Halaia kotoa kau Faka’iloa toko 8 ki he pekia ‘a e talavou mei Pahu he ta’u kuo’osi
Kuo tu’utu’uni ‘a e ‘Eiki Fakamaau Lahi ‘a Tonga ke halaia kotoa ‘a e kau talavou ko e tokolahi mei Ha’ateiho mo e tokotaha pea mei Fo’ui ka na’e nofo fakatamaiki pe ‘i Ha’ateiho, ki he ngaahi tikite na’e faka’ilo kinautolu kiai, ki he pekia ‘a Toni Lopeti mei Pahu.
Ko kau Faka’iloa na’anau taki 3 kotoa ‘a e tikite. Ko e Faka’iloa ko Mesui Finau na’e ki’i kehe ‘ene tikite. Ko e tikite ‘uluaki na’e faka’ilo ia ki he “fakahoko loto kiai mo e ni’ihi ‘a e fakalavea lahi ‘o lavea ai ‘a e ‘uto ‘o e pekia ke fakatupunga ai ‘ene pekia. Ko e tikite (2) ko’ene toutou taa ki he ‘ulu ‘a e pekia mo hono mata ‘aki ‘a e va’a sii ‘o hoko ai ‘a e lavea lahi ki hono mata. Pea ko e tikite hono (3) ko’ene toutou hokohoko atu hono taa ‘a e pekia ‘aki ‘a e va’a sii ki he ‘ulu mo e mata ‘o e pekia.
Ko e toenga leva ‘o e kau Faka’iloa ‘e toko 7 ko Tevita Lisiate, Moana Masima, Richard Vea, Mafua-i-vaha Palu, Siosifa Vatuvei, Viliami Tongamana pea mo Salamani Filikitonga, na’e faka’ilo kinautolu ki he hia tatau, ‘i he tikite ‘e 3 ki he tokotaha.
Na’e faka’ilo kinautolu ki he (1) Kaunga hia ki he taa ki he ‘ulu ‘o e pekia ‘o hoko ai lavea ki hono ‘uto mo e mata. Ko e tikite hono (2) na’e faka’ilo taautaha kinautolu ki he taa na’anau fakahoko ki he pekia pea ko e (3) na’e faka’ilo kinautolu ki he fakalavea ma’ama’a ‘iai na’anau ‘osi tali halaia kotoa kinautolu ki he tikite fika 3.
Kaekehe kuo mahino ‘a e faitu’utu’uni ‘a e Fakamaau pea ‘e tali leva ai ki he hilifaki honau tautea.
‘Oku tu’u fakatu’utamaki ‘a e hopo ni, koe’uhi ko’enau halaia ki he hia taa ‘o tupunga ai ‘a e mate ‘a e pekia, ka ‘e toki aofangatuku ‘a e Fakamaau’anga koeha ‘a e lahi ‘o e tautea ‘e fakahoko ki he kau Faka’iloa. Ko e tokolahi foki ‘o kinautolu ko e to’utupu ‘oku te’eki kenau ma’u hoa.
Ko e hia foki ko’eni ‘eni na’e ‘osi ‘oatu ‘e he ongoongo ni, ‘a e faka’ikiiki ki he me’a na’e hoko. ‘Aia ko e kee ‘a e fanau mei Ha’ateiho pea mo e fanau mei Pahu ‘i he toumu’a ‘o e Fifita House ‘i Mailetaha, he ‘aho 17 Sepitema 2023.
Na’e fai ‘a e fe’ohofaki ‘o lele ‘a e fanau mei Pahu kae ma’u he fanau mei Ha’ateiho ‘a e pekia ‘o taa. Ko Mesui leva na’ane ngaue’aki ‘a e va’a sii ki hono taa ‘ulu pekia mo e mata ‘o tupunga ai lavea lahi ‘aupito pea ‘oku tukuaki’i ki he mate ‘a e pekia. Ko e toenga na’anau kau hono tuki mo ‘aka ‘a e pekia lolotonga ‘oku ne tokoto he kelekele.
Na’e ‘ikai tali ‘e he ‘Eiki Fakamaau Lahi ‘enau taukapo na’anau fu’u konaa. Ka na’ane fakama’ala’ala ko e natula ‘enau hia na’e fakahoko na’anau ‘ilo lelei pe ‘enau me’a na’e fakahoko ‘o hangee ko e lele mo e puna mo e tuki moeha fua.
Na’e ‘ikai kenau tali mo e poini, ko’enau malu’i kinautolu (self defence), he ko e tu’unga na’e ‘iai ‘a e pekia na’ane ‘osi too ki lalo ‘ikai toe lava ‘o fai ha me’a, ka na’anau kei hoko atu pe hono taa ‘o iku ki he mate ‘a e pekia.
‘I he lao ‘a Tonga, ko e halaia ki he “fakapoo”, ‘aia ko e fai ‘i he ‘ilo pau mo e loto kiai ke mate ‘oku tautea ngaue popula ki he mate. Ko e hia ki he “tamate tangata” ‘aia na’e ‘ikai ke taumu’a ia ke mate ka na’e hoko ia ke mate ai ‘oku fa’a tautea ngaue popula pe.
‘E muimui’i atu he ongoongo ni ki he hilifaki tautea ‘a e Fakamaau’anga, ki he kau Faka’iloa.
