Kei lolongo pule’anga ki he makatu’unga (ground) ‘o e malu’i kitu’a kau Faka’iloa he faito’o konatapu ‘i he Pangike Pule
‘Oku kei lolongo pe pule’anga ki ha ngaahi fakamatala fekau’aki mo e tu’utu’uni ke faka’ataa kitu’a ‘a e ‘ofisa Pangike Pule ko Nonu Kolokihakaufisi mo hono tuofefine pea pehee ki ha ni’ihi kehe, fekau’aki mo ha faito’o konatapu.
Na’e puke he kau Polisi ‘i he ‘aho 10 Fepueli ‘a e faito’o konatapu kalasi ‘o e ice (meth) ko e 5.73kg mei honau ‘api nofo’anga ‘i Kolofo’ou pea mo e 9.27kg mei he ‘ofisi ‘o e Pangikee Pule na’e ngaue ai ‘a Nonu.
‘Oku kau ‘eni ha faito’o konatapu lahi lahi mo’oni ke puke mei ha famili pea ‘ikai fai ha lau ki he pa’anga ‘e ma’u kapau na’e a’u ki he maketi. ‘Oku toe fakalele loto ki he kakai ‘o e fonua koe’uhi ko hono ma’u mei he Pangike Pule ‘o e fonua, ko e feitu’u ‘oku pule’i ‘a e me’a fakapa’anga ‘a e fonua pea ko e fakakaukau ‘uluaki pe ‘oku fufulu fakatau atu heni ‘a e pa’anga ‘uli, ka ‘e toki mahino kotoa ‘a e ngaahi hu’uhu’u kotoa ha lele ‘a e hopo.
Kaekehe kuo mahino ‘eni kuo malu’i kitu’a ‘a e ongo Faka’iloa mo e ni’ihi kehe na’e puke fakataha ki he tukuaki’i ni, ka ‘oku fehu’ia pe ko e fiha na’e fakahoko’aki ‘a e totongi malu’i ki he ongo Faka’iloa kae malu’i kinaua kitu’a. He ‘e lava ‘e he lahi ‘o e pa’anga ‘o talamai ‘a e me’a lahi. Ka ‘oku toe mahu’inga ange ke mahino koeha ‘a e ngaahi fakangatangata ki he ongo Faka’iloa koe’uhi ko e teu ke fakahoko ‘a e hopo ‘oku na kei ‘i Tonga ni pe laumalie lelei ki he hopo, te’eki hoko ha me’a. Ko e ngaahi hoha’a ia ‘a e kakai ‘o e fonua ki he tu’unga hono malu’i ‘o e ongo Faka’iloa kitu’a.
Na’e ‘iai ‘a e ongo matu’a Siaina na’e teu ‘ena hopo fekau’aki mo e paasi pooti pea ko e kei tali ki he hopo kuo hola ‘a e ongo Siaina he vaka ki hotau fonua kaunga ‘api. Pea ko e me’a tatau ‘oku fai kiai ‘a e hoha’a.
Kaekehe kuo ‘iai ‘a e ngaahi talanoa kehekehe pe ki he Faka’iloa mo’ene ngaahi fiema’u, ka ‘e toki fakapapau’i hono mo’oni ha lele ‘a e hopo.
Fakatatau mo e fekumi ‘a e ongoongo ni, ‘oku te’eki pe ke a’u ‘a e keisi ni ki he Fakamaau’anga Lahi, ka ‘oku kei lele pe ngaue ‘a e kau Polisi. Ka ‘oku ‘ikai kei tatali ‘a e kakai ‘o e fonua ke fakahoko ‘a e hopo, kenau vakai ki he ngaahi mo’oni’i me’a ‘e ‘ohake he hopo. He ‘e lava pe kakai ‘o e fonua ‘o ‘analaiso ‘a e me’a lahi fekau’aki mo e mo’oni, he ngaahi fakamatala ‘e ma’u mei he Fakamaau’anga.
Na’e ‘oatu ‘a e kole ki he potungaue Polisi pea mo e Kalauni ke ‘omai ha fakama’ala’ala, ka ‘oku te’eki ke faingamalie ke ‘omai ha tali. Ka ‘oku mahino ‘oku na taliui pe ki he ‘api Polisi he uike kotoa ‘a e kau Faka’iloa.
