Ikai tali tangi ‘a ‘Etuate Lavulavu ki hono mo’ua $15000 ko e anga ta’efaka’apa’apa ki he Fakamaau’anga
Na’e ‘ikai ke tali ‘e he Fakamaau’anga Tangi ‘i he uike kuo’osi ‘a e tangi ‘a Lavulavu ki he’ene mo’ua he Fakamaau’anga Lahi ki he anga ta’efaka’apa’apa ki he Fakamaau’anga. Na’e fakamaau’i ‘e Fakamaau Lahi Tupou pea halaia ‘o tu’utu’uni ke ne totongi ‘a e $15000 ka na’e ‘ikai ke ne fai kiai pea tu’utu’uni ke taki ngaue popula uike ‘e ua. Na’e iku ke toe fai ‘a e femahino’aki ke totongi ‘e Mr Lavulavu ‘a e $15000, kae totongi fakamahina ki he $1000.
Ka na’e iku ke tangi ‘a Lavulavu ki he Fakamaau’anga Tangi ‘i he ngaahi makatu’unga ‘e nima fekau’aki pea mo e tautea na’e hilifaki ‘oku fu’u lahi. Ka na’e ‘ikai ke tali ‘e he Fakamaau’anga Tangi ‘a e ngaahi taukave ‘a Lavulavu. Pea ko e taha ‘ene taukave, na’e hilifaki hoo tautea ‘oku te’eki vakai’i he Fakamaau’anga ‘ene tu’unga fakapa’anga, ke makatu’unga mei ai ‘a e lahi hono tautea.
Na’e faka’ilo makatu’unga ‘i he’ene fakamatala he ‘aho 26 ‘Okatopa 2022 ‘i he kei lele hono hopo’i ia mo hoa ki he pa’anga ‘o e ‘apiako ‘Unuaki ‘o Tonga. Ko’ene fakamatala ki he kau faiongoongo na’e tuku atu ia ‘i he mitia fakasosiale, na’ane pehee “ Na’e sio ki he kau tangata he pule’anga pea mo e ongo tangata ‘oku na ma’olunga ange kinaua he ‘Eiki Fakamaau Lahi pea ‘oku ne tui na’anau takihala’i ‘a e Fakamaau ‘o tupunga ai ‘a e mole ‘a e mo’oni mei he’ene hopo.” Ko e Fakamaau Lahi he taimi ko’eni ko LCJ Whitten.
Kaekehe ko e fakamatala ‘a Lavulavu he ‘aho 26 ‘Okatopa 2022, ko’ene tali ia ki he fakamatala na’ane fakahoko he ngaahi ‘aho kimu’a ai, ‘aia na’ane pehee ki he kau Faiongoongo, “ Na’e ‘iai ‘a e ni’ihi na’e ‘a’ahi ki he me’a’anga ‘o e ‘Eiki Fakamaau Lahi.”
Ko e ngaahi fakamatala ‘eni na’e faka’ilo kiai pea tu’utu’uni ke ne mo’ua ko e anga ta’efaka’apa’apa ki he Fakamaau’anga.
Na’e fakahoko ‘a e hopo ‘i ‘Okatopa 2023 ‘one taukave’i pe ‘ene ngaahi makatu’unga pea ko’ene toki halaia pea kole fakamolemole. Ka na’e fokotu’u he Kalauni ke ngaue popula mahina ‘e tolu, ka na’e anga’ofa ‘a e Fakamaau’anga Lahi he’ene kole fakamolemole ‘o tautea mo’ua pa’anga $15000. Ka na’e ‘ikai ke fai pau kiai pea tu’utu’uni ke tohi taki ‘o ngaue popula uike ‘e ua. Ka na’e loto ‘a Lavulavu ke ‘ave ki he Fakamaau Tangi pea ‘oku toe ulungia pe.
Ko’ene tu’u leva, ko e totongi ‘e Lavulavu ‘ene mo’ua ka ‘ikai ko e taki ngaue popula.
