Fakafisi pongipongia Sea Utilities kae ‘ikai tali he Palemia
Ko e me’a fakaloloma ia ke ‘asi mai mei he pule’anga lolotonga mo’enau ngaahi fokotu’utu’u fo’ou, ko e fakafisi pongipongia ‘a e Sea (‘Ipolito Lasalo) ki he Poate ‘o e Kautaha Pisinisi mahu’inga taha ‘a e pule’anga, ko e Kautaha ‘Uhila, Vai, Kasa mo e Veve.
Na’e faka’ohovale hono ‘ohake ‘a e me’a ni ‘i he Konifelenisi mo e tokoni Palemia, ‘o tali lelei ‘e he Minisita ki he Ngaahi Pisinisi ‘a e pule’anga Hon. Piveni Piukala, ko e mo’oni na’e ‘osi fakahuuange ‘a e tohi fakafisi ‘a ‘Ipolito Lasalo ka na’e ‘ikai ke tali ‘e he Palemia ‘ene fakafisi. Na’e ‘ikai ke tuku mai ‘a e ‘uhinga ‘ene fakafisi, ka ‘oku mahino ‘a e feinga ‘a e pule’anga ke malu’i hono ongoongo mo’ene falala’anga, ke ‘oua ‘e ‘asi kitu’a kuo fakafisi pongipongia ‘a e Sea ki he Utility.
Kapau ‘e tali ‘ene fakafisi pea ‘e ‘asi mai ‘oku ‘iai ‘a e palopalema ‘oku hoko he fili fo’ou ‘o e kau Talekita, he na’e kau ‘eni he kaveinga talanga’i koe’uhi ko hono kaniseli ‘e he pule’anga ‘a e fakaloloa he pule’anga maloloo ‘a e teemi ngaue ‘o e kau Talekita motu’a. Pea ‘oku te’eki ke malona hifo ‘a e longoa’a kuo pavaki mai ‘a e ongoongo faka’ohovale ni.
Na’e ma’u he ongoongo ni ‘i he uike kuo’osi ‘a e fakamatala falala’anga, kuo fakamaloloo’i he Kautaha ‘a e CEO fakataimi maloloo (Finau Moa) ‘a e Tonga Power pea ko e uike ni kuo ongona mai ‘a e tohi fakafisi ‘a e Sea.
Ko e taha ‘o e ngaue mamafa kuo tu’utu’uni ‘e he Minisita ki he Tonga Power, ke a’u ki he Sanuali ‘o e ta’u fo’ou kuo holo ‘o seniti .70 ki he kilouate ‘a e ‘uhila. Ko e tu’utu’uni ko’eni ‘oku talanoa ‘i he lau miliona ‘e holoki’aki mei he seniti ‘e 97.78 ki he seniti ‘e .70.
Ko e kaveinga mamafa ‘e taha ‘i he Tonga Power ko hono kumi ha kautaha ke langa ‘a e faama solar ko e tokoni ki he pule’anga ke ma’ama’a ‘a e ‘uhila. Na’e ‘osi maau ‘a e ngaue ni, ka ‘oku sasala mai ‘a e talanoa ‘oku ‘iai ‘a e kautaha ‘oku loto kiai ‘a e Minisita pea ‘oku ‘iai ‘a e Nopele ‘ene ‘Afio ‘oku kaunga ki he kautaha ko’eni.
Kaekehe ‘oku ‘ikai ke ‘ilo pe koeha ‘a e ‘uhinga ‘o e fakafisi, ka ko e ngaahi me’a pe ‘eni ‘oku fai kiai ‘a e vavalo ki he ‘uhinga lahi ka fie fakafisi ai ‘a e Sea.
