Puke kau Polisi ice 6.1kg, me’alele 8 fakataha mo e pa’anga mo e vala kau kengi Comanchero kuo nau ‘i Tonga ni.
‘Oku ‘alu pe taimi mo e toe leleiange ‘a e ngaue ‘a e kau Polisi ki he faito’o konatapu (Police Drug Force) ki hono hakule ‘o e kau faihia ki hono huu mai mo hono tufaki mo fakatau atu ‘a e faito’o konatapu he fonua ni.
‘I he mahina ko ‘Epeleli na’e puke ai ha faito’o konatapu he kalasi ‘o e ice(meth) ko e kilo ‘e hongofulu tupu pea ‘oku fakatatali ‘a e hopo koia ke maau ‘a e ngaue ‘a e kau Polisi.
Ka ‘i he uike ni, kuonau toe tuku mai ‘a e ola lelei ‘enau fengaue’aki mo e potungaue Kasitomu, kenau puke ai ha ice 6.1kg ‘i ha ‘ohofi kehekehe ‘e 2. Ko e malie ko e kau hono puke mo e ngaahi me’alele ‘e 8 fakataha pea mo e ngaahi fu’u paiki he kalasi ‘iloa mo manakoa ‘i mamani ko e Harvey-Davidson.
Na’e kau ‘i he koloa na’e puke ‘a e pa’anga Tonga ‘e $12,056 mo ha misini lau pa’anga ‘e 4, ko e telefoni to’oto’o ‘e 16 mo e ngaahi vala ‘a e kau kengi ‘iloa ‘i ‘Aositelelia mo Nu’usila ko e Comanchero, ‘oku tokolahi ai ‘a e fanau Tonga pea ko’eni kuo nau fakatu’uta ‘i hotau ki’i fonua. Ko e vala lahi ‘o e ngaahi falani mo e ngaahi huti mo e saketi na’e puke ia ‘i he fale pisinisi tauhi koloa (storage) ‘i Ma’unga ko e vala kuo taa kiai ‘a e hingoa mo e faka’ilonga (logo) ‘a e kau kengi ko’eni mei Nu’usila mo ‘Aositelelia.
Ko e ni’ihi kuo puke ko e took 3 ‘oku kau kiai ‘a e ‘ofisa Kasitomu ‘e taha mo e ‘ofisa Sela ‘e taha, ‘o kaunga ki he faito’o konatapu pea mo e fengaue’aki fa’ufa’u ki hono huu mai ‘o e faito’o konatapu pea ‘oku tukuaki’i na’e ‘atamai’i ia mei he Pilisone Hu’atolitoli mei ha taha ‘oku ne lolotonga ngaue popula ki he huu mai ‘o e me’atau ta’efakalao.
Ko e faito’o konatapu kuo puke na’e ma’u ia he ngaahi uta na’e fakafolau mai mei ‘Amelika.
‘I he ‘aho 9 ‘Aokosi na’e puke ai ‘a e 2.6kg ‘o e ‘aisi pea mo hono puke ‘o e took 3 na’e kau ai ongo ‘ofisa ngaue fakapule’anga.
‘I he ‘aho 13-14 ‘Aokosi na’e puke ai kau fefine took 4 mo e kau tangata ‘e toko 9 ‘i he vaha’a ta’u motu’a ko e ta’u 22-49yrs. Na’e puke ai mo e 3.5kg ‘o e ‘aisi fakataha mo e pa’anga, telefoni to’oto’o mo e misini lau pa’anga na’e fai kiai lave ‘i ‘olunga.
‘I he ‘aho 15 ‘Aokosi leva na’e puke ai ‘a e ngaahi koloa vala mei he kautaha uta koloa mei Ma’ufanga.
Ko e ni’ihi kuo puke ko e tokoua ai na’e ‘iai ‘ena kaunga ki he faito’o konatapu lahi na’e puke ‘i he mahino ko ‘Epeleli ‘i he pangike pule mo e ‘api nofo’anga ‘i Vaini. Pea ko e tokoua leva ‘i he kau puke tatau ko e ongo memipa ia ‘o e kau kengi Comanchero.
Kaekehe kuo tuku atu ‘e he va’a ki he Fato’o Konatapu ki he kau faihia, neongo ‘enau tokolahi mo’enau ve’evave ka ‘e a’u atu pe lao kiate kinautolu. Pea ko Tonga ni ‘oku ‘ikai ko e fonua lelei ki he faihia faito’o konatapu ka ‘oku tapu ‘aupito.
Pea ‘oku kole ai pe k au Polisi ki he kakai ‘o e fonua ki he’enau tokoni, ketau ngaue fakataha ki hono malu’i hotau ki’i fonua ‘oku tau laukau ‘aki.
‘Oku hoko ‘a e ngaue puke kuo fakahoko he kau Polisi ke ne ‘omai ‘a e ui mei he kakai ‘o e fonua, ke kamata hono tau’i ‘o e faito’o konatapu mei he loto’i pule’anga. Kuo ‘asi mei he ngaahi potungaue lahi hangee ko Kasitomu, Polisi mo e Pilisone, Pangike Pule mo e Fale Alea ‘a e ni’ihi kuo puke. Pea ko’ene lava hano fufulu ‘a e loto’i pule’anga ko’ene ‘otometiki pe holo ‘a e faito’o konatapu he fonua ni, he ko e ni’ihi ‘eni ‘oku nau kaunga lahi ki he ngaahi koloa ‘oku huu mai mo huu atu.
