Fakangata ‘e Toloa ‘a e feinga fakaaoao ‘a Liahona he mala’e Sipoti.
Na’e fakangata ‘e he fanau mei he Vaotaa Koula mo e Kolisi ko Tupou ‘a e feinga ‘a e ‘Apiako Ma’olunga ko Liahona kenau fakaaoao ‘i he mala’e sipoti ‘i he ta’u ni.
‘I he Sipoti fakakolisi ‘o e ngaahi ako ‘i he ta’u ni na’e fu’u mahino ‘a e fakaaoao ‘a e fanau mei he Funga Taua mo e ‘Otu Falesima, ‘enau tata ‘a e koula lahitaha pea ko e fika ua na’e ‘ikai a’u ia ki he vaeua ‘o e koula na’e ma;u ‘e Liahona.
‘I he laumalie tatau na’e fakakaukau ‘a Liahona kenau toe ‘aliaki ‘i he mala’e ‘akapulu, ke fa’ao ‘a e Ipu fakaako mei he ngaahi kolisi kotoa ‘o kau ai ‘a e Ipu ‘a e Senior ko e Ipu mahu’inga taha ia he fe’auhi fakaako. Pea ‘ai ai ko e toe fakahisitolia ko e fainolo kotoa ‘a e ngaahi timi ‘akapulu ‘a Liahona mei he grade 3,4,5 mo e Senior. Pea ‘i he ngaahi fainolo na’e hamusi ‘e Liahona ia ‘a e grade 4 mo e 5 pea ‘amanaki ‘e fai pehee mo e timi Senior pea fokotu’u ai ha makamaile ma’ae ‘apiako he ko e talu mei he 2013 ko’enau ala fakamuimui pe ia ‘i he Ipu ‘a e Senior.
Kaekehe, ko e kotoa ‘o e ngaahi ‘amanaki ko’eni na’e tokoto hifo ‘a e fanau va’inga ‘a e timi mei he Vaotaa Koula ‘o tatapuni ‘a e laine tata’o ‘i he miniti faka’osi ‘o e va’inga, ke fiu mo’oni ‘a e kau siana maka ‘a Liahona he feinga ki he laine tata’o ke sila’i ‘a e malohi ma’a Liahona he miniti faka’osi.
Ko e va’inga matu’aki malie mo’oni ‘i he ‘osi ‘a e taimi kakato ‘oku Toloa 18-Liahona 13, ‘i he taufetuli pe ‘a e papa tohi kai he kamata ‘a e va’inga. Ka ‘i he toe ha miniti ‘e 10 pea ‘osi taimi, mo e lolololo pe ‘a Liahona he matani kolo ‘o Toloa, ka na’e hangee ‘a e malukolo ‘a Toloa ha fu’u ‘aa maka he fiu feinga ‘a e fanau mei he Funga Taua.
Na’e tu’o 3 ‘a e faingamalie na’e ma’u ‘e Liahona he miniti faka’osi pea pehee he tokolahi tenau fakatatau’i ‘a e papa tohi kai kae toki fai ha feinga, ka na’e feinga ‘a Liahona kenau tata’o pea ke sila’i ai pe malohi. Ka ko e pango na’e ‘ikai pe pehee mai he fanau ia mei he Vaotaa Koula koeha ‘a e kau siana maka, kanau fakangata ai pe ‘a e ‘amanaki ‘a Liahona kenau fakaaoao he sipoti ‘o e ta’u ni. Kuo nau ikuna ‘a e fe’auhi Liiki, fakaaoao he Sipoti fakakolisi pea ‘amanaki ki he timi Senior ‘o e ‘akapulu fakaako, ka na’e fakamahino ‘e he fanau mei Toloa ko e mala’e ‘akapulu ko e mala’e tuku fakaholo ia ‘o nautolu pea kenau toki feinga mai he ta’u fo’ou na’a faingamalie.
Ko e taha foki ‘a e vaivai’anga ‘o e va’inga ‘a e ongo timi ko e ‘ikai ke sai ‘a e ‘aka fakahuu ‘o tatau pe ongotimi fakatou’osi, ka ko e taha ia ‘o e me’a fika ‘uluaki ki he va’inga ‘akapulu ‘i he’ene a’u ki he ngaahi fe’auhi ma’olunga ange, ‘a e mahu’inga ke ‘iai ha tama ‘aka fakahuu lelei.
Kaekehe neongo ‘a e ulungia ‘a Liahona ka ko e tau matu’aki malie mo’oni, he na’e hangee kau mamata mo e kau sio he Live stream ‘oku nau ta’utu ha tu’unga loo ‘i he anga ‘a e fetukuaki ‘a e va’inga mo e papa tohi kai. Pea na’e tui ‘a e tokolahi ko e kau ‘eni he ngaahi fainolo malie taha kuo fakahoko pea pehee ki he tokolahi ‘a e kau mamata, ‘o tokolahiange ia he ngaahi tesi ‘etau timi Fakafonua.
Ko e anga leva ‘a e tu’u ‘a e ngaahi grade:
Grade 1 & 2 – Kolisi ko Tupou.
Grade 3 – Kolisi Tonga.
Grade 4-5 – ‘Ako Ma’olunga Liahona.
Senior – Kolisi ko Tupou.
Na’e malie ‘a e fe’auhi ‘o e ta’u ni ko e kau mai ‘a e timi Senior ‘a e Lolo mei Vava’u pea nau fakangata ‘a e fanau mei he Funga Manamo’ui ‘i he kuata fainolo, kae toki hangae ‘e Liahona ‘o fakangata kinautolu ‘i he semi final. Na’anau tau’i mo ‘Apifo’ou ‘a e 3-4 ka na’e ta’efiemalie ‘a Vava’u ‘o tukuaki’i na’e ‘osi ‘a e va’inga ‘oku toe miniti ‘e 12 ka ‘oku te’eki ke fakapapau’i ‘a e fo’i tukuaki’i ko’eni.
‘I he ‘osi ‘a e ngaahi fainolo na’e foaki ‘a e ngaahi pale, ‘e he ta’ahine Pilinisesi Kalauni pea mo e fakafiefia ko e melino ‘a e fe’auhi ‘ikai hoko ha ngaahi feke’ike’i. Na’e kau mo hono ‘omai he komiti ‘a e kau Fakamaau mei Fisi kenau Fakamaa’u ‘a e fainolo ke fakasi’isi’i ai ‘a e longoa’a pea ngalingali ko e founga ia ‘e lele ‘aki ki he kaha’u.
