Tautea ngaue popula ta’u 4 mahina ‘e 6 ki he faka’uli ta’etokanga hoko ai pekia
Kuo tautea ngaue popula ‘e Fakamaau Lahi CJ Cooper ‘i he Fakamaau’anga Lahi Nuku’alofa he ‘aho 2 ‘Aokosi, ‘a Kepueli Christopher Mafi ki he pekia ‘a e matapule ko ‘Ahotau Taufu’i.
Ko e ta’u ‘e 1 ‘o e tautea ‘e tautea toloi ia he ta’u ‘e ua ‘i he ngaahi makatu’unga pau. Pea ‘e ngaue’i pe he Faka’iloa ‘a e ta’u ‘e 3 mahina ‘e 6.
‘I he puipuitu’a ‘o e me’a na’e hoko, ‘i he ‘aho 20 Novema 2022 na’e kau atu ai ‘a e Faka’iloa ki he fe’auhi ‘akapulu na’e fakahoko. ‘I he hili ‘a e va’inga na’ane kau fakataha atu mo e toenga ‘o e timi ki ha ki’i inuinu he ‘osi ‘a e va’inga. Fakafuofua ki he taimi 2:00 am he poo koia na’e foki ai ‘a e Faka’iloa ki Ha’asini ‘oku ne nofo ai.
Ka ‘i he’ene a’u mai ki Nualei, na’e hoko ai fakatamaki ko’ene tui’i ‘a e pekia ‘o malolo hili hono leleaki’i ki he falemahaki.
Ko e fakamatala ‘a e Faka’iloa, na’e mohe ia he’ene faka’uli foki pea ‘oku ne manatu’i na’e ‘iai ‘a e me’a na’ane kaka ai lolotonga ‘ene lele he hala Nualei ‘o fou ki Hahake, ka ‘oku ‘ikai ke ne ‘ilo ‘eia ko ha taha koe’uhi ko’ene hu’akava’ia. ‘I he’ene toki fanongo he ongoongo ki he pekia mo’ene manatu’i ‘a e mea na’e hoko na’ane toki fetu’utaki ai mo e kau Polisi.
Na’e ‘iai foki ‘a e tohi na’ane fakahoko ko e hiki fakamatala ‘ene kole fakamolemole ki he pekia kuo hoko, ko e makatu’unga ‘i he’ene faka’uli ta’etokanga. Ka ‘oku tui ‘a e Faka’iloa na’e ‘ikai ha’ane taumu’a ke hoko ha pekia ki he pekia.
Na’e ‘iai foki mo e ngaahi fakamo’oni mei he me’afaitaa he kautaha uta ‘i Nualelei ki he me’alele, ka ko e kaa na’e faka’uli ai ‘a e Faka’iloa ko e kaa lanu puluu pea pehee ki he tokotaha na’ane sio ki he kaa tatau ‘oku tau ‘i he toumu’a ‘o e falemahaki ‘i Vaini, mo e Faka’iloa na’e fakasio ‘a e taumu’a ‘ene me’alele.
Kaekehe ko e pekia na’e fakahoko ‘enau toli meleni ‘i Fua’amotu pea ko e hili ‘a e ngaue na’ane ‘alu ke fai ha ki’i tafi hele’aia ka na’e fa’ao he’ene tangata’eiki ‘a e me’alele ke ‘oua ‘e faka’uli konaa. Na’e ‘ita ai ‘a e pekia ‘o lue pe mei Pelehake ‘o a’u mai ki Nualei ki he feitu’u na’e hoko ai ‘a e fakatamaki.
‘I he ngaahi tohi fakaongoongolelei ‘o e Faka’iloa, ko e tokotaha falala’anga ki he hoa mo e ki’i fanau pea ‘oku ne ngaue ‘i he Kautaha ‘Uhila ‘a Tonga pea falala’anga ‘aupito. ‘Oku hoko ko e tokotaha ngaue lelei ‘i he kolo mo e komiuniti pea pehee ki he siasi ‘oku kau kiai. ‘Oku ‘iai foki hono taleniti he ‘akapulu pea ‘iai mo e tohi fakaongoongolelei mei he CEO ‘o e ‘akapulu. ‘Oku ‘ikai foki ha no lekooti faihia ‘i he fakamaau’anga.
