Fakatokanga mamafa Tama Tu’i ki he Palemia mo e Fale Alea kenau Faitotonu
‘I hono huufi ‘o e Fale Alea he ‘aho 15 Sanuali 2025 pea mo e too Folofola na’e fakahoko ‘e he kau Nopele ‘e toko 3 ke fakafofonga’i ‘Ene ‘Afio, ko Lord Fakatulolo, Lord Lasike pea pehee kia Lord Fohe.
Na’e ‘ikai toe afe ‘a e too Folofola ‘ene fale’i mo e fakatokanga ki he Palemia mo e Fale Alea kenau faitotonu. Ko e ngaahi folofola mei he tohi Paloveape na’e to’o mei ai ‘a e too folofola ‘o hangee.
Ko e faitotonu ‘oku ne hakeaki’i ha fonua, ka ko e angahala ko e maa’anga ‘o ha pule’anga.
Ka tokolahi ‘a e kau faitotonu ‘oku fiefia ‘a e kakai, ka ko e pule kovi ‘oku langatu’u ‘a e kakai.
Ko e pule ‘oku fakaongo ki he anga kakaa, ‘oku angahala kotoa ‘a e kakai ‘oku tauhi kiate ia.
‘E ‘ikai teke le’ei ‘a e fakamaau totonu, ‘e ‘ikai te ke filifili manako, ‘e ‘ikai te ke tali ha me’a’ofa he ko e me’a’ofa ‘oku ne fakakuihi ‘a e mata ‘o e kau poto, mo piko’i ‘a e me’a ‘oku totonu.
Kaekehe ko e ngaahi konga folofola ongo mo’oni mei he Taloni ki he Palemia mo e Fale Alea he ko kinautolu tenau taki ‘a e fonua. Ko e Palemia kuo foaki kiate ia ‘a e mafai lahitaha ki he pule’anga mo e pa’anga ‘a e kakai ‘o e fonua pea mo’ene kau Minisita. Ko kinautolu tenau faitu’utu’uni, kohai ‘e foaki kiai ‘a e faingamalie ki he ngaahi ngaue mo e pa’anga ‘a e pule’anga.
Ka kuo hanga ‘e he poto ko Solomone ‘o sipela mahino ‘a e nunu’a ‘o ha kau taki kakaa, ta’efaitotonu mo siokita pea mo ha kau taki ‘oku ‘ofa ‘Otua, mo fakamaau totonu.
Na’ane toe fakamanatu ‘a e ta’ulahi ‘o e Konisitutone (150) mo e lotu (200)he fonua ni pea mo honau ngaahi famili, kolo mo e siasi. Ko e taimi tenau faihala ai ‘oku ‘ikai ko kinautolu pe ‘oku uesia ka ‘oku uesia ai ‘a e tokolahi.
‘Oku ‘osi taimi pe ke mahino ki he tokotaha kotoa, mei he Palemia ki he kau fakafofonga kakai ‘a e’uhinga ‘o e too folofola, he ‘oku lahi ta’u ‘a e ta’efaitotonu he ngaahi ngaue ‘a e pule’anga. Pea kuo taimi ke ‘iai ha kau taki ‘oku faitotonu kae hakeaki’i ‘a e fonua mo hono kakai.
Ko e monu’ia ‘anga ‘o Tonga ko e Tu’i mo e Kuini ‘oku na falala ‘Otua, ka ‘oku toe ‘eni ha kau taki ‘oku poupou kiate ia ki hono fakalele ‘o e fonua ‘o fakatatau ki he akonaki ‘a e folofola. Ko e ngaahi ta’u kuo maliu atu mo e longoa’a ‘a e fonua he tukuaki’i ‘a e ngaue kakaa he pule’anga. Pea ‘oku a’u ‘eni ki he pule’anga fo’ou mo e kei tailiili ‘a e kakai he kei hoko atu ‘a e ngaahi fetukuaki ‘o e ngaue ta’efaitotonu.
Ka ‘oku hoko ‘a e folofola mei he tohitapu he too folofola ke fafangu ‘a e kau taki ki ha mo’ui ‘oku faitotonu mo ‘ofa ‘Otua kae fiefia hono kakai.
