Halaia Teau ‘i Mo’unga Faletau ki he huu mai faito’o konatapu (meth) fe’unga mo e 6kg. Kaee hao ‘a Mafi Lutui.
Kuo tu’utu’uni ‘a e ‘Eiki Fakamaau Lahi Hon. CJ Malcon Bishop KC, he ‘aho 24 Ma’asi ‘i he Fakamaau’anga Lahi ‘i Nuku’alofa ke halaia ‘a Teau ‘i Mo’unga Faletau, ki he tikite ko e kaunga kau ‘i hono huu mai ‘a e faito’o konatapu na’e fe’unga hono lahi mo e 5846.98g.
Na’e tali tonuhia ‘a Faletau ki he tukuaki’i pea ne fili ke fakamaau’i pe ia ‘e he Fakamaau Lahi. Ko e hopo ni na’e tu’o tolu hono fakahoko, ‘i he ‘aho 14 Jan-4 Feb, 3 – 6 Ma’asi, 11-17 Ma’asi pea mo e kau loea mo e fakamaau kehekehe. ‘I he taimi tatau ‘i he mei ‘osi ‘a e hopo na’e kole ‘e he ‘uluaki loea ‘a e Faka’iloa ke tamate’i ‘a e hopo he ‘oku ‘ikai ha makatu’unga pea ‘oku ta’emaau ‘a e ngaue ‘a e kau Polisi, ka na’e ‘ikai tali ‘e he Fakamaau Lahi pea iku ke holomui ai ‘a e Fakafofonga lao.
Ko e taha ‘o e fakamo’oni mahu’inga he hopo ni, ko e ongo Faka’iloa na’ana loto ke fengaue’aki mo e kau Polisi ka e fakasi’isi’i hona tautea, ka na’ana fengaue’aki mo e Faka’iloa.
‘I he fakamatala fakamo’oni ‘a ‘Ofisi Ake ko e tokotaha ngaue ‘ave uta ‘i he mala’e vakapuna, ‘i he ‘aho ‘e taha na’e lue ai ki falekoloa ‘oku tu’u ange ‘a e me’alele ‘o fakalea mo fakatalanoa ange kiai, ‘aia ko e Faka’iloa ko Teau. Na’e iku ‘one heka he me’alele ‘a e Faka’iloa ‘ona ‘alu ‘o fai ‘ena kai mo Talanoa ange he Faka’iloa ‘a e’uhinga ‘ene fie Talanoa kiai koe’uhi ko’ene ngaue ‘oku fakahoko he mala’evakapuna pea mo’ene fiema’u ke fetuku ‘a e faito’o konatapu ki Nu’usila. Ka na’e ‘osi pe ia pea ‘ikai kenau toe fe’ilongaki kae ‘oleva kuo a’u ki he 2024.
Ko e uike ‘e ua kimu’a he ‘aho 5 ‘Epeleli 2024, na’e a’u ange ai ‘a e Faka’iloa ki honau ‘api ‘o ‘eke ange pe ‘oku ne fie fakahoko ‘a e fo’i ngaue pea ne talaange ‘io. Na’e foki ‘a e Faka’iloa kae ha’u ‘a e me’alele ko e ongo tama ‘e tokoua, ‘o ‘aonge ‘a e kato ‘oku ‘iai ‘a e ngaahi kofukofu ‘i loto. Na’ane to’o ‘a e ngaahi kofukofu ‘o fa’oo ki he kato naunau ‘e taha ‘o fa’o ki he talamu honau ‘api, ka na’e taimi si’i pe kuo a’u ange ‘a e kau Polisi ‘o hua honau ‘api ‘oo ma’u ‘a e faito’o pea ne talaange ko e me’a ‘a e Faka’iloa.
Ka na’e tukuaki’i ‘e he Faka’iloa ‘oku loi ‘a Ake, he na’e feinga ke fakafoki mai ‘a e faito’o mei ai ka na’e ‘ikai ke ne fie fakafoki, ko’ene manavahe ki he kau kengi Comancho pea mo e tama ‘oku ne ‘ilo ka ‘oku ‘ikai ke ne lava ‘o tala. Ko Teau ‘oku ‘iai ‘ene pinisini ko e hono fetuku ‘o e fanga ika mo’ui ki tu’apule’anga, ka ‘oku tukuaki’i ko e fo’i ngaue pe ia ke tokoni ki he faito’o konatapu.
Ko e Fakamo’oni hoko ko e tokotaha ko Joseph Taufa, na’e ngaue ‘aki he kau Polisi ke tauhele’i ‘a e Faka’iloa ke puke. Ko e konga lahi ‘o e ngaue ‘a e tokotaha ko’eni ko hono palani’i he kau Polisi, ‘o a’u ki hono ‘oange ‘a e faito’o konatapu ke ne ngaue’aki mo e pa’anga. Ka kuopau ke ne fetuku ‘a e fakamatala ki he kau Polisi ‘i he taimi kotoa. Ko e fo’i nague ko’eni na’e iku mole ai ‘a e konga ‘o e faito’o konatapu mei he kau Polisi kae ma’u mai ‘a e konga hono puke ‘o e Faka’iloa. Ko e ngaue ‘eni ke lava ‘a Joseph ‘o ofi ki he tama ‘e taha ko Mafi Lutui he koia ‘oku ne ‘ilo ‘a e tama ‘oku taketi’i ko e Faka’iloa.
Ko e ‘ofisa Polisi na’e fengaue’aki mo Joseph ko Tu’amelie Fifita ko e ta’u ‘eni ‘e hiva ‘ene ngaue he tafa’aki ‘o e faito’o konatapu. ‘I he ‘aho 4 ‘Epeleli, na’ana fetu’utaki ai ‘oku ma’u ‘e Joseph ha ICE 1kg mei he tokotaha ko Koli Moa ‘i he hala One Way. Pea na’e toe fakalahi ‘e Fifita ‘a e ICE ke ‘ave kia Mafi Lutui ko e taumu’a ke ‘ave kia’Ofisi Ake ke ‘ave ki Nu’usila, ‘aia na’e puke he kau Polisi. Na’e fakikihi’i he tafa’aki ‘a e Faka’iloa ‘a e tu’unga ‘o e lekooti ‘o e ngaahi faito’o na’e ‘ave kia Joseph, he na’e ta’emaau, ka na’e pehee ‘e Fifita ko e founga ngaue pe ke malu’i ‘a e kau undercover ‘a e kau Polisi.
Na’e ‘iai mo e kau ‘ofisa Polisi kehe na’e kau ‘i he fakamo’oni, ko e ni’ihi ‘eni kau kau he ngaue ki hono fakatotolo’i mo puke ‘a Teau. Na’e kau he fakamo’oni pea mo e pule Talatalaaki SEMisi Lutui ke fakama’ala’ala ‘a e fengaue’aki na’e fakahoko mo e kau Polisi.
Kaekehe ‘i hono aofangatuku ‘e he Fakamaau ‘a e ngaahi fakamo’oni, na’ane tu’utu’uni ai ke halaia ‘a Teau Faletau kae tonuhia ‘a Mafi Lutui. ‘E toki fakahoko ‘a e hilifaki tautea ka ‘oku te’eki mahino pe ‘e tangi ‘a e Teau. Ko e loea ‘a e Teau ko e ongo muli pea ‘oku mahino ‘a e mafi ‘o e kau faihia faito’o konatapu henau ‘omai ‘a e kau loea lelei mei muli. Ka e pango na’e ‘ikai ke ola lelei, ka ‘oku ‘ikai ‘ilo ha taha ko e fakapoi pe kana toki faiva kinaua he tangi ke hao ‘a e Faka’iloa.
