Fakata’e’aonga’i Fakamaau’anga Lahi tu’utu’uni ‘a e PSC ke fakamaloloo’I tokoni Sekelitali Potungaue ki Muli.(Toakase Panisia Palelei)
Kuo tu’utu’uni ‘a e ‘Eiki Fakamaau Lahi CJ Michael Whitten ke lii kitu’a ‘a e tu’utu’uni ‘a e PSC he ‘aho 21 Tisema 2022, ke fakamalolo’i ta’evahe ‘a e tokoni Sekelitali ‘a e Potungaue ki muli Toakase Panisia Palelei, ‘i he ‘uhinga faka’ulungaanga (preach of discipline).
Fakatatau ki he hisitolia ‘o e fakatonutonu fakalao ‘o e me’a na’e hoko, ‘i he ‘aho 14 Novema 2022 na’e ‘oatu ai ‘a e tohi mei he Minisita ki Muli Mrs. ‘Utoikamanu ki he Sekelitali mo e kau ngaue ‘o e Potungaue kau ai ‘a e Mamahi, ha tu’utu’uni pe ngaue ke fakahoko. Ka na’e tu’utu’uni mei he PSC ke ‘oua fai ha tali mei he kau ngaue ki he tohi ‘a e Minisita.
‘I he ‘aho 18 Novema 2022, na’e toe ‘oatu ai ‘e he Minisitaa ‘a e tu’utu’uni tatau ki he kau ngaue ke fakahoko kimu’a he 2:30pm ‘o e ‘aho koia. Ka na’e ‘ikai pe ha tali mei he kau ngaue pea na’e launga ai ‘a e Minisita ki he PSC, ‘o tukuaki’i ‘a e Mamahi ki he maumau’i ‘a e tu’unga faka’ulungaanga ‘a e potungaue ‘o fakatatau ki he Regulation 5 PSC (Preach of Discipline).
‘I he kupu’i lao ko’eni ‘e fakahoko he CEO ‘o e Potungaue ha fakatotolo ki he tukuaki’i ‘oku fakahoko pea fakahuu atu ha lipooti kakato ki he Minisita ‘o e ola ‘o e fakatotolo.
Ka ‘i he ‘aho 10 Fepueli 2023 na’e pehee ai he Sekelitali ia ‘o e Potungaue he ‘ikai ke ne kaunoa ia ha me’a fekau’aki mo e tokoni Sekelitali, ka na’e tautea ia he komiti he ‘aho 1 Ma’asi ki he maumau’i tu’unga faka’ulungaanga. Ka na’e tu’utu’uni ‘a e Fakamaau’anga lahi ke fakatatali ‘a e tu’utu’uni ke fakamalolo’i ta’evahe, kae livi maloloo kae fakahoko ‘a e fakatonutonu fakamaau’anga.
Na’e tui ‘a e Mamahi ‘oku ta’efakalao ‘a e tu’utu’uni na’e fakahoko, he na’e ‘ikai ha lipooti ‘o e ngaue ‘okuu tu’utu’uni he kupu 5, ke fakahoko he CEO ha fakatotolo mo ha lipooti, ka na’e ‘ikai ha me’a pehee mo ha lipooti ke ‘oange kiai ke sio ki he tukuaki’i. Ka na’e tui ‘a e PSC ‘oku ‘iai pe mafai ‘a e potungaue kenau fakahoko ‘a e tu’utu’uni ‘o fakatatau mo’enau tu’utu’uni ngaue.
‘I he ‘aho 16 Sune 2023 na’e fakahoko ai he Fakamaau’anga hono vakai’i ‘a e lau ‘a e PSC pe ‘oku fakalao ‘a e ngaue na’anau fakahoko pea ‘i he ‘aho 17 pe Sune na’e fakahaa ai ‘e he fakafofonga lao ‘a e pule’anga ‘oku ‘ikai tonu ‘a e tu’utu’uni na’e fakahoko.
Na’e tu’utu’uni ai pe ‘a e Fakamaau’anga ke fakata’e’aonga’i ‘a e tu’utu’uni ‘a e PSC he ‘aho 21 ‘o Tisema pea mo e tu’utu’uni ‘a e Komiti he ‘aho 1 Ma’asi pea fakafoki ki he PSC kenau toe vakai ki he tu’utu’uni na’anau fakahoko.
Ko e 75% ‘o e fakamole ke totongi ia ‘e he PSC.
Ko e me’a foki ‘oku fakatupu fifili he fakatonutonu fakalao ko’eni, ‘oku te’eki ke haa mai ia koeha koaa ‘a e tu’utu’unii mei he Minisitaa ‘a e ngaue ke fakahoko pea koeha ‘a e ‘uhinga na’e ‘ikai loto ai ‘a e Sekelitali mo e kau ngaue ke fakahoko ‘a e tu’utu’uni mei he Minisita pea koeha ‘a e ‘uhinga na’e tuku ai kitu’a ‘a e tokoni Sekelitali, ka na’e talangata’a kotoa ‘a e Sekelitali mo e kau ngaue.
