Hokosia ta’u 100 Palesiteni ‘o e Siasi ‘o Sisu Kalaisi ‘o e Kau Ma’oni’oni ‘o e Ngaahi ‘Aho Kimui ni
Ko e maka maile mo e fakahisitolia ki he Siaosi ‘o Sisu Kalaisi ‘o e Kau Ma’oni’oni ‘o e Kau Ma’oni’oni ‘o e Ngaahi ‘Aho Kimui ni ‘a e hokosia honau taki, ‘oku ‘iloa ko e Palofita, ka ko e Palesiteni fakakatoa ‘o e Siasi ‘i mamani, ‘a hono ta’u 100 ‘i he ‘aho ni ko e ‘aho 9 Sepitema 2024.
Pea kuo fakahoko ai ‘e he Siasi ha ngaahi polokalama fakalangilangi ko ho fakafiefia’i ‘a e tau fakahisitolia kuo a’usia he Palofita. Pea ko e talu mei he 1830 na’e fokotu’u ai ‘a e Siasi ko e Palesiteni hono 17 ‘aki ia pea koia pe kuo ne a’usia hono ta’u 100.
‘I he taimi tatau kuo ‘aukolo atu ki he ‘ofisi ‘o e Siasi pea mo e famili Nelson, ‘a e ngaahi popoaki talamonu ki he ta’u fakahisitolia kuo ne a’usia. Ko e popoaki mei he kau taki ‘o e pule’anga ‘Amelika pea pehee ki he kau taki ‘o e ngaahi siasi kehekehe ‘i mamani pe. ‘Oku ‘ikai ko e kau taki fakapule’anga pe ka ‘oku kau ai mo e kau takilotu ‘o e ngaahi siasi kehekehe mo e tui fakalotu kehekehe hangee ko e Mosilemi mo e ngaahi lotu ta’efakakalisitiane.
‘Oku ‘ikai ke ngata pe ‘enau popoaki ko e talamonuu ko e taki fakasiasi fakamamani lahi, ka ko e tau mahu’inga kuo ne a’usia.
Ko e popoaki mahu’inga na’ane fakahoko ki he fu’u kakai he polokalama fakasiasi fakamamani lahi, ‘Oku ‘ikai ko e loloa ho mo’ui ‘a e me’a mahu’inga taha, ka koeha ‘a e me’a kuoke mo’ui’aki”
Ko Russel M. Nelson na’e fanau’i ‘i he aho 9 Sepitema 2014 ki he ongo matu’a ko Edna Anderson Nelson and Marion C. Nelson ‘i Salt Lake City, Utah USA. Pea na’e fakanofo ia ko e Palesiteni ‘o e Siai ‘i he ‘aho 14 Sanuali 2018. Pea ko e lava ia ‘a e ta’u ‘e 40 ‘ene ngaue he ngaahi lakanga ma’olunga ‘o e siasi.
Ko hono mala’e ko e Toketaa ‘iloa ‘i mamani he mala’e ‘o e faitafa pea kuo ‘iloa ia ‘i mamani he ngaahi ta’u lahi na’ane hoko ai ko e Toketaa kimu’a pea ui ia ki he ngaahi lakanga ma’olunga ‘o e Siasi. Kuone hoko ko e Palesiteni ‘o e Vascular Surgery mo e Talekita ‘o e American Board of Thoracic Surgery mo e Chairman e Division of Thoracic Surgery pea mo e ngaahi kautaha lahi fakatu’apule’anga ‘oku ne memipa ai.
‘Oku ‘ikai ngata kuone fa’u ‘ene ngaahi tohi fakatoketaa fekau’aki mo e mala’e ‘o e faito’o ki he tafa.
Ko Nelson kuone ‘osi folaua ‘a Tonga ‘i he ‘aho 4 Novema 2007 ki hono toe fakatapui ‘o e Temipale Nuku’alofa Tonga, hili hono fakalelei’i fakalahi.
Kaekehe kuo fakahoko ‘e he kaingalotu ‘i Tonga ni ha ngaahi ouau kehekehe ko’enau fakalangilangi mo talamonuu ki he ‘aho ‘o e Palofita.
‘Oku fakafuofua ki he toko 17 miliona ‘a e tokolahi ‘o e Siasi ‘i mamani kotoa pea ‘oku makehe ‘a Tonga ni ki he Siasi, he ko e fonua tokolahitaha hono kaingalotu ‘o fakatatau ki he tokolahi ‘o e fonua fakalukufua.
