Fakamanatua ‘Isileli ta’u taha ‘ohofi fakatautoitoi fakalilifu ne fai he Hamas
Na’e fakamanatua he pule’anga ‘Isilelei ‘a e ta’u ‘e taha ‘a e ‘ohofi fakatautoitoi na’e fakahoko ‘i he ‘aho 7 ‘Okatopa ta’u kuo’osi, he Hamas ‘a e ki’i kolo ofi ki he kau’afonua mo Palesitaine. ‘Oku taku ko e kau ‘eni he ‘aho fakamamahi ki ‘Isilelei talu mei hono tamate’i fakatokolahi kinautolu ‘e Hitler na’e ui ko e Holocaust.
‘I he me’a ‘a e Palemia Benjamin Netanyahu he lolotonga ‘a e polokalama fakamanatu, na’ane palomesi ai ki he kakai ‘o e ‘Isileli kuopau ke tau ‘a ‘Isileli ki he ngata’anga.
Na’e talu mei he ‘aho ko’eni mo hanga atu ‘a ‘Isileli ‘o fufulu ‘a e kau Hamas mei honau ngaahi ‘apitanga mo e toitoi’anga pea maloloo mo ha 41,000 ko e vahe tolu taha ko e fanau pea lavelavea mo e toko 100,000 tukukeke ange ‘a e lauafe ‘oku ta’omia pea ‘ikai ma’u honau ngaahi sino pea ko e toko 1.9 miliona kuo kumi mo’ui mo mavahe mei honau ngaahi ‘api . Ka ko e feinga ‘eni ‘a ‘Isileli ke sauni’i pea faka’auha ‘a e Hamas, koe’uhi ko’ene tu’u fakatu’utamaki ki he malu ‘a ‘Isileli pea pehee ki he kakai ‘Isileli kuo nau puke fakamalohi’i mo tamate’i.
Ka ‘i he uike kuo maliu atu kuo kamata moluu ‘a e Hamas, kuo ‘asi mai ‘a e kulupu ia ‘e taha ko e Hezbollah mei Lepanoni ‘o fana loketi ki loto ‘Isileli ka ‘oku poupou fefeka mai ‘a Iran mei mui. Pea kuo hanga atu ‘a ‘Isileli ‘o fakatokanga ki he kakai siviliane ‘i Peiluti ko e kolomu’a mo e ‘apitanga ‘o e Hezbollah kenau mavahe ki he ngaahi feitu’u malu, he ko e taimi tenau ‘alu atu he ‘ikai ha toe ufi. Kuo hola ai ‘a e tokolahi mei honau ngaahi ‘api pea fakatu’uta ‘a e ngaahi laulapuna ‘a e ‘Isileli ‘o pomu ‘a e kolomu’a ke ‘au ki he faka’ofa mo’oni. Pea kuo mate ai ha toko 1400 pea hee holo ‘a e toko 1 miliona ‘ikai ha nofo’anga he uike pe ‘eni ‘e 3 ‘a e ‘ohofi ‘e ‘Isileli ‘a e Hezbollah.
Kuo ‘iai ‘a e fakaanga lahi mei he ngaahi fonua ‘Alepea mo e ngaahi fonua kehe pe, ki he laku pomu ‘oku fai ‘e ‘Isileli ko e mate ‘a e kakai. Ka ‘oku ‘ikai ke pehee atu ‘e ‘Isileli ia koeha ‘a e lau mai, he ko’ene ngaue ‘a’ana ke malu’i hono kakai.
Na’e toe tuku atu mo e fakatokanga ki Iran kenau talitali pe ko e ‘alu eni ‘a e totongi fakafoki ‘o e ngaue kovi ‘oku nau fakahoko ko hono fana ‘o e ngaahi misaela ki loto ‘Isileli. Ko’ene fufulu atu ke ma’a ‘a e fanga ki’i kau toitoi ‘oku ofi ki ‘Isileli pea ‘au atu ai pe ki Iran ‘o tautea’i kinautolu.
Ka ‘oku feinga ‘a e ngaahi fonua lahi ‘o kau ai ‘a ‘Amelika ke ‘oua ‘e hoko hono ‘ohofi ‘e ‘Isileli ‘a Iran he ‘e hoko ai ha taulahi ‘a mamani hono 3. Pea ‘oku ki’i momou pe ‘a ‘Isileli ko ‘Amelika ko hono hoa ngaue mamae.
Kaekehe ‘i he lea fefeka na’e fakahoko ‘e Natanyahu ‘i he fakataha’anga ‘a e UN he uike si’i kuo maliu atu ‘i New York, na’e tu’u ai ‘a e konga lahi ‘o e kau fakafofonga ‘o e ngaahi fonua Alepea ‘o huu kitu’a lolotonga ‘ene lea pea pehee ki he ngaahi fonua ‘oku ‘ikai tui tatau mo ‘Isileli. Ko e fakahaa ‘enau ta’efiemalie.
Ka ‘oku ‘ikai ha teki atu ‘e taha ‘a e Palemia, he ko’enau ngaahi fakaanga ka kohai na’ane ‘uluaki kamata ‘a e tau ka ko kinautolu ka kuo hangee kuo tukuaki’i ‘a ‘Isileli koia ‘oku kovi.
‘Oku ‘alu atu foki ‘eni ke huu mai ‘a e kau takilotu ‘Isilami ke uki ‘a e tau fakalotu ke fusi mai ‘a e kotoa ‘o e ngaahi fonua Mosilemi kenau kau fakataha ko e tau fakalotu (holy war). Ka ‘oku tui ‘a e tokolahi he lotu Kalisitiane ko e ngaahi kikite ‘a e tohitapu fekau’aki mo ‘Isileli ko e kakai fili ‘a e ‘Eiki, ko e kamata ‘eni hono fakahoko ‘o e ngaahi kikite koia ‘i he tau ‘oku lolotonga hoko.
