Ma’u mahafu tau he Fiji Airways ‘i Nadi ko e hu’u mei Tonga, fai sio ki he kau ngaue mala’evakapuna ‘i Tonga
‘Oku fakatumutumu atu ‘a e kau ngaue Polisi ‘a Fisi pe na’e angafefe ‘a e hao atu mei he kau ngaue le’o ‘a Tonga, ‘a e mahafu ‘o toki puke he kau Polisi ‘i he mala’e vakapuna Nadi.
Ko e ma’u ‘eni ‘i he vaka na’e folau atu mei Tonga ‘i he Tu’apulelulu uike kuo’osi. Pea ko e sio ‘a Fisi ‘oku nau sio taha mai ki he kau ngaue mala’evakapuna ‘a Tonga kae tautau tefito ki he kau ngaue pe Airport Security. Pe na’e angafefee ‘enau founga ngaue kae hao atu ‘a e mahafu tau ta’efakalao ko’eni ‘i he’enau misini sivi.
Ko e ngaahi vaka ‘oku tu’uta mai ki Tonga ni, ko e ngaahi vaka mei Fisi ‘oku makehe hono sivi ‘o hange ko hono fakakau mai kiai mo e kuli le’o ‘a e kau Polisi. ‘I he ‘a’ahi ‘a e kau faiongoongo mo e CEO ‘o e Kasitomu, na’e fai ai ‘a e fehu’i ‘a e ongoongo ni pe kofe’ia ‘a e taimi ‘oku ‘i mala’evakapuna ‘a e kuli le’o, he ko e taimi ko’eni na’e tu’uta ai ‘a e taha ‘o e ngaahi vaka ‘o e Air Nu’usila, ka na’e ‘ikai fakatokanga’i ‘e he ongoongo ni ‘a e kuli le’o. Na’e pehee ‘e he CEO ko e ngaahi vaka mei Fisi ‘oku toki ngaue’aki kiai. Pea ‘oku ‘iai ‘a e tui, ‘oku felave’i lahi ‘eni mo e faito’o konatapu ‘oku fetuku holo he vaha’a ‘o Tonga mo Fisi pea kuo kau atu ‘eni mo e mahafu tau.
Fakatatau mo e fakamatala ‘a e Fiji Times, na’e ma’u ‘a e mahafu ‘i he taha ‘o e kau pasese na’e hifo ia kae tuku he loto vaka. Pea mahalo ko’ene mahamahalo ‘e ma’u pea li’aki ia kae hifo.
‘I he vakai koia, ‘oku mahino ko e founga pe ‘e 2 na’e lava ‘o huu mai ai mei Tonga. Ko e ‘uluaki na’e tukuange pe he kau ngaue le’o. He ko e mahafu ko’eni kuopau ke ma’u ia he misini scan. Ko e founga hono ua, na’e toki piki ia ‘i loto na’e ‘ave ia kiai ‘e ha taha ngaue he taha ‘o e ngaahi kau ngaue ‘i mala’evakapuna, ‘o hangee ko e kau le’o, kau ngaue uta pe ko e kau kilina.
‘Oku lolotonga ngaue popula ha tangata’eiki mei Hihifo ko hono ma’u mo e faito’o konatapu he mala’evakapuna ko e fakataumu’a ke ‘ave ki Fisi. Na’e totongi he tokotaha ni ia ‘a e taha ‘oe kau ngaue kilina ke ne tuku ki loto ki he feitu’u ‘o e fakahekeheka pea ke toki huu atu ia ‘o piki mei ai. Pea ‘oku ‘iai ‘a e tui ‘oku natula tatau pe mo e keisi ko’eni.
