Fakatau kelekele famili ke totongi’aki mo’ua $88,000 Faka’iloa ki he fakatau me’alele online kakaa.
Ko e tukunga ia na’e a’u kiai ‘a e ngaue kakaa ‘a e Faka’iloa mei Vava’u ko Lepeka Ofa he Lotu Moala, ka ‘oku to e ‘iloa ‘aki ‘a e ngaahi hingoa kehekehe, ki hono faka’ilo tu’o ua ia ki he ma’u ‘a e pa’anga ‘i he tu’uaki me’alele fakatau loi ‘i he facebook. Ko si’ono hanga ‘e he famili ‘o fakatau atu honau kelekele ke totongi ‘aki hono mo’ua na’e fakakatoa ki he $88,000 pea ke hao ai mei he ngaue popula.
Na’e tala tu’utu’uni ‘a e ‘Eiki Fakamaau Lahi Bishop KC he ‘aho 11 Ma’asi 2026, ke ne hao mei he ngaue popula koe’uhi ko’ene totongi kakato ‘a e pa’anga ‘a e kau mamahi pea tali mo’ene kole fakamolemole. Ka kuopau ke ne ngaue houa 120 ki he komiuniti, muimui ki he fakahinohino ‘a e ‘Ofisa Malu’i Angalelei mo e ngaahi makatu’unga kehe pe.
Fakatatau mo e puipui tu’a ‘o e hia na’e hoko, ko e Faka’iloa na’e fa’u ‘ene peesi loi ‘o tu’uaki ai ko e kautaha ‘ota fakatau me’alele. Na’e sio ai ‘a e ‘uluaki Mamahi Kapiloni mo Mele Tahaafe ‘i Mee 2022 ‘o fai fetalanoa’aki he mitia fakasosiale ke fakahoko ‘a e fakatau me’alele. Ko e me’alele ‘e ua ko e taha ko e Nissan Murano $15500 pea mo e Toyota Dyna $5600 pea ‘e tuuta mai ki Tonga ni mei Siapani ‘i he mahina Sepitema.
Na’e nofo pe Faka’iloa mei Vava’u ‘o ‘atamai’i ‘a e hia na’ane fakahoko. Na’ane ‘ai ‘a e ongo tamaiki ‘i Tonga ‘o hangee ha’ane ongo tamaiki ngaue pea na’e totongi kiai ‘a e pa’anga. Ko e tuai ‘a e totongi ‘o e pa’anga ko hono taa’i ia ki Vava’u ki he Faka’iloa kae to’o ‘a e komisoni ‘a e ongo ngaue ‘i Tongatapu ni. Ko e alea ‘e tu’uta mai ‘a e ongo me’alele ‘i he mahino ko Sepitema. Ka ‘i he’ene a’u kiai kuo ‘iai ‘a e tali kehekehe mei he Faka’iloa ‘o a’u pe ki he block ‘o e peesi facebook.
Na’e hili ia na’e hoko hake ‘ene faihia ki he Mamahi ko Fusi Fisiahi ta’u 50 mei Veitongo, ko’ene sio he tu’uaki ko e fu’u Hilux na’e fe’unga mo e $55,000. Na’e totongi ‘a e $35,000 ki he tokotaha ngaue kehe ia he ‘aho 18 Okatopa 2022. ’I he ‘aho 2 Novema na’e toe totongi ai ‘a e $15,000 pea ko hono ma’u pe ko hono taa’i ia ki he Faka’iloa ki Vava’u hili hono to’o ‘ene komisoni. Na’e femahino’aki ‘e tau mai ‘a e me’alele ki Tonga ni he ‘aho 25 Tisema ka na’e a’u kiai kuo kamata ‘a e loiloi holo ‘a e Faka’iloa.
Na’e toe sio ‘a e Mamahi he tu’uaki ki he me’alele ‘e taha ko e Hummer pea ne fiema’u ke topup ke $65,000 kae tuku ‘a e Hilux, ka na’e a’u ki he taimi na’e alea kiai kuo ‘ikai ke tau mai pea ‘ikai toe tali he faka’iloa ‘ene telefoni mo’ene facebook. Na’e a’u ai pe ‘a e ongo launga ki he kau Polisi pea puke ‘a e Faka’iloa ‘one tali lelei hono tukuaki’i.
Na’e ui ‘ene hopo ‘I he Sanuali ‘o e ta’u ni pea ne tali halaia ki he ongo faka’ilo fakatou’osi. Kae fakatatau mo e fakamatala ko e Faka’iloa ko e ‘ofefine ‘o e Faifekau Penitekosi pea na’e si’i pau ke fakatau he ongnomatu’a honau kelekele ke totongi fakafoki ‘a e pa’anga ‘a e ongo mamahi. Pea ko e ‘uhinga ia na’e hao ai ‘ae Faka’iloa mei he ngaue popula ko hono totongi ‘osi hono mo’ua.
Ko e palopalema lahi ‘ene hoko pea kuo ngaue popular ai ‘a e ni’ihi ka ‘oku ki’I holo mai ‘ene toe ‘asi koe’uhi ko e tokolahi ‘o e kau ngaue popula.
