hono fakahaa ‘e Piukala, ko e ki’i faka’ilo ko’eni ‘oku ma’ama’a ange hono mamafa ‘ana he la’ipepa sikaleti. He ‘e iku ‘eni ke ‘ohake ai mo e ngaahi me’a kehe na’e ‘ikai totonu ke ‘ohake pea ‘oku ne tui ko e ngaahi teke ‘eni pea mei he Palemia malolo Dr. ‘Aisake Eke koe’uhi ko e too kehekehe na’e hoko he fili Palemia.
Na’e toe faka’ohovale hono fakahaa ‘e Piukala, ko e tukuaki’i ia ki he kaunoa ‘oku hala ia. He ko e taha ‘ene fuakava ko e Minisita Polisi mo e memipa he Pule’anga, ke malu’i ‘a e totonu ‘o e kakai ‘o e fonua pea ko e me’a ia na’ane fai ko hono malu’i ‘a e totonu ‘a Pita Hopoate. Pea na’ane fetu’utaki ki he Fakamaau ‘o fakahoko kiai ‘ene fakakaukau pea fakahaa mei he Fakamaau Polisi ‘e fetu’utaki ki he ongo loea kena mea’i. Pea na’e iku foki ke tukuange he kau ngaue ‘o e Kasitomu ‘a Pita ke folau, kae fakakakato mai ‘e Piukala ‘a e pepa na’e fiema’u ka na’e ‘ikai hoko, ‘o tautea’i ai ‘a e ongo ‘ofisa Kasitomu na’e ngaue he mala’e vakapuna.
Kaekehe na’e toloi ‘a e hopo ki he ‘aho 22 ‘o Sune ke ‘omai ha tali ‘a Piiukala ki he’ene tohi faka’ilo pea ‘oatu mo e ngaahi malu’i ke ‘oua na’ane mavahe mei Tongatapu ni pe toe fakahoko ha hia pea malu’i ia he toko ua taki $1000.
‘Oku fakafofonga’i pe ‘e Piukala ia pea ‘oku ne ta’efiemalie ki he founga taa ‘ene tikite hopo he na’e ‘ikai faka’eke’eke ia ke ‘oange ha’ane tali. Ka ‘oku tu’u fakatu’utamaki he ka mo’ua ‘a Piukala ‘e ngali mole ai pe hono sea.
