Ikuna Alvin Sika ma ‘a Tongatapu 2, ‘Aminiasi Tangimana ma’a Niua 17. Onga tama mahu’inga taha ‘eni ka ‘iai ha VONC he kuo mole ‘ena Potungaue.
Kuo lava lelei hono tuku mai ‘e he Komisoni Fili ‘a e ola ‘o e fili si’i ma’a Tongatapu 2 pea mo Niua 17, hili hono tuku kitu’a ‘a Semisi Sika ma’a Tongatapu 2 mo Tangimana ma’a Niua 17.
Ka ‘oku fakahisitolia ko hono toe fili mai pe ‘e Niua 17 ‘a e foha ‘o Tangimana, ‘Aminiasi Tangimana ke fetongi ‘ene tangata’eiki pea fili mai ‘e Tongatapu 2 ‘a e tokoua pe ‘o Semisi Sika, Alvin Sika ke ne fetongi hono tokoua. Pea ko e tokolahi taha ‘o e kakai na’e fili ki he ongo fakafofonga kimu’a na’anau to e fili kotoa ki he ongo fakafofonga fo’ou, he ko e ongo tangata poupou fefeka taha ia he kemipeini na’e toki ‘osi,
Kaekehe fakatatau mo e fika mei he Komisoni Fili.
Tongatapu 2 Niua 17
Alvin Sika – -609 ‘Aminiasi Tangimana – 435
Siaosi Koloamatangi -262 Sitiveni Selui – 144
Dr. Lei Paasi -248 Paea Filimoehala – 138
Total voters – 1492-(37%) Total voters – 781-(59%)
Total voter register – 4028 Total voters register – 1316
‘Oku talamai he fika ‘a e fu’u too lalo lahi ‘i he fika ‘o e kau fili pea ‘oku ‘iai pe hono ngaahi ‘uhinga kehekehe.
Ko e me’a mahu’inga ‘o e hoko atu, kuo ‘osi hanga ‘e he Palemia ‘o tuku ki ha kakai kehe ‘a e Potungaue ‘o e ongo Minisita na’e fakamalolo’i. Pea ko e me’a pango ko e huu atu ‘a e ongo tama ko’eni he ‘ikai ha’ana faingamalie ki ha lakanga Minisita he ko e ongo poupou ‘o e Palemia. Pea ngali ko e fo’i ta’u ‘e 3 ‘oku toe mai tena ‘ela pe mei he sea fakafofonga ‘o fakalangilangi ai.
Tau sio ange kia Alvin Sika, na’e ‘iai ‘a e ‘uhinga malohi ‘a e feinga ‘a Semisi Sika ke ne huu ki loto koe’uhi ko ha ngaahi fokotu’utu’u mo e visone ki he MOI. Ka kuo lava atu ‘a Alvin ia kuo foaki hono sea ‘a’ana kia Tevita Puloka. Pea foaki ‘a e Sea ‘o Tangimana ki he Minisita Pa’anga lolotonga.
Ko e fo’i pate leva ki he ongo tangata ni ke na toe ma’u ai ‘a e lakanga ni, ko’ena kau ki he tafa’aki ‘a Dr. ‘Aisake Eke ki ha fokotu’u Fili Ta’efalala’anga (VONC) ‘e fakahoko. Ko e fo’i nga’unu koia ‘e ma’u ai fika ke tukuhifo ‘a e pule’anga lolotonga. Pea ‘ikai toe fehu’ia hono ‘aonge ‘a e Potungaue MOI kia Alvin Sika mo ha Potungaue kia Tangimana. Pea ‘oku ‘iai ‘a e tui ko Tangimana ko e Fakafofonga Fale Alea si’isi’i taha ia ke huu ki he Fale Alea ‘o Tonga.
Ko e toko 3 ‘o e kau Minisita lolotonga ko e fili mei tu’a pea ko e taimi ka fakahoko ai ha VONC he ‘ikai ngofua kenau hiki nima. Pea ‘ikai toe ‘iai ha ni’ihi ‘e toe mai ka ko e kau Fakafofonga Nopele pea kapau ko e mo’oni ‘a e finangalo ‘Ene ‘Afio ke ‘oua na’a toe Minisita ha Nopele pea ‘e faingata’a lahi ki he Palemia ke fakafepaki kiai.
Kaekehe ko e fehu’i mahu’iinga taha ki he tokoua ko’eni, pe te na kei poupou ki he Palemia kana ta’utu fakalangilangi ai pe he sea fakafofonga kakai he ta’u ‘e 3 ‘oku toe, pe ko’ena nga’unu ki he kau fakaanga kae lava ke ‘aonga lahiange ‘a e fili kinaua he kakai hona ongo vahenga. Ko e fili koia ‘oku na ‘i hona ‘aofi nima pe.
