Ta’ofi Potungaue Savea vaeua ‘o e lipooti mei he ‘Atita ke faingata’a ma’u ola totonu ki he ngaue Potungaue ni.

Na’e ‘ikai ke toe afe ‘a e lipooti ‘a e ‘Atita ki he Potungaue Savea ke ne ngaue’aki ‘a e fo’i lea ko e TA’OFI, ke fakamatala’i’aki ‘a e fakafeangai ‘a e Potungaue ki he ‘Atita. Ko e ngaahi lipooti lahi ko e ‘ikai ma’u ‘a e lipooti pea ‘uhinga ai ‘a e ‘ikai kakato ‘a e ‘atita. Ka ko e fakatu’utamaki ‘o e Potungaue Savea, he ‘oku ma’u pe ‘a e lipooti ka ‘oku ta’ofi ia ke ‘ave ki he ‘Atita ke vakai kiai. Ko e fehu’i leva pe koeha hono ‘uhinga ‘oku ta’ofi ai pea ‘oku ‘iai nai ha lao ‘o e ‘Atita ke tu’utu’unia ‘a e ngaahi Potungaue ke ‘ave ‘a e fakmatala ki he ‘atita ‘i he taimi ‘oku fiema’u ai.

Ko e ngaahi fakamatala mahu’inga leva ‘eni na’e ‘ikai lava ia ‘o ma’u he ‘Atita:

Lesisita mo e Lisi lolotonga ‘i he kelekele Talifaki ‘a e Pule’anga.
Lesisita mo e Lisi na’e lesisita tu’o ua ‘oku te’eki lava ‘o solova lolotonga ‘a e taimmi ‘o e ‘atita.
Ko e Lesisita mo e Lisi na’e lesisita tu’o ua na’e lava hono solova.
Ko e Lesisita ‘oku fakahoko ha fakatonutonu kiai kau ai mo e ngaahi fakatonutonu ‘oku ‘i he Fakamaau’anga.
Lesisita ‘o e Lisi kotoa pe.
Lisi ‘o e kelekele kotoa pe na’e vahe lolotonga ‘a e ‘atita.

‘Oku fakatupu fifili ki he kakai ‘o e fonua pe koeha koaa ha ola na’e mei lipooti ‘e he ‘Atita kapau na’e ‘omai ‘a e ngaahi fakamatala ni. He ko e ngaahi me’a mahu’inga ‘eni ‘oku fekuki mo e kakai ‘o e fonua, fekau’aki mo’enau ngaahi fiema’u fakakelekele.

Ko e kaveinga mahu’inga ‘e taha he lipooti ‘atita ki he Potungaue ni, ko’enau lao fakaangaanga ki hono vahe ‘o e ngaahi ‘api ke ‘iai ha konga ai ko e kelekele talifaki ‘a e Pule’anga. ‘Oku te’eki foki ke tuku mai hono fakaikiiki ‘o e lao fakaangaanga ni ke fai ha vakai kiai.

Ka ‘i he lipooti na’e fiema’u ai ke fakatokanga mamafa ‘a e CEO ki he kau ngaue ke tuku ‘enau takihala’i ‘a e kakai ‘o e fonua ‘oku a’i ke vahe ‘enau kelekele, ‘aki ‘enau hoko ko e kau fakafofonga tu’u vaha’a pea mo hono malanga’i ‘o e kaveinga ki he kelekele talifaki, he ‘oku te’eki fakalao ‘a e lao fakaangaanga ni. Ka kuo malanga’i ia he kau ngaue ki he kakai ‘o e fonua ‘o hangee ko ha lao kuo ‘osi fakamo’oni huafa kiai ‘a e Tama Tu’i.

Kuo faka’ilonga’i ‘a e Potungaue Fonua ki he Potungaue launga’i lahi taha ‘o fakatatau ki he lipooti ‘a e ‘Omipatimeni, koe’uhi ko e lahi ‘a e launga mo e fakatonutonu ki he kelekele ‘a e kakai. Kae tautefito ki he ta’emaau ‘a e ngaahi ngaue mo e lekooti ‘o e kelekele ‘o e kakai ‘o e fonua.