Kole fakamolemole kautaha langa Siaina henau ngaue Sapate
Kuo fakahaa ‘e he Palemia ‘o Tonga ki he Fale Alea ‘a e ola ‘o e ngaue na’e fakahoko ki he hoha’a mei he Fakafofonga Tongatapu 10 Mr. Lanumata, ki he ngaahi hoha’a mei he kakai ‘o e fonua. Ko e hoha’a ‘eni ki he vitio na’e tuku holo ‘i he ope fekau’aki pea mo e kautaha Siaina ‘oku fai ‘enau ngaue he ‘aho Sapate ‘i Lapaha.
Na’e fakahaa ai ‘e he Palemia ki he fale ‘aneofi ke tukuange ke vakai mu’a ki he ongoongo ko’eni, he ‘oku ‘ikai ha’ane ‘ilo ki he kaveinga ni.
Ka ‘i he ava pe ‘a e fale ‘i he pongipongi ‘o e ‘aho ni na’e fakahoko atu ai ‘e he Palemia ‘a e ola ‘o e ngaue na’e fakahoko. ‘Aia na’e ‘omai ‘e he kautaha Siaina ‘enau kole fakamolemole ki he Palemia mo e fonua.
Na’e toe fakaloloma foki ia ko e toe ‘omai ‘enau ‘uhinga, na’e makatu’unga ‘enau ngaue koe’uhi ko e fu’u ‘uha lahi na’e hoko pea kapau he ‘ikai tenau ngaue fakavavevave pea ‘e ‘iai ‘a e uesia ki he langa.
Ka na’e fakahaa ‘e he Palemia na’e ui ‘a e kautaha ‘o fakahoko kiate kinautolu, kenau muimui ki he lao ‘o e fonua ‘o tatau ai pe koeha ‘enau ‘uhinga. Pea ka ‘iai hanau palani pe fiema’u pea kenau fetu’uaki ki he Potungaue ‘oku nau fengaue’aki.
‘I he teuteu ki he FORUM, na’e faka’ataa ai he pule’anga ‘a e kautaha Siaina ‘oku nau langa ‘a e mala’e sipoti ‘a Tonga High kenau ngaue ‘i he ‘aho Sapate, koe’uhi ke fakavave’i ‘a e langa ke ‘osi ki he ‘aho ‘e fakaava ai ‘a e FORUM. Na’e hoko ‘eni ke longoa’a ai ‘a e kakai ‘o e fonua.
Kaekehe ‘oku totonu ke mahino ki he kau taki ‘o e pule’anga, ko e mata’ikoloa ‘a e Tonga ko e lotu pea ‘oku totonu kenau fakaalaala ‘aupito mei he’enau faitu’utu’uni ke uesia ai ‘a e lotu. Pea kapau ‘oku ‘iai ha pule’anga ‘oku ne loto ke pole’i ‘a e mata’i koloa ‘a e Tonga ‘a e lotu pea ne teuteu ia ki he ngaahi palopalema te ne fe’ao moia.
‘Oku toe fakatokanga’i foki heni ‘a e ‘ikai ke fakamamafa’i he taimi ‘oku fakahoko ai fakamo’oni ‘a e ngaahi me’a mahu’inga kau ai ‘a e ngaue he Sapate. Pea ‘oku ‘iai ‘a e taimi ‘e ni’ihi ‘oku taka ‘ai’ai noa’ia ‘a e kau muli pea mo ta’etokanga’i ‘a e me’a ‘oku mahu’inga taha ki he Tonga.
